Aha do na Didok Bibel taringot si Daniel?

Na didok Bibel

Sada panurirang ni halak Jahudi na mangolu di abad papituhon sahat tu abad paonomhon sebelum Masehi, i ma si Daniel. Diurupi Debata do ibana asa boi paboahon lapatan ni nipi, paboahon aha na lao masa di ari na naeng ro, jala diurupi tondi parbadia ni Debata do ibana lao manuratton sada bukku di Bibel na mamakke goarna sandiri.—Daniel 1:17; 2:19.

Kisah hidup ni si Daniel

Magodang di Juda do si Daniel. Disi do Jerusalem dohot bagas joro ni halak Jahudi. Alai di taon 617 SM, ditaluhon si Nebukadnesar raja ni Babel ma Jerusalem. Jala ditawan ma “akka halak na sangap” tu Babel. (2 Raja-Raja 24:15; Daniel 1:1) Tikki i, olo do ra remaja dope si Daniel, jala dohot do si Daniel ditawan.

Si Daniel dohot akka na poso na asing diboan pengawal ni raja tu istana Babel.

Dung i, diboan ma si Daniel tu istana ni Babel rap dohot akka remaja na asing, termasuk ma i si Sadrak, si Mesak, dohot si Abednego. Di istana i, dipasikolahon do nasida asa boi nasida annon gabe pejabat ni raja. Saleleng na dipasikolahon i nasida, sering do nasida dipaksa mangulahon ulaon na maralo tu patik ni Debata. Nang pe songon i, setia do si Daniel dohot tolu donganna i tu Debata Jahowa. (Daniel 1:3-8) Dung tolu taon, tamat ma nasida sikkola. Dipuji Raja Nebukadnesar do nasida ala “dao do umbisuk jala ummalo nasida mangalusi sian sude datu dohot peramal na adong di harajaonna”. Dung i, dibahen raja ma si Daniel dohot tolu donganna i gabe pejabat di istana.—Daniel 1:18-20.

Dung marumur lobi sian 90 taon si Daniel, dijou ma ibana muse tu istana. Tikki i si Belsasar do na mamaretta di Babel. Disuru ibana ma si Daniel paboahon lapatan ni surat na di dinding na disuratton sada tangan. Di borngin i diurupi tondi parbadia do si Daniel paboahon lapatan ni surat i, i ma na lao ditaluhon halak Media Persia do Babel. Jala toho do terjadi i di borngin i.—Daniel 5:1, 13-31.

Dipaboa si Daniel lapatan ni surat na di dinding.

Dung halak Media Persia na mamaretta, dipillit ma si Daniel gabe pejabat tinggi. Jala naeng dibahen Raja Darius ma ibana gabe pamimpin ni akka pejabat tinggi i. (Daniel 6:1-3) Gabe cemburu ma akka pejabat tinggi na asing. Jala berencana ma nasida lao mambunu si Daniel. Dijebak nasida ma si Daniel, jala gabe dipamasuk ma si Daniel tu lubang ni singa. Alai dipalua Jahowa do ibana. (Daniel 6:4-23) Tikki naeng mate si Daniel, ro ma suru-suruan lao patoguhon ibana. Dua hali ma didok suru-suruan i, “na massai dihaholongi Debata” do si Daniel.—Daniel 10:11, 19.

Tonton ma video taringot kisah hidup ni si Daniel, di drama Daniel—Marhaporseaon Saleleng Ngoluna bagian sada dohot bagian dua.

Maralo do na didok di bukku Daniel tu sejarah?

Na didok Bibel: Dibahen si Nebukadnesar ma sada patung na balga jala disuru ibana ma akka halak manomba patung i. Manang ise na so olo manomba patung i, disappatton ma tu api na marnala-nala.—Daniel 3:1-6.

Na didok sejarah: Menurut Encyclopædia Britannica, “dibahen si Nebukadnesar pe patung na balga i, dang holan lao pasangappon dirina sandiri, alai dohot do naeng pasangappon debatana”. Boi dokkonon, “ibana do na mangarahon akka halak asa manomba akka dewa”.

Di catatan sejarah Babel, adong dipaboa piga-piga hali taringot hukuman tu akka halak na so mangulahon paretta ni raja, i ma ditutung di api na marnala-nala. Sada catatan sejarah i paboahon hukuman na marlakku tikki mamaretta si Nebukadnesar. Hukuman i dibahen tu akka pejabat ni raja na so olo manomba akka dewa. Didok di catatan ni sejarah i, “Pamate nasida, tutung nasida, . . . panggang nasida di api na marnala-nala. . . . Mohop hian ma bahen api i, asa mate nasida. .”a

Na didok Bibel: Dianggarhon Raja Nebukadnesar do proyek pembangunan na dibahen ibana.—Daniel 4:29, 30.

Batu bata na sian peninggalan sejarah Babilonia. Adong tarsurat goar ni si Nebukadnesar di batu i

Na didok sejarah: “Sian catatan na disurat si Nebukadnesar sandiri, boi ma taboto dirippu si Nebukadnesar do ibana raja na unjago di portibi on.”b Contohna, di sada bangunan na dipajongjong si Nebukadnesar, adong do tulisan na disurat ibana sandiri na mandok, “Au do na pajongjokkon tembok on, mamakke aspal dohot batu bata. Dang na lao maruppak on sappe tu andigan pe. Au do na pajongjokkon tembok Esagila dohot Babel on, asa diingot halak pamarettaokku saleleng ni lelengna.”c Asing ni i, tarsurat do goar ni si Nebukadnesar di godang batu bata peninggalan sejarah ni Babel.

Na didok Bibel: Naeng dibahen Raja Belsasar do si Daniel “gabe parhuaso na patoluhon di harajaon” Babel.—Daniel 5:1, 13-16.

Tarsurat do goar ni Raja Nabonidus dohot goar ni anakna si Belsasar, di catatan silinder na sian taon 550 SM

Na didok sejarah: Cerita di Daniel bindu 5 terjadi tikki si Nabonidus na mamaretta gabe raja. Alai ussering do si Nabonidus mamaretta di Arab, dang di Babel. Attong, ise ma na mamaretta di Babel tikki di Arab ibana? Songon on ma na didok sejarawan Raymond Philip Dougherty di bukku Nabonidus and Belshazzar. “Catatan sejarah patuduhon, dipasahat si Nabonidus do pamarettaonna tu anak siakkanganna, i ma si Belsasar. Mewakili bapakna do si Belsasar mamaretta. Jadi aha na biasa diulahon bapakna, i do na biasa diulahon ibana.” Ala si Nabonidus parhuaso na parjolo jala si Belsasar parhuaso na paduahon, alani i ma naeng dibahen si Belsasar si Danel gabe parhuaso na patoluhon.

a Journal of Biblical Literature, Jilid 128, No 2, halaman 279, 284.

b Babylon—City of Wonders, karya si Irving Finkel dohot Michael Seymour, halaman 17.

c Archæology and the Bible, karya si George Barton, halaman 479.