Porang di Daerah Timur Tengah​—Aha do na Didok Bibel Taringot i?

Mabiar do akka halak mangida konflik ni Amerika Serikat, Israel, dohot Iran. Lam balga do annon konflik on? Boi do pamaretta mangabbati asa unang sappe terjadi porang? Jala boi do pamaretta mambahen asa dame portibi on?

Gabe sukkun-sukkun ma roha ni akka halak na manjaha surirang manang nubuat na adong di Bibel, konflik di Timur Tengah on do annon na gabe parmulaan ni porang Armagedon na dipaboa di bukku Pangungkapon?

Aha do na didok Bibel taringot i?

Boi do pamaretta pasohon porang di daerah Timur Tengah?

Bibel mandok, “Unang ma porsea hamu tu akka pamimpin, manang tu anak ni jolma na so boi mangalehon haluaon.”—Psalmen 146:3.

Dang taboto tolap manang na daong pamaretta mambahen asa lam dame keadaan di daerah Timur Tengah. Alai takkas do taboto sian Bibel, dang boi pamimpin ni politik, pamarettaon ni jolma, manang kelompok tertentu pasohon porang jala mambahen dame portibi on. Holan Debata do na boi ‘paujukkon akka porang di saluhut tano on’.—Psalmen 46:9.

• Asa lam godang diboto hamu taringot on, jaha ma majalah Joujou Paboahon na marjudul “Boi do Dang Adong Be Porang?”

Na manggohi surirang ni Bibel do porang di daerah Timur Tengah?

Bibel mandok, “Begeonmuna ma soara ni na marporang dohot barita taringot tu akka parporangan. . . . Marporang ma bangso tu bangso jala harajaon tu harajaon.”—Mateus 24:6, 7.

Sada sian “tanda ni panutup ni jaman on” do konflik na masa baru-baru on di daerah Timur Tengah. Jala on ma muse na gabe bukti naung mangolu di “ari parpudi” do hita saonari. (Mateus 24:3; 2 Timoteus 3:1) Akka porang na masa saonari on patuduhon na lao dipaso Debata nama porang satokkin nai dohot sitaonon na mambahen susa jolma.

• Asa lam godang diboto hamu taringot on, jaha ma artikel “Aha do Tanda ni “Ari Parpudi” manang “Ujung ni Ari” i?”

Di daerah Timur Tengah do lao terjadi porang Armagedon?

Bibel mandok, “Dipapungu ma akka raja i tu inganan na margoar Armagedon di bahasa Heber.”—Pangungkapon 16:16.

Armagedon i dang porang ni akka pamarettaon mangalo pamarettaon na asing na dimulai di daerah Timur Tengah. Alai porang ni Debata do i mangalo sude pamarettaon ni jolma.

• Asa lam godang diboto hamu taringot on, jaha ma artikel “Aha do Porang Armagedon i?”

Boha ma carana asa unang mabiar manang pamarsakhu hita?

Bibel mandok, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon.”—Pilippi 4:6.

Dijujui Debata Jahowaa do hita asa martangiang tu Ibana. Ala diparrohahon Debata do hita, ditangihon Ibana do tangiangta jala diurupi Ibana do hita asa unang mabiar manang pamarsakhu. (1 Petrus 5:7) Buktina dipaboa Debata do marhite Bibel boasa masa porang, boha do carana pasohon porang, jala aha do na diulahon Ibana lao pasohon sitaononta.—Pangungkapon 21:3, 4.

• Asa lam godang diboto hamu taringot on, jaha ma artikel “Adong do Ayat ni Bibel na Boi Menghibur Rohakku?.”