Boha do molo Marsahit na Parah Au? (Bagian 3)

Biasana sehat-sehat do akka na poso. Jala hira na so hea do suda gogo ni nasida. Alai adong do piga-piga na poso na so boi songon i ala marsahit nasida. Songon i do na dihilala ho? Molo i do, pengalaman ni si V’loria, si Justin, dohot si Nisa boi do patoguhon ho. Saksi Jahowa do nasida. Parrohahon ma, boha cara ni nasida menghadapi masalah kesehatan ni nasida.

• Si V’loria

• Si Justin

• Si Nisa

Si V’loria

Sian marumur 14 taon, marsahit fibromyalgia (nyeri otot parah) do au. Tikki marumur 20 taon, marsahit rematik, lupus, dohot akka sahit na asing do au. Maol do huhilala lao mangulahon manang aha pe, alana hira na so adong do gogokku. Sipata dang boi hugerakkon dagingku sian pinggul sahat tu toru. Jadi ikkon markursi roda do au.

Alai na paling tersiksa, i ma pikkiran dohot perasaanku. Haru mangulahon akka ulaon na sederhana, songon manurat dohot mambukka toples pe dang tolap au. Haru dakdanak boi mardalan, alai maol do i huulahon. Dang terima au boasa songon i keadaanku. Huhilala hira na so marguna do au.

Nang pe songon i mandok mauliate do au tu akka dongan di huria Saksi Jahowa. Jotjot do akka dongan di huria ro mengunjungi au. Jadi dang kesepian be huhilala. Jala nang pe maol lao pamasukkon dohot pakaluarhon au sian mobil ala markursi roda, tetap do diajak nasida au ro tu acara ramah tamah.

Akka na matua di huria do na tarlumobi mangapuli au, alana diboto nasida do boha perasaan ni halak na marsahit. Gabe boi ma au menerima kenyataan jala dang husalahon dirikku nang pe dang boi godang na huulahon songon na diulahon halak na asing. Las hian do rohakku ro tu parpunguan Kristen dohot tikki marbarita na uli. (Heber 10:25) Alana nang pe marsahit au, adong do hape piga-piga na boi huulahon songon na diulahon halak na asing.

Huboto do, sai dilehon Jahowa do aha na tahaporluhon asa boi martahan. Misalna didok do di Bibel, nang pe lam gale daging ni sasahalak, ‘alai lam dipaimbaru do roha nang pikkiranna ganup ari’. (2 Korint 4:​16) Songon i ma na huhilala.

Pikkirhon ma on: Molo parah sahitmu, aha do manfaatna mangurupi na asing jala dang menyendiri? Molo sehat ho, songon dia ma ho boi patoguhon donganmu na marsahit?​—Poda 17:17.

Si Justin

Toppu ma au madabu jala dang boi be hehe. Haccit huhilala dadakku jala dang boi au bergerak. Pittor diboan ma au tu ruang gawat darurat. Mulana dang diboto akka dokter aha do sebenarna sahittu. Alai dung piga-piga hali terjadi songon i, gabe disimpulhon dokter ma na hona penyakit Lyme do au.

Gabe sega do sistem sarafhu dibahen sahit Lyme on. Nungnga piga-piga taon au marubat. Alai sahat tu saonari, sering do dagingku makkuturi jala dang terkendali. Sipata haccit do dagingku, jari-jarikku pe haccit hian sappe dang boi digerakkon. Hira na tasikon huhilala sude sendikku.

Hea do au marpikkir, ‘Boasa marsahit au, hape poso dope au’. Gabe muruk ma au. Muruk ma muse au tu Debata. Hudok ma, “Boasa ma ikkon au na manaon on sude?” Sanga do au marpikkir, nungnga ditadikkon Debata be au. Alai huingot ma muse cerita taringot si Job na disurat di Bibel. Si Job pe dang diboto sude alasan na mambahen ibana susa. Alai toktong do setia ibana tu Debata. Haru si Job boi do dihadapi ibana sude masalah na borat, au pe pasti boi do.

Massai parduli do akka sintua na di huria tu au. Sai ro do nasida mengunjungi au, jala disukkun do songon dia perasaanku. Adong ma sada sintua na mandok tu au, boi do ibana hutelepon manang andigan pe. Ganup ari sai mandok mauliate do au tu Jahowa ala nungnga dilehon akka dongan na burju songon nasida.​—Jesaya 32:​1, 2.

Molo marsahit na parah hita, sipata lupa do hita molo Jahowa i parduli jala mamparrohahon sude na masa tu hita. Didok do di Bibel, “Pasahat ma holso ni roham tu Jahowa, sai urupanna do ho.” (Psalmen 55:22) Songon i ma na huulahon ganup ari.

Pikkirhon ma on: Songon dia do akka halak na holong rohana tu ho boi mangurupi ho tikki menghadapi masalah kesehatan?​—Poda 24:10; 1 Tessalonik 5:​11.

Si Nisa

Tikki remaja, hona sindrom Marfan ma au. Kelainan on mambahen gale akka sendikku. Sindrom Marfan boi do tong mengganggu fungsi jantung, mata, dohot akka organ penting na asing. Haccit hian do huhilala dagingkon molo kambuh.

Tikki huboto na hona sindrom Marfan au, sai tangis ma au. Mabiar do au, so tung dang boi be huulahon akka ulaon na huhalomohon. Contohna, lomo do rohakku menari. Alai gabe mabiar do au molo dang boi be annon menari. Alana, haru mardalan pe haccit hian do huhilala. Gabe mabiar do au menghadapi aha na lao masa di ari na naeng ro.

Sai dipatogu kakakku do au. Diurupi ibana do au asa unang berfokus tu perasaanku. Didok ibana, ikkon barani do au menghadapi situasikkon. Alana molo torus au mabiar, olo do gabe lam susa ngolukku annon. Dipaingot ibana do tong au asa lam jotjot martangiang. Alana holan Jahowa do na paling mangattusi aha na hualami.​—1 Petrus 5:7.

Massai dipatogu do au tikki manjaha Psalmen 18:6. Didok di ayat i, “Jou-jou do au tu Jahowa di hasusaakki, sai jou-jou do au tu Debatakku mangido asa diurupi. Ditangihon Ibana do soarakku sian bagas jorona, jala dibege Ibana do soarakku na jou-jou lao mangido asa diurupi.” Ayat on paposson rohakku, molo martangiang au tu Jahowa jala mangido bantuanna, pasti dibege jala diurupi Ibana do au. Sai rade do Ibana mangurupi au.

Wajar do molo lungun rohatta manang gabe kecewa hita tikki menghadapi sitaonon na borat. Alai nang pe lungun rohatta jala kecewa, unang ma sappe mandele hita manang gabe sega hubungatta tu Debata. Alana dang Debata na mambahen hita susa. Jala dang tadikkononna hita molo toktong setia tu Ibana.​—Jakobus 4:8.

Pikkirhon ma on: Debata do na mambahen hita susa?​—Jakobus 1:​13.