Boasa Saksi Jahowa Marbarita Muse tu Halak na Hea Mandok “Dang Lomo Rohakku”?

Ala holong rohanami tu Jahowa dohot tu akka jolma, marsitutu ma hami marbarita na uli tu sude halak, dohot ma i tu halak na hea mandok “dang lomo rohakku”. (Mateus 22:37-​39) Holong ni roha tu Debata, mangonjar rohanami mangoloi paretta ni anakNa asa “mangkatindangkon tu natorop”. (Ulaon ni Apostel 10:42; 1 Johannes 5:3) Alani i ma dang holan sahali dipaboa hami barita i, dos songon na diulahon akka panurirang ni Debata najolo. (Jeremia 25:4) Ala holong rohanami tu akka jolma, hupaboa hami ma “barita na uli on na taringot tu Harajaon”, na boi parohon haluaon, nang pe dang lomo roha ni nasida manangihon barita i di mulana.​—Mateus 24:14.

Jotjot do hami pajuppang dohot halak na manjakkon, di jabu ni halak na so manjakkon hian. Aha na mambahen?

• Marganti halak na mangingani jabu i.

• Adong halak na asing di jabu i na olo manjakkon.

• Muba do situasi ni sasahalak. Situasi dohot na masa boi mambahen sasahalak gabe mauas di partondion jala olo manjakkon barita na uli. (Mateus 5:3) Halak na so olo manjakkon pe boi do muba rohana dos songon na dihilala apostel Paulus.​—1 Timoteus 1:​13.

Alai dang olo hami mamaksa halak manjakkon barita na uli. (1 Petrus 3:​15) Diboto hami do ganup halak marhak mamillit taringot tu partondion.​—5 Musa 30:19, 20.