Aha do Lapatan ni Badia manang Suci?
Na didok Bibel
Lapatan ni badia manang suci, i ma dang kotor jala dang najis. Hata Heber na diterjemahon gabe “badia” dibuat sian sada hata na lapatanna “pulik”. Jadi molo didok badia manang suci, berarti na mandok ias do i jala dang najis.
Badia situtu do Debata. Aha do lapatan ni i? Didok di Bibel, “Ndang adong na badia, tudoshon Jahowa.”a (1 Samuel 2:2) Holan Debata do na boi manottuhon dia na badia jala dia na najis.
Dipakke do hata “badia” manang “suci” lao paboahon taringot Debata. Jala dipakke do hata on lao patorakkon taringot ulaon lao manomba Debata. Umpamana dipaboa do di Bibel taringot:
Inganan na badia: Tikki si Musa di jonok ni ramba na tarbakar, didok Debata do tu ibana, “Ai tano na badia do hajongjonganmon.”—2 Musa 3:2-5.
Ari na badia: Najolo, jotjot do halak Israel mambahen perayaan lao manomba Jahowa. Akka perayaan i didok do “ari parluhutan na badia”.—3 Musa 23:37.
Barang na badia: Akka barang na dipakke di bagas joro na di Jerusalem, didok do i “peralatan na badia”. (1 Rajaraja 8:4) Istimewa do akka barang na badia i jala dang sembarangan i dipakke. Alai dang hea barang i gabe disomba.b
Boi do jolma na mardosa gabe badia?
Boi. Didok Debata tu halak Kristen, “Ingkon badia do hamu, ai badia do ahu.” (1 Petrus 1:16) Memang dang boi sarupa hita tu Debata, na badia situtu. Alai nang pe songon i, molo taoloi patik ni Debata, didok ma hita “na badia, jala na palashon roha ni Debata”. (Rom 12:1) Molo marsitutu hita asa badia, tarida do i sian pakkataion dohot pambahenanta. Umpamana, gabe taoloi ma poda ni Debata na mandok, “Ingkon badia ma hamu jala pasiding hamu ma seks na so patut.” Asing ni i, gabe marsitutu ma hita asa ‘badia di sude parniulaonta’.—1 Tessalonik 4:3; 1 Petrus 1:15.
Boi do dang badia be hita di adopan ni Debata?
Boi. Molo dang taoloi be aturan na dibahen Debata, dang badia be hita di adopanna. Umpamana, disurat do bukku Heber tu “angka dongan na badia”. Alai didok muse di buku i, olo do adong sian nasida na gabe “marroha na jahat, na gabe so porsea jala manadingkon Debata na mangolu i”.—Heber 3:1, 12.
Pandapot ni akka halak taringot badia
Pandapot ni akka halak: Asa boi badia, ikkon tapadao do sude na mambahen las rohatta.
Na sasittongna: Didok di Bibel, molo ‘tapahansit-hansit’ diritta, “ndang marguna” i di Debata. (Kolosse 2:23) Lomo do roha ni Debata asa las rohatta di sude ulaonta. Didok di Bibel, “Manang ise jolma na mangan dohot na minumi dohot marnida na denggan marhite sian ulaonna, silehonlehon ni Debata do nang i.”—Parjamita 3:13.
Pandapot ni akka halak: Umbadia do halak na so marhasohotan.
Na sasittongna: Boi do halak Kristen mamillit naeng marhasohotan manang dang marhasohotan. Alai dang i na mambahen nasida gabe badia di adopan ni Debata. Memang molo dang marhasohotan, gumodang do tikki na boi talehon lao manomba Debata. (1 Korint 7:32-34) Alai didok di Bibel, halak na marhasohotan pe boi do badia di adopan ni Debata. Gariada, adong do sada apostel ni Jesus na marhasohotan, goarna si Petrus.—Mateus 8:14; 1 Korint 9:5.
a Jahowa, i ma goar ni Debata. Adong marratus ayat ni Bibel na paboahon goar ni Debata rap dohot hata “badia” manang “suci”.
b Didok di Bibel, dang boi tasomba gana-ganaan.—1 Korint 10:14.