Solusi na Bermanfaat tu Akka Dongan Dohot tu Bumi on

Nungnga godang be na sega di planet bumi on dibahen jolma. Alai diboto Saksi Jahowa do satokkin nai lao padengganon ni Debata nama planet bumi on. (Pangungkapon 11:18) Nang pe songon i berupaya do hami sian nasa tolapnami lao menjaga asa unang tamba sega bumi on. Misalna, tikki pajongjokkon akka bangunan na dipakke organisasinami, berupaya do hami asa unang gabe sega lingkungan di sekitarna.

Dibahen organisasinami pe songon i lao mangorui akka na boi mambahen lam sega bumi on do. Akka aha ma na diulahon hami? Aha ma pengaruh ni kegiatan i tu sumbangan na dilehon akka dongan?

Mamasang Kipas Bertenaga Angin di Bale Kebaktian

Di mulana, dang mardinding Bale Kebaktian Matola di Mozambik. Jala ala holan pakke seng do atapna, gabe mohop hian ma di bagasan ruangan i tikki las ari. Songon on ma na didok sahalak donganta na kebaktian disi, “Sappe markaringat ma hami alani mohopna! Dung sae kebaktian, biasana pittor kaluar do akka dongan sian ruangan i lao marangin.” Aha ma na diulahon hami asa nyaman jala berkonsetrasi akka dongan i tikki kebaktian?

Diputusson hami ma mamasang alat na so manegai lingkungan: i ma turbin manang kipas bertenaga angin dohot insulasi atap. Boi do insulasi atap i mangorui mohop ni ari na masuk tu gedung i, jala kipas manang turbin i ma na pamasukkon udara segar. Dang mamakke listrik kipas on. Alogo do na mambahen kipas on bergerak lao mambolokkon udara na mohop sian bagasan sada gedung huhut pamasukkon udara segar. Hira-hira 50 dolar AS (800.000 rupiah) ma arga ni kipas on sada.

Dung dipasang alat on, gabe lam denggan ma sirkulasi udara di Balai Kebaktian i. Ala marputar do torus udara di ruangan i, dang lembab jala dang jamuron be bangunanna. Dang mokkap be ruangan i ala nga godang oksigen na masuk. Gabe boi ma akka donganta berkonsentrasi jala nyaman tikki kebaktian. Dung dipasang alat i, songon on ma na didok donganta na dipaboa di paragraf sebelumna, “Saonari, dang pittor kaluar be hami sian ruangan i molo dung sae kebaktian. Bahkan di bagasan do hami mangan tikki istirahat siang jala bergaul dohot akka dongan. Songon na hundul di toru ni hau na balga ma saonari huhilala di bagasan ruangan i!”

Mamakke Energi Mataniari

Di godangan gedung na dipakke organisasinami, dipasang do sistem panel surya. Sistem on mambahen las ni ari, i ma energi na so marnasuda, gabe arus listrik. Alani i dang holan tu listrik na sian batu bara, minyak bumi, dohot gas be hami bergantung. Boi ma on mangorui polusi jala menghemat dana sumbangan.

Taon 2023, dipasang ma sistem panel surya on di kantor cabang Slovenia. Boi do sistem i paradehon 30 persen tenaga listrik na dihaporluhon gedung i. Alani i gabe ummura ma saonari biaya listrik ni kantor cabang jala boi ma tenaga listrik na lobi dipakke pamaretta lao kebutuhan ni masyarakat. Arga do memang sistem tenaga surya on, hira-hira 360.000 dolar AS (6 miliar rupiah) ma argana. Alai boi do biaya listrik na dihemat saleleng opat taon manutup tuhor ni sistem panel surya i.

Taon 2024, dipasang hami ma sistem panel surya dohot sada batrena na balga di kantor cabang Sri Lanka. Habis do biaya hira-hira 3 juta dolar AS (49 miliar rupiah) lao mamasang sistem on. Alai boi do sistem on paradehon 70 persen tenaga listrik na dihaporluhon kantor i. Jala boi do biaya listrik na dihemat saleleng tolu taon manutup tuhor ni sistem panel surya on. Di taon i, dipasang hami do tong sistem panel surya di kantor cabang Belanda. Hira-hira 1,1 juta dolar AS (18 miliar rupiah) ma biaya lao mamasang sistem on. Alai boi do i paradehon 35 persen listrik na dihaporluhon kantor cabang i. Jala boi do biaya listrik na dihemat saleleng sia taon manutup tuhor ni sistem panel surya on.

Dipasang hami do muse sistem panel surya di piga-piga kantor penerjemahan jarak jauh (RTO) di Meksiko. Taida ma sada contohna di RTO Tarahumara (Tengah) na adong di Chihuahua. Molo tikki musim dingin, boi do suhu disi di toru ni 0 derajat Celsius. Jala tikki musim panas, boi do suhuna lobi sian 40 derajat Celsius! Alai dang olo akka donganta mamasang penghangat manang pendingin ruangan. Alana arga biaya listrik disi. Songon on ma na didok si Jonathan na karejo di RTO i, “Tikki musim dingin, dipakke hami ma salimut dohot baju panas na hapal. Jala tikki musim panas, dibukka hami ma sude jandela.”

Jadi di taon 2024 dipasang ma sistem panel surya di RTO on. Habis do 21. 480 dolar AS (hira-hira 353 juta rupiah) lao mamasang sistem on. Alai boi do biaya listrik na dihemat saleleng 5 taon manutup biaya mamasang sistem on. Saonari nga boi be akka dongan mamakke penghangat manang pendingin ruangan. Didok si Jonathan, “Saonari nga tabo be hami karejo jala nga lobi nyaman. Las do muse rohanami mangida cara ni organisasi menghemat dana sumbangan, na so manegai lingkungan.”

Manappung jala Mamakke Aek Udan

Di piga-piga Bale Harajaon di Afrika, dang adong aekna disi. Jadi ikkon mamboan aek do akka dongan piga-piga kilometer, asa adong aek di Bale Harajaon ni nasida. Di tempat na asing, ikkon manuhor aek ma akka donganta sian truk panggadis aek. Alai arga hian do i jala boi do i manegai lingkungan.

Jadi asa adong aek, dipasang hami ma talang ni aek dohot tangki ni aek na balga di akka Bale Harajaon na adong di Afrika. Alai sebelum dipasang hami i, jolo diparsiajari akka dongan ma cuaca dohot iklim di ganup daerah. Hira-hira 600 sahat tu 3.000 dolar AS (10 sahat 49 juta rupiah) ma biaya lao mamasang talang dohot tangki ni aek i. Alai gabe moru ma biaya operasional ni akka Bale Harajaon ala dang porlu be nasida manuhor aek.

Godang hian do manfaat ni on tu akka donganta. Misalna songon on ma na didok si Noemia sian Mozambik, “Najolo ikkon dao do hami mardalan lao mambuat aek jala mamboan i muse tu Bale Harajaon. Jadi nga loja jala hosa-hosa iba sahat di Bale Harajaon. Ala maol muse mangalului aek, maol ma hami lao paiasson manang aha pe. Saonari, nga boi be hami sude manucci tangannami. Jala dang hosa-hosa be iba sahat di Bale Harajaon. Mauliate godang ma di hamu!”

Sian dia do hepeng na dipakke organisasinami lao membiayai on sude? Sian sumbangan ni akka dongan na adong di liat portibi on, na dilehon marhite marragam cara songon na dipaboa di donate.jw.org. Mauliate godang ma di kemurahan hatimuna!