1 Samuel
27 Alai, didok si Daud ma di bagasan rohana, “Olo do ra pamateon ni si Saul au. Tumagon ma lao+ au tu huta ni halak Palistim asa malua au. Jala asa unang sai dilului ibana au di huta ni halak Israel.”+ 2 Alani i, lao ma si Daud rap dohot 600 tentarana+ tu kota Gat mandapotton Raja Akis,+ anak ni si Maok. 3 Jadi tinggal ma si Daud dohot si Akis di Gat. Dohot do akka tentarana tinggal disi, jala diboan nasida do akka keluargana. Diboan si Daud do istrina na dua i, si Ahinoam+ halak Jisreel i dohot si Abigail+ halak Karmel istri ni si Nabal hian. 4 Dung dibege si Saul naung lari si Daud tu Gat, dang dilului ibana be si Daud.+
5 Didok si Daud ma tu si Akis, “Molo denggan di roha ni tuan, lehon ma di au sada sian kotamon lao gabe inganakku. Unang pola rap tinggal naposomon dohot raja i di kota on.” 6 Di ari i, dilehon Raja Akis ma kota Ziklag+ tu si Daud. Alani i ma gabe appuna ni akka raja ni Juda kota Ziklag sahat tu sadari on.
7 Sataon opat bulan ma lelengna si Daud tinggal di kota ni halak Palistim.+ 8 Lao do si Daud dohot akka tentarana marporang tu Telam, tu Sur,+ sahat tu Mesir. Ditaluhon nasida do pangisi ni luat i, i ma halak Gesur,+ halak Girsi, dohot halak Amalek.+ 9 Tikki na marporang i ibana, dipamate ibana do sude pangisi ni luat i, bawa dohot borua.+ Alai dibuat ibana do hambing, biru-biru, lombu, halode, unta, dohot akka pakkean ni nasida. Dung i, mulak ma si Daud tu kota ni Raja Akis. 10 Molo disukkun Raja Akis tu si Daud, “Didia do ho marporang sadari on?” Dialusi si Daud ma, “Di sabola selatan ni* huta ni marga Juda.”+ Manang dohononna ma, “Di sabola selatan ni huta ni halak Jerahmeel.”+ Manang dohononna ma, “Di sabola selatan ni huta ni halak Keni.”+ 11 Dipamate si Daud do sude pangisi ni huta i, bawa nang borua. Alani i, dang adong halak na diboan ibana tu Gat. Ai didok si Daud do, “Asa unang adong na paboahon na taulahon i. Ai dohonon ni nasida ma annon, ‘Songon on do dibahen si Daud.’” (Songon i ma na diulahon si Daud saleleng tinggal ibana di kota ni halak Palistim.) 12 Gabe porsea ma Raja Akis tu si Daud. Ai didok rohana do, ‘Gabe parkarejokku nama ibana saleleng ni lelengna, ai nungnga sogo roha ni halak Israel tu ibana.’