1 Samuel

31 Marporang ma halak Palistim mangalo halak Israel.+ Godang ma halak Israel na dipamate di Dolok Gilboa, alani i lari ma nasida sian halak Palistim.+ 2 Alai torus ma dilele halak Palistim si Saul dohot akka anakna. Dipamate nasida ma si Jonatan,+ si Abinadab, dohot si Malki-sua, i ma akka anak ni si Saul.+ 3 Lam borat ma parporangan i di si Saul. Diida tentara ni halak Palistim ma ibana, gabe dipanah ma ibana jala massai godang ma lukka ni si Saul.+ 4 Dung i, didok si Saul ma tu halak na mamboan sinjatana, “Sittak ma podangmi jala tikkam ma au, asa unang disiksa jala ditikkam halak na so marsunat i au.”+ Alai, dang olo halak na mamboan sinjatana i mangulahon i. Mabiar situtu do ibana. Gabe dibuat si Saul ma podangna jala ditikkam ma dirina.+ 5 Dung diida siboan sinjatana i naung mate si Saul,+ ditikkam ibana ma dirina, gabe mate ma ibana. 6 Di ari i, mate ma si Saul, anakna na tolu i, siboan sinjatana, dohot sude tentarana na rap dohot ibana.+ 7 Diida halak Israel na di rura dohot na di Sunge Jordan ma naung lari akka tentara ni halak Israel. Diida nasida do muse naung mate si Saul dohot akka anakna. Gabe ditinggalhon nasida ma huta i.+ Ujungna, ro ma halak Palistim tusi jala tinggal ma nasida disi.

8 Marsogotna i, ro ma halak Palistim naeng mambuat pakkean dohot sinjata ni akka tentara naung mate i. Diida nasida ma bakke ni si Saul dohot bakke ni anakna na tolu i di Dolok Gilboa.+ 9 Diponggol nasida ma ulu ni si Saul jala dibuat ma sinjatana. Disuru nasida ma halak lao tu sude luat ni halak Palistim paboahon barita i.+ Dipaboa nasida ma i di inganan ni akka debata ni nasida+ dohot di jolo ni halak Palistim. 10 Dibahen nasida ma sinjata ni si Saul i di inganan ni nasida manomba akka patung Astarot. Jala digattukkon nasida ma bakkena di tembok ni kota Bet-sean.+ 11 Tikki dibege pangisi ni huta Jabes-gilead+ na binahen ni halak Palistim tu si Saul, 12 lao ma sude tentara ni nasida tu Bet-sean. Mardalan do nasida saborngin manipat. Dung i, dibuat nasida ma bakke ni si Saul dohot akka anakna i sian tembok ni kota Bet-sean. Diboan nasida ma i tu Jabes jala ditutung ma disi. 13 Dibuat nasida ma akka holi-holina.+ Dikuburhon nasida ma i di toru ni hau tamariska na di Jabes,+ jala marpuasa ma nasida saleleng pitu ari.