1 Samuel
6 Saleleng pitu bulan ma poti parpadanan+ ni Jahowa di huta ni halak Palistim. 2 Dijou halak Palistim ma akka malim dohot akka datu.+ Disukkun ma tu nasida, “Songon dia nama bahenotta tu poti parpadanan ni Jahowa on? Paboa ma tu hami songon dia paulakkon i tu halak Israel.” 3 Dialusi nasida ma, “Molo naeng paulakonmuna do poti parpadanan ni Jahowa, Debata ni Israel i, ikkon dohot do lehononmuna pelean. Lehon hamu ma pelean alani hasalaanmuna,+ asa malum hamu jala asa diboto hamu boasa sai dihukum Ibana dope hamu.” 4 Didok halak Palistim i ma, “Aha ma pelean na lao lehononnami alani hasalaannami?” Didok nasida ma, “Songon godang ni pamimpin ni halak Palistim,+ lehon hamu ma lima patung ambeien na sian mas dohot lima patung bagudung na sian mas. Ai sarupa do na masa tu hamu dohot tu akka pamimpinmuna. 5 Bahen hamu ma patung ambeien dohot patung bagudung+ na manegai ladangmuna. Jala ikkon pasangaponmuna do Debata ni Israel. Molo dibahen hamu songon i, ra dang hukumonna be hamu, debatamuna, dohot ladangmuna.+ 6 Boasa ma sai jogal rukkungmuna songon halak Mesir dohot si Firaun?+ Ai dung dihukum Debata nasida,+ gabe dipaloas do lao halak Israel sian Mesir.+ 7 Saonari, parade ma gerobak na baru dohot dua induk ni lombu na so hea dope mamboan boban.* Jala ikkat ma gerobak i tu lombu i, alai boan hamu ma mulak akka anak ni lombu i. 8 Bahen ma poti parpadanan ni Jahowa i tu gerobak i. Jala peakkon ma di labbungna kotak na marisi patung mas na lao gabe pelean alani hasalaanmuna.+ Dung i suru ma lao akka lombu i. 9 Jala parrohahon ma on: Molo tu dalan na lao tu Bet-semes+ do akka lombu i lao, tu inganan ni poti parpadanan i hian, taboto ma Debata ni Israel do na mambahen hasusaan on tu hita. Alai molo dang tusi, dang Ibana na mambahen hasusaan i, na ikkon masa hian do i tu hita.”
10 Songon i ma diulahon akka halak Palistim i. Dibuat nasida ma dua induk ni lombu, diikkatton nasida ma i tu gerobak, jala diboan nasida ma mulak akka anak ni lombu i. 11 Dung i dibahen nasida ma poti parpadanan ni Jahowa tu bagasan ni gerobak i. Dibahen nasida do muse tusi kotak na marisi akka patung bagudung na sian mas dohot patung ambeien na sian mas. 12 Dung i torus ma mardalan akka lombu i tu dalan na lao tu Bet-semes.+ Mardalan do akka lombu i huhut marsoara jala dang manirpang tu kiri manang tu kanan. Sai diihutton akka pamimpin ni halak Palistim i do sian pudi akka lombu i sahat tu parbatasan ni Bet-semes. 13 Tikki i, mamanen gandum do halak Bet-semes di rura. Tikki diida nasida poti parpadanan i, las hian ma roha ni nasida. 14 Sahat ma akka lombu na mamboan gerobak i di ladang ni si Josua, halak Bet-semes i. Jala so ma i di jonok ni sada batu na balga. Dung i, diponggoli nasida ma hau ni gerobak i, jala dipelehon ma akka lombu i+ gabe pelean situtungon tu Jahowa.
15 Dipaturun halak Lepi+ ma poti parpadanan ni Jahowa i dohot kotak na di labbungna na marisi akka patung na sian mas. Jala dibahen ma i sude di ginjang ni batu na balga i. Laos di ari i, dilehon halak Bet-semes+ ma pelean situtungon dohot pelean na asing tu Jahowa.
16 Diida pamimpin ni Palistim na lima i do na masa i. Dung i, mulak ma nasida tu Ekron di ari i. 17 On ma patung ambeien na sian mas na dikirim halak Palistim lao gabe pelean alani hasalaan ni nasida tu Jahowa:+ Sada sian Asdod,+ sada sian Gasa, sada sian Askelon, sada sian Gat,+ jala sada nai sian Ekron.+ 18 Godang ni patung bagudung na sian mas dos songon godang ni akka kota ni halak Palistim na nirajaan ni lima pamimpin. Dohot ma i akka kota na martembok dohot huta na so martembok.
Adong dope batu na balga inganan ni nasida mameakkon poti parpadanan ni Jahowa i di ladang ni si Josua halak Bet-semes i. Jala batu i ma na gabe saksi sahat tu sadari on. 19 Alai, dipamate Debata do akka halak Bet-semes, ala diida nasida poti parpadanan ni Jahowa. Dipamate Ibana do 50.070 halak* sian nasida. Gabe lungun ma roha ni nasida ala godang na dipamate Jahowa.+ 20 Dung i disukkun halak Bet-semes i ma, “Ise ma na boi jongjong di jolo ni Jahowa Debata na badia on?+ Na so boi do tadikkononna hita jala lao tu na asing?”+ 21 Disuru nasida ma halak borhat tu Kiriat-jearim,+ jala didok ma tu pangisi ni kota i, “Nungnga dipaulak halak Palistim poti parpadanan ni Jahowa. Ro ma hamu mangalap i.”+