1 Samuel
7 Dung i, ro ma halak Kiriat-jearim jala diboan nasida ma poti parpadanan ni Jahowa tu jabu ni si Abinadab+ na adong di dolok-dolok. Dipabadia nasida ma si Eleasar anak ni si Abinadab i lao manjaga poti parpadanan ni Jahowa.
2 Dung salpu 20 taon diboan ma poti parpadanan i tu Kiriat-jearim. Dipangido halak Israel ma tu Jahowa asa diurupi nasida.*+ 3 Dung i didok si Samuel ma tu sude halak Israel, “Molo sian nasa rohamuna do hamu mulak tu Jahowa,+ bolokkon hamu ma akka debata na asing+ dohot akka patung Astarot+ sian tonga-tongamuna. Lehon hamu ma nasa rohamuna tu Jahowa jala holan Ibana ma somba hamu.+ Dung i, paluaonna ma hamu sian tangan ni halak Palistim.”+ 4 Gabe dibolokkon halak Israel ma akka patung Baal dohot Astarot, jala holan Jahowa ma na disomba nasida.+
5 Didok si Samuel ma muse, “Marpungu ma hamu sude halak Israel di Mispa,+ asa hutangiakkon hamu tu Jahowa.”+ 6 Marpungu ma nasida di Mispa. Dibuat nasida ma aek jala diusehon ma i di jolo ni Jahowa. Dung i, marpuasa ma nasida di na sadari i.+ Didok nasida ma disi, “Nungnga mardosa hami tu Jahowa.”+ Mulai sian i, gabe panguhum+ ma si Samuel tu halak Israel di Mispa.
7 Tikki dibege halak Palistim na marpungu halak Israel di Mispa, ro ma akka pamimpin ni halak Palistim+ mangalo halak Israel. Mambege i, gabe mabiar ma halak Israel. 8 Dung i didok halak Israel ma tu si Samuel, “Torus ma pangido tu Jahowa Debatanta i asa diurupi hita+ jala asa dipalua hita sian tangan ni halak Palistim.” 9 Dibuat si Samuel ma sada anak ni biru-biru jala dipelehon ma i sude gabe pelean situtungon+ tu Jahowa. Dipangido si Samuel ma tu Jahowa asa diurupi halak Israel, jala dialusi Jahowa do ibana.+ 10 Tikki dilehon si Samuel pelean situtungon i, ro ma halak Palistim mangalo halak Israel. Alai dibahen Jahowa ma makkuling ronggur na massai gogo+ di na sadari i lao mangalo halak Palistim. Gabe gaor+ ma nasida dibahen Ibana jala gabe ditaluhon halak Israel ma nasida.+ 11 Kaluar ma halak Israel sian Mispa. Dilele jala dipamate nasida ma halak Palistim sahat tu sabola selatan ni Bet-kar. 12 Dung i dibuat si Samuel ma sada batu.+ Dibahen ma i di holang-kolang ni Mispa dohot Jesana, jala dibahen ma goarna Ebeneser.* Ai didok ibana do, “Diurupi Jahowa do hita sahat tu saonari.”+ 13 Songon i ma halak Palistim ditaluhon, jala dang hea be nasida ro tu inganan ni halak Israel.+ Sai dialo Jahowa do halak Palistim saleleng mangolu si Samuel.+ 14 Asing ni i, dipaulak do akka kota na dibuat ni halak Palistim sian halak Israel mulai sian Ekron sahat tu Gat. Gabe mulak ma sude tano ni halak Israel na binuat ni halak Palistim.
Di tikki i, mardame do halak Israel dohot halak Amori.+
15 Torus do si Samuel gabe panguhum ni halak Israel saleleng ngoluna.+ 16 Ganup taon, lao do si Samuel tu kota Betel,+ tu kota Gilgal,+ dohot tu kota Mispa.+ Gabe panguhum ma ibana tu halak Israel di sude inganan i. 17 Alai sai mulak do ibana tu kota Rama,+ ai disi do jabuna. Jala disi pe, gabe panguhum ni halak Israel do ibana. Dipajongjong ibana do disi sada langgatan tu Jahowa.+