1 Samuel

8 Dung matua si Samuel, dipillit ibana ma akka anakna gabe panguhum ni halak Israel. 2 Goar ni anakna siakkangan si Joel jala anakna na paduahon si Abia.+ Gabe panguhum do nasida di Ber-seba. 3 Alai dang diihutton akka anakna i na binahenna. Dipakke nasida do cara na so jujur lao mandapot hepeng.+ Olo do nasida disogok+ jala dang sittong nasida tikki mangadili.+

4 Marpungu ma sude pangituai* ni halak Israel jala lao ma nasida mandapotton si Samuel di Rama. 5 Didok nasida ma, “Nungnga matua be ho. Hape dang diihutton akka anakmu na binahenmu. Saonari, pillit ma di hami sada raja lao gabe panguhum di hami songon akka bangso na asing.”+ 6 Alai dang lomo roha ni si Samuel tikki didok nasida, “Pillit ma di hami sada raja lao gabe panguhum di hami.” Dung i, martangiang ma si Samuel tu Jahowa. 7 Jala didok Jahowa ma tu si Samuel, “Tangihon ma sude na nidok ni nasida. Dang ho na ditolak nasida, alai Au do. Ditolak nasida do Au gabe raja ni nasida.+ 8 Songon i do torus diulahon nasida mulai na huboan nasida kaluar sian Mesir sahat tu sadari on. Sai ditinggalhon nasida do Au,+ jala disomba nasida do akka debata na asing.+ Laos songon i do muse dibahen nasida tu ho. 9 Tangihon ma nasida, alai denggan ma pasingot nasida. Paboa ma akka aha na lao bahenon ni raja na mamaretta nasida.”

10 Dung i dipaboa si Samuel ma sude hata ni Jahowa tu akka halak na mangido raja. 11 Didok ibana ma, “Marhak do raja na mamaretta hamu mangulahon akka on tu hamu:+ Buatonna ma akka anakmu+ lao bahenonna mamboan kareta porangna.+ Bahenonna ma nasida gabe tentarana na marhoda,+ jala adong do sian nasida na disuru marlojong di jolo ni akka kareta porangna. 12 Pillitonna do muse pamimpin ni 1.000 halak+ dohot pamimpin ni 50 halak.+ Adong do na lao mambajak haumana+ dohot na mamanen.+ Jala adong do na mambahen akka sinjata porangna dohot perlengkapan kareta porangna.+ 13 Buatonna ma akka borumuna lao suruonna mambahen miak na angur,* mangaloppa, dohot mambahen roti.+ 14 Buatonna ma hasil ni ladangmuna na dumenggan, hasil ni ladang anggurmuna, dohot hasil ni ladang jetunmuna.+ Lehononna ma i tu akka parkarejona. 15 Buatonna ma saparsappulu sian hasil ni ladangmuna dohot sian hasil ni ladang anggurmuna. Lehononna ma i tu akka pejabatna dohot tu akka parkarejona. 16 Buatonna ma akka parkarejomuna bawa nang borua. Buatonna ma akka binatang na dumenggan na dipiaro hamu dohot akka halodemuna lao pakkeonna karejo.+ 17 Buatonna ma saparsappulu sian akka biru-birumuna+ jala bahenonna ma hamu gabe hatobanna. 18 Dung i, mangangguki ma hamu alani raja na pinillitmuna i.+ Alai dang olo be Jahowa manangihon hamu di tikki i.”

19 Nang pe songon i, dang olo bangso i manangihon hata ni si Samuel. Didok nasida do, “Agia pe songon i ikkon adong do rajanami, 20 asa dos hami songon sude bangso na asing. Rajanami i ma na gabe panguhum di hami, gabe pamimpinnami, dohot na marporang di hami.” 21 Dung dibege si Samuel sude na nidok ni bangso i, dipaboa ibana ma i muse tu Jahowa. 22 Didok Jahowa ma tu si Samuel, “Tangihon ma nasida. Pillit ma sada raja na lao mamaretta nasida.”+ Dung i didok si Samuel ma tu halak Israel i, “Mulak ma hamu tu kotamuna be.”