1 Samuel
10 Dung i dibuat si Samuel ma botol na marisi miak jala diusehon ma i tu ulu ni si Saul.+ Diumma si Samuel ma ibana jala didok ma, “Nungnga dipillit* Jahowa be ho gabe pamimpin+ ni bangsona.+ 2 Molo dung ditadikkon ho au sadari on manorusson pardalananmu, pajuppang ma ho dohot dua bawa di jonok ni kuburan ni si Rahel+ di Selsa na di huta ni marga Benjamin. Dokkonon ni nasida ma tu ho, ‘Nungnga dapot akka halode na niluluanmi. Alani i, dang marsak be bapakmu mamikkiri i.+ Alai saonari, marsak do bapakmu mamikkiri ho, ai ninna do, “Boha nama i anakki?”’ 3 Sian i, mardalan ma ho torus sahat tu hau na balga na di Tabor. Pajuppang ma ho disi dohot tolu bawa na naeng lao manomba Debata na sittong tu Betel.+ Sahalak sian nasida mamboan tolu anak ni hambing. Na sahalak nai mamboan tolu roti. Jala na sada nai mamboan anggur sagucci na balga. 4 Sukkunon ni nasida ma kabarmu, jala lehonon ni nasida ma dua roti tu ho. Jalo ma roti i sian nasida. 5 Molo dung sahat ho di dolok ni Debata na sittong, idaonmu ma disi sapunguan tentara ni halak Palistim. Jala dung sahat ho di kota, pajuppang ma ho annon dohot sapunguan panurirang* na turun sian dolok-dolok. Adong do di jolo ni akka panurirang i akka halak na mamboan alat musik na martali, rebana,* suling, dohot harpa. Tikki manurirangi akka panurirang i, marmusik do akka halak na mamboan alat musik i. 6 Dung i songgop ma tondi parbadia ni Jahowa tu ho,+ gabe manurirangi ma ho rap dohot nasida, jala gabe songon jolma na asing ma ho.+ 7 Molo dung masa sude tanda i, ulahon ma manang aha pe na denggan di roham. Ai didongani Debata na sittong do ho. 8 Jala lao ma ho tu Gilgal,+ ro pe au mandapotton ho tusi lao mamelehon pelean situtungon dohot pelean pardamean.* Paima ma disi pitu ari sahat tu na ro au. Dung i, paboaokku ma tu ho aha na ikkon ulahononmu.”
9 Disi lao si Saul maninggalhon si Samuel, dipauba Debata ma roha ni si Saul jala masa ma sude akka tanda i di ari i. 10 Dung i borhat ma si Saul dohot parkarejona tu dolok-dolok, jala pajuppang dohot sapunguan panurirang. Laos di tikki i, songgop ma tondi parbadia ni Debata tu si Saul+ jala manurirangi ma ibana+ di tonga-tonga ni nasida. 11 Sukkun-sukkun do roha ni halak na mananda si Saul, tikki diida nasida ibana manurirangi rap dohot akka panurirang. Didok nasida ma, “Aha do na masa tu anak ni si Kis on? Na dohot do si Saul gabe panurirang?” 12 Adong ma sahalak sian nasida mandok, “Attong boha do akka panurirang na asing i? Ise do bapak ni nasida?” Alani i ma gabe jotjot didok halak,* “Na dohot do si Saul gabe panurirang?”+
13 Dung sae si Saul manurirangi, lao ma ibana tu dolok-dolok. 14 Didok sahalak sian keluarga ni bapakna ma tu si Saul dohot tu parkarejona i, “Ai na sian dia do hamu?” Dialusi ibana ma, “Na mangalului akka halode i do hami.+ Alai ala dang dapotnami, gabe lao ma hami manjuppangi si Samuel.” 15 Didok keluarga ni bapakna i ma, “Jadi, aha ma didok si Samuel tu hamu? Paboa ma jo tu au.” 16 Dialusi si Saul ma, “Didok ibana nungnga dapot akka halode i.” Alai dang dipaboa si Saul hata ni si Samuel taringot na lao gabe raja ibana.
17 Dung i, dijou si Samuel ma bangso Israel asa marpungu nasida di jolo ni Jahowa di Mispa.+ 18 Jala didok si Samuel ma tu nasida, “Songon on do hata ni Jahowa Debata ni Israel, ‘Au do na mamboan halak Israel kaluar sian Mesir. Au do na paluahon hamu sian tangan ni halak Mesir+ dohot sian tangan ni sude harajaon na mambahen hamu susa. 19 Alai saonari, nungnga ditolak hamu be Debatamuna,+ na paluahon hamu sian sude parsoalan dohot hasusaanmuna. Didok hamu do, “Ikkon pillitonmu do sahalak raja lao mamaretta hami.” Alani i, jongjong ma hamu di jolo ni Jahowa, na sasamarga dohot na sasakeluarga.’”*
20 Disuru si Samuel ma asa maju sada-sada marga ni Israel,+ jala tarpillit ma marga Benjamin.+ 21 Dung i dijou si Samuel ma asa maju akka keluarga na sian marga Benjamin. Tarpillit ma keluarga ni si Matris. Jala ujungna, tarpillit ma si Saul anak ni si Kis.+ Jadi dilului nasida ma si Saul, alai dang dapot ni nasida. 22 Alani i, disukkun nasida ma Jahowa,+ “Na so ro dope ibana tuson?” Dialusi Jahowa ma, “Na martabuni do ibana disan, di tonga-tonga ni akka barang.” 23 Marlojong ma nasida jala dialap ma si Saul sian i. Tikki jongjong ibana di tonga-tonga ni bangso i, untimbo do ibana sian nasida sude. Ai holan nasa pundakna do nasida sude.+ 24 Didok si Samuel ma tu bangso i, “Ida hamu ma halak na pinillit ni Jahowa on.+ Dang adong na songon ibana di tonga-tonga ni bangso on.” Dung i, marsurak ma sude bangso i mandok, “Sai ganjang ma umur ni raja i!”
25 Dipaboa si Samuel ma tu bangso i akka hak ni raja.+ Disuratton ma i di sada bukku jala disippan ma i di jolo ni Jahowa. Dung i, disuru si Samuel ma mulak bangso i tu jabuna be. 26 Jala si Saul pe mulak do tu jabuna di Gibea. Dohot do akka tentara mandongani ibana, ai nungnga dibukka Jahowa roha ni nasida lao mandongani ibana. 27 Alai adong ma manang na piga halak na so hasea na mandok, “Dia ma boi ibana paluahon hita?”+ Leas do roha ni nasida mangida ibana jala dang adong dilehon nasida hadiah tu ibana.+ Alai dang adong didok si Saul manang aha tu nasida.