Job
5 “Manggora ma jo ho! Adong do na mangalusi?
Tu suru-suruan* na dia ma ho mangalu-alu?
2 Ai boi do haccit ni roha mambunu halak na oto,
Jala boi do late ni roha pamatehon halak na mura dioto-otoi.
3 Hea do huida marhasil halak na oto,
Alai toppu ma ro jea tu jabuna.
4 Torus do akka anakna marjea,
Jala dipaila do nasida di gerbang ni kota,+ so adong na mangurupi.
5 Allangon ni halak na male ma hasil ni panenna,
Gariada na di suga-suga pe buatonna do,
Jala dirampok ma arta ni nasida.
6 Ai dang sian orbuk tubu na jahat,
Jala dang sian tano ro hasusaan.
7 Ai na lao susa do jolma ditubuhon,
Songon api na pasti mamiltiki tu ginjang.
8 Alai anggo au, tu Debata do au mangalu-alu,
Jala tu Debata do hupasahat parsoalakku,
9 Tu Debata na mambahen akka ulaon na balga jala na palongang roha,
Na so habilangan tanda halonganganna.*
10 Diparo Ibana do udan tu tano on
Jala dibahen do maraek akka ladang.
11 Dipatimbo Ibana do halak na lea,
Jala dipalua Ibana do halak na mandele.
12 Disundati Ibana do sakkap ni halak na licik,
Asa unang marhasil na niula ni nasida.
13 Dijorat Debata do halak na bisuk di bagasan akkal ni nasida,+
Gabe dang saut be sakkap ni nasida.
14 Golap do diida nasida nang pe tonga ari,
Jala dadap-dadap do nasida tikki arian songon di tikki borngin.
15 Dipalua Ibana do nasida sian dila ni halak na songon podang,
Paluaonna do na pogos sian tangan ni halak na gogo,
16 Gabe adong ma na dipaima-ima ni halak na lea,*
Alai ditutup Ibana do baba ni halak na jahat.
17 Marlas ni roha ma halak na dipasingot Debata.
Alani i unang ma alo pissang-pissang ni Pargogo na So Hatudosan i!
18 Boi do Debata mambahen lukka, alai diubati Ibana do i.
Boi do Ibana mamonggolhon, alai laos tanganna do pamaluppon.
19 Nang pe onom hali ho hona jea, paluaonna do ho
Gariada dang hona tu ho jea na papituhon.
20 Saleleng masa haraparon, paluaonna do ho sian hamatean,
Tikki masa porang, paluaonna do ho sian podang.
21 Jagaon ni Debata do ho sian hata na posi,+
Jala dang mabiar be ho molo ro hamagoan.
22 Dang holsoan be ho molo masa haraparon dohot jea,
Dang mabiar be ho tu akka binatang buas.
23 Dang susa be ho bahenon ni* batu na di ladang,
Jala mardame ma binatang buas na disi dohot ho.
24 Sonang* ma dihilala ho di kemahmu,
Jala tikki dipareso ho inganan parmahananmu, dang adong na mago.
25 Gabe godang ma anakkonmu,
Jala songon suan-suanan na di tano on ma godang ni pinopparmu.
26 Dang suda gogo dope ho tikki mate,
Songon gandum na dipapungu tikki panen.
27 Ida ma! Nungnga hupareso hami on sude, jala i do na masa.
Tangihon jala jalo ma i.”