Jeremia

42 Dung i, ro ma sude akka pamimpin ni tentara, si Johanan+ anak ni si Karea, si Jersania anak ni si Hosaya, dohot sude bangso i. Mulai sian na mora sahat tu na pogos, mulai sian na poso sahat tu na matua. 2 Didok nasida ma tu Panurirang* Jeremia, “Tolong ma jo, tangihon ma pangidoannami on. Martangiang ma jolo ho tu Jahowa Debatami. Pangido ma tudu-tudu lao di hami dohot di akka halak na tinggal on dope. Najolo, massai godang do hami. Alai saonari, saotik nama hami na mangolu+ songon na niidam. 3 Sai anggiat ma dipaboa Jahowa Debatami tu hami dalan na ikkon sidalanannami jala aha na ikkon diulahon hami.”

4 Didok Panurirang Jeremia i ma tu nasida, “Olo, martangiang pe au tu Jahowa Debatamuna i, songon na pinangidomuna. Manang aha pe na didok Jahowa, paboaokku do i tu hamu. Dang na lao tabunihonokku sian hamu nanggo sada hata pe.”

5 Didok nasida ma tu si Jeremia, “Jahowa ma na gabe saksi na sittong jala na setia di hami. Lok ma hona hukum hami molo dang diulahon hami sude na didok Jahowa Debatami marhite ho. 6 Ai nungnga dipangido hami ho lao mangido tudu-tudu lao di hami. Alani i, manang na denggan manang na roa pe na didok Jahowa Debatanami i tu hami, oloannami do hatana i. Denggan ma ngolunami molo dioloi hami hata ni Jahowa Debatanami i.”

7 Dung sappulu ari, makkatai ma muse Jahowa tu si Jeremia. 8 Alani i, dijou si Jeremia ma si Johanan anak ni si Karea, sude akka pamimpin ni tentara na rap dohot ibana dohot sude rakyat i, mulai sian na mora sahat tu na pogos, mulai sian na poso sahat tu na matua.+ 9 Didok ibana ma tu nasida, “Nungnga disuru hamu au lao pasahatton pangidoanmuna tu Jahowa Debata ni halak Israel. Songon on ma hatana, 10 ‘Molo toktong hamu tinggal di luat on, pajongjongokku ma hamu gabe sada bangso jala dang na lao huhancurhon hamu. Paloasokku ma hamu tinggal di luat on jala dang na lao usirokku hamu. Ai hupauba nama aha naung hutottuhon hian di rohakku* taringot tu hasusaan na lao sibahenokku tu hamu.+ 11 Unang pola mabiar hamu tu raja ni Babel na dihabiari hamu saleleng on.’+

“‘Unang pola mabiar hamu tu ibana,’ ninna Jahowa, ‘ai donganakku do hamu asa selamat hamu jala malua sian tanganna. 12 Patuduhonokku ma asi ni rohakku tu hamu,+ jala raja ni Babel pe asi ma rohana mangida hamu. Paloasonna ma hamu mulak tu luatmuna sandiri.

13 “‘Alai molo didok hamu do, “Daong, dang olo hami tinggal di luat on!” jala dang dioloi hamu hata ni Jahowa Debatamuna, 14 marhite mandok, “Dang olo hami. Lao nama hami tu Mesir.+ Ai di Mesir dang idaonnami be porang, dang begeonnami be soara ni tarompet lao marporang, jala dang hurangan roti hami disi. Disi nama hami tinggal,” 15 ale halak Juda na tinggal dope, tangihon hamu ma hata ni Jahowa. Ai molo didok hamu do songon i, songon on ma hata ni Jahowa Pamimpin ni Akka Tentara* Debata ni Israel, “Molo dijugulhon hamu do lao tu Mesir jala tinggal* disi, 16 ro ma podang na dihabiari hamu tu Mesir, jala masa ma haraparon na dihabiari hamu disi. Alani i, mate ma hamu di Mesir.+ 17 Jala sude halak na marjugul lao tu Mesir asa tinggal disi, mate ma alani podang, haraparon, dohot sahit na masa di godang inganan. Dang adong nanggo sada pe sian nasida na lao malua jala selamat sian jea na huparo tu nasida.”’

18 “Ai songon on do hata ni Jahowa Pamimpin ni Akka Tentara, Debata ni Israel, ‘Songon rimashu dohot murukku na huusehon tu penduduk ni Jerusalem,+ songon i ma rimashu huusehon tu hamu molo lao hamu tu Mesir. Dohonon ni halak ma goarmuna tikki mamburai, marlea ma hamu, jala direhei halak. Mabiar ma akka halak mangida na masa tu hamu,+ jala dang na lao idaonmuna be ingananmuna.’

19 “Ale halak Juda na mangolu dope, nungnga diorai Jahowa hamu asa unang lao tu Mesir. Unang ma lupa hamu naung hupasingot hamu sadari on, 20 molo diulahon hamu na sala, ikkon mate do hamu. Ai hamu do na marsuru au asa makkatai tu Jahowa Debatamuna i. Didok hamu do, ‘Martangiang ma jo ho tu Jahowa Debatanta i. Pangido ma tudu-tudu lao di hami. Paboa ma tu hami manang aha pe na didok Jahowa Debatanta i, pasti ulahononnami do i.’+ 21 Jala nungnga hupaboa tu hamu sadari on songon dia hatana. Alai dang dioloi hamu hata ni Jahowa Debatamuna i. Jala dang olo hamu mangulahon paretta na pinaboa ni Ibana tu hamu marhite au.+ 22 Alani i boto hamu ma, ikkon mate do hamu alani podang, haraparon, dohot sahit di inganan na lao sitopotonmuna lao gabe ingananmuna tinggal.”+