Harapan​—Tutu do Adong Pengaruhna?

SAPPULU taon dope umur ni si Daniel, alai nungnga marsahit kanker ibana saleleng sataon. Nga putus asa be dokterna, keluargana dohot akka donganna. Alai molo si Daniel dang songon i. Pos do rohana na boi do malum sahitna i. Jala molo dung malum sahitna i naeng gabe peneliti do ibana lao mangalului ubat ni sahit kanker. Tikki i, tarpaima do ibana ro sahalak dokter spesialis na mangubati sahit kankerna i. Hape toppu ma dipaboa na so boi ro dokter i alani cuaca buruk. Alani i, gabe marsak hian ma si Daniel. Jala i ma parjolo sahali ibana hea marsak dung marsahit. Piga-piga ari dukkon i, mate ma ibana.

Pengalaman ni si Daniel on diceritahon sahalak perawat na meneliti molo marsak hita manang adong na taharappon, adong do pengaruhna tu kesehatanta. Ra, hea do dibege hamu cerita na songon on. Contohna, adong sahalak naung matua nga naeng mate. Alai adong na solot di rohana na so saut dope, jala nga leleng i dipaima-ima ibana. Olo do ra adong na dipaima andorang so mate ibana. Manang adong ari na rikkot na dipaima ibana. Alai dung saut na di rohana i, mate ma ibana. Aha do na mambahen ibana boi toktong martahan andorang so saut na di rohana i? Tutu do adong pengaruhna tu kesehatanta molo adong na taharappon ikkon saut? Tutu do songon na didok akka halak, molo saut na di rohatta adong do pengaruhna tu hita?

Lam godang do peneliti kesehatan na mandok, molo pos rohatta, saut na taharappon jala las rohatta, balga do pengaruhna tu ngolu ni sasahalak dohot tu kesehatan ni sasahalak. Alai dang sude halak na setuju tu pandapot i. Adong do muse piga-piga peneliti na so setuju tu pandapot i jala didok roha ni nasida dang masuk akkal i. Didok nasida molo marsahit hita, memang na adong do masalah di dagingta.

Nungnga sian najolo godang halak na so porsea molo harapan i adong pengaruhna tu kesehatanta. Contohna ribuan taon naung salpu, tikki disukkun tu filsuf Junani na margoar si Aristoteles taringot lapatan ni harapan didok ibana do, “Dang tutu i, holan nipi do i.” Di tikkitta saonari on pe, adong halak na sian Amerika na margoar si Benjamin Franklin mandok, “Ala adong do harapan ni sasahalak umbahen mangolu ibana, alai molo dung mate mago do sude harapanna i.”

Molo songon i, aha do harapan i? Holan angan-angan do i? Manang cara ni halak do i lao menghibur nang pe holan nipi? Manang adong do alasan na patuduhon molo harapan i dang holan nipi? Manang adong do pengaruh ni harapan i tu kesehatanta na mambahen las rohatta jala adong do buktina dohot manfaatna?

Boasa Porlu di Hita Harapan?

SONGON si Daniel na marsahit kanker na diceritahon di awal artikel nakkin, na tutu do boi malum sahit kankerna i molo pos rohana boi malum jala saut ro dokter i? Manang boi do ibana toktong mangolu sahat tu saonari? Manang ise pe, pasti dang adong na barani mandok boi. Jadi sasittongna adong do manfaat ni harapan i. Alai dang na gabe obat na mujarab i na boi pamalumhon sude sahit.

Tikki diwawancarai Dr. Nathan Cherney di CBS News, didok ibana bahaya do molo palobihu harapan na tapaboa tu pasien naung parah sahitna. Didok ibana, “Takkas do diida hami dileai akka suami istrina. Didok nasida do molo istrina hurang mangarimangi manang hurang marpikkiran positif.” Didok Dr. Cherney muse, “Dirippu nasida do boi na marsahit i na mengendalihon perkembangan ni tumor manang kankerna. Jala dirippu nasida do molo lam parah sahitna i, na so do boi do dikendalihon na marsahit i tumorna i. Jadi dang masuk akkal i.”

Sasittongna halak naung parah sahitna, berjuang do mangalo sahitna i jala mamikkiri i. Pasti dang olo keluargana manang akka donganna manambai beban pikkiran ni akka halak sisongon i. Molo songon i, na so adong do lapatanna adong harapanta?

Dang songon i. Contohna, dokter na dipaboa nakkin na spesialis perawatan paliatif, i ma perawatan na holan lao mambahen las roha ni pasien asa boi dialo sahitna, dang na lao pamaluppon manang lao mambahen ganjang umurna. Porsea do dokter i, molo dibahen songon i boi do tenang pikkiran ni pasien i nang pe naung parah sahitna. Godang do bukti na patuduhon, molo adong harapan godang do manfaatna.

Arga do Harapan i

Sahalak wartawan medis Dr. W. Gifford-Jones mandok, “Harapan, i ma sada terapi na massai denggan.” Dibahen ibana do penelitian tu akka pasien naung marsahit parah lao mamboto aha do pengaruhna molo didukung nasida. Cara on boi mangurupi akka halak asa toktong mampartahatton sudut pandang na positif jala adong harapanna. Taon 1989 adong sada penelitian mandok molo akka pasien na didukung boi do ungganjang umurna. Alai na baru-baru on adong penelitian, dang boi dope dibuktihon nasida taringot i. Alai diakkui akka peneliti do, molo pasien na so didukung ummarsak jala umhaccit do dihilala nasida sian pasien na didukung.

Adong penelitian na asing na mangida taringot pengaruh ni marpikkiran na positif dohot na so marpikkiran positif tu penyakit jantung koroner (PJK). Adong lobi sian 1.300 bawa na diteliti lao mamboto, na marpikkiran positif do nasida di parngoluan on manang na dang. Sappulu taon dukkon i, dung diteliti muse adong ma 12 persen sian akka bawa i na hona PJK. Hasilna dua hali loppit ma godang ni halak na so marpikkiran positif na hona PJK sian halak na marpikkir positif. Si Laura Kubzansky, asisten profesor kesehatan dohot perilaku sosial di Fakultas Kesehatan Masyarakat Harvard mandok, “Godang do bukti na patuduhon, molo toktong ‘marpikkiran positif’ denggan do tu kesehatan. Penelitian medis patuduhon piga-piga bukti, adong do pengaruh ni marpikkiran positif tu penyakit jantung.”

Piga-piga penelitian tu akka halak na dioperasi mangida, molo halak na marpikkir dang na lao malum be sahitna i, ulleleng do malum nasida dung dioperasi, sian halak na marpikkir na boi do malum sahitna i. Jala adong do hubungan ni na marpikkiran positif tu umur na ganjang. Sada penelitian mangida, songon dia akka naung matua dipengaruhi pandangan na positif dohot na negatif taringot penuaan. Tikki dipaboa tu akka naung matua on, lam tamba do bisuk dohot pengalaman ni nasida molo lam matua, boi ma diida gabe lam gogo do nasida mardalan jala lam tamba do gogo ni nasida. Gogo ni nasida na tamba i, sarupa ma i tu na olahraga saleleng 12 minggu.

Boasa molo adong harapan, marpos ni roha jala tetap marpikkiran na positif adong manfaatna tu kesehatan? Dang takkas dope diboto ilmuwan dohot dokter taringot pikkiran dohot pamatang ni akka jolma. Jadi, dang boi dope dibahen nasida alus na pasti. Alai nang pe songon i, sian pengamatan ni akka pakar na meneliti pokok i, boi do dapot ni nasida alusna, alai dang pasti dope i. Contohna, sahalak profesor neurologi mandok, “Las hian do rohatta tikki sonang rohatta jala molo adong harapanta. Di tikki situasi sisongon i, gabe dang stres be hita jala hita pe boi ma gabe lam sehat. Jala on ma muse sada na boi diulahon akka halak asa boi toktong lam sehat.”

Piga-piga dokter, psikolog, dohot akka ilmuwan, ra pandapot na baru do on di nasida. Alai dang songon i molo di akka naposo ni Jahowa. Hira-hira 3.000 taon naung salpu, dilehon do bisuk tu Raja Salomo lao manurat pandapot na mandok, “Dos songon ubat na mambahen malum do las ni roha, Alai moru do gogo molo marsak roha.” (Poda 17:22) Dang na gabe palobihu na didok di ayat i. Dang didok di ayat i, molo las ni roha i boi mambahen malum sude sahit. Alai molo las roha, “dos songon ubat na mambahen malum” do i.

Sasittongna masuk akkal do molo tasukkun, molo ubat do harapan i dokter dia ma na so mambahen i gabe resep? Asing ni i, unggodang do manfaat ni harapan on sian akka na adong di dunia kesehatan.

Pos ni roha, na So Marpikkiran Positif, dohot Ngolutta

Akka peneliti mangida, molo akka halak na toktong marpikkiran positif, godang do mandapot manfaat ala toktong marpikkiran positif. Gabe undenggan do nasida di sikkola, di parkarejoan dohot di bidang atletik. Misalna, dibahen ma sada penelitian tu sada tim atletik na dibahen khusus tu akka borua. Dibahen akka pelatih ma penilaian tu kesanggupan atletik ni nasida. Di tikki na sarupa, disurvei ma muse akka borua i jala dinilai ma tingkat harapan ni nasida. Jadi, tingkat harapan ni akka atletik borua i, gabe sada dasar ma i lao mamboto songon dia hasil karejona annon, dibandingkon tu sude data naung dibahen akka pelatih na saleleng on. Boasa boi songon i pengaruh ni harapan i?

Godang do naung diparsiajari marhite meneliti imbar ni marpikkiran positif sian na so marpikkiran positif. Taon 1960-an, dibahen ma godang akka percobaan lao mamboto songon dia kebiasaan ni akka binatang. Alani i, gabe boi ma dibahen akka peneliti sada istilah, i ma “ketidakberdayaan yang dipelajari”. Gabe diboto akka peneliti i ma muse, molo di jolma pe adong do tong sindrom sisongon i. Contohna, dibahen ma percobaan tu jolma marhite soara na massai ribut. Jala dipaboa do tu nasida na boi do dipaso nasida soara na ribut i marhite menekan piga-piga tombol, jala berhasil do nasida pasohon soara na ribut i.

Sarupa do muse na dipaboa tu kelompok na paduahon. Nang pe ditekan nasida akka tombol i, alai tong do dang boi so soara na ribut i. Boi ma dibayakkon hamu, godang do sian kelompok na paduahon i na mandele. Tikki dibahen muse ujian na berikutna, dang barani nasida mambahen tindakan manang aha pe. Alana didok roha ni nasida, aha pe na diulahon nasida dang lao marhasil i. Alai adong do sian kelompok na paduahon i na tetap marpikkiran positif manang pos rohana jala dang menyerah nang pe hea gagal.

Dr. Martin Seligman na dohot merancang deba sian eksperimen na parjolo i, gabe taronjar ma rohana naeng dohot meneliti taringot marpikkiran positif dohot na so marpikkiran positif. Diselidiki ibana ma marragam cara marpikkir na dipatudu akka halak na memandang dirina dang margogo. Dibahen ibana ma kesimpulan, molo halak na hurang pos rohana tu dirina, gabe mangabbati nasida do lao mangulahon ulaonna siganup ari. Jala i mambahen nasida gabe dang margogo jala dang boi be nasida mangulahon manang aha pe. Dibahen ibana ma ringkasan taringot halak na hurang pos rohana tu dirina. Songon on ma didok ibana, “Penelitian saleleng dua puluh lima taon, paposson rohakku molo terbiasa hita porsea songon na diulahon akka halak na hurang pos rohana, molo hasusaan na tahilala alani salatta do. Dang na lao sae i. Jala boi do i mambahen sega sude akka na taulahon. Jala lam godang dope muse akka hasusaan na ro tu hita sian apala tetap hita marpikkiran positif.”

Di piga-piga halak saonari on, ra songon na baru do kesimpulan sisongon i. Alai nungnga somal i dibege akka naposo ni Debata. Parrohahon ma na didok di bukku poda, “Molo metmet roham tikki masa hasusaan, Moru ma gogom.” (Poda 24:10) Jadi takkas do didok di Bibel, molo sai marmetmet ni roha hita jala sai negatif pikkiranta, boi do i mambahen hita gabe dang margogo. Alai aha do boi diulahon hamu asa unang na so marpikkiran positif pikkiranmuna jala boi hamu toktong marpikkiran positif jala adong harapan di hamu?

[Gambar]

Adong do manfaatna marpos ni roha

Boi do Dialo Hamu Pikkiran na So Positif

SONGON dia do pakkilalaanmuna molo dang berhasil na diulahon hamu? Godang do pakar na porsea, alus na dibahen hamu tu sukkun-sukkun i patuduhon na marpikkiran positif do hamu manang na dang. Sude do hita hea mangadopi tantangan na borat, jala piga-piga sian hita unggodang do tantanganna sian na asing. Adong piga-piga halak na semangat muse dung mangadopi tantangan jala olo do ibana muse mencoba. Na asing gabe menyerah do dung mangadopi tantangan i, hape sebenarna dang pola borat tantangan i.

Uppamana, bayakkon ma hamu mangalului karejo. Diwawancarai ma hamu hape ditolak. Songon dia do pakkilalaanmuna dukkon i? Ra didok hamu tu dirimuna sandiri salelengna do haccit rohamuna i. Didok hamu ma tu dirimuna sandiri, ‘Dang adong na olo mambahen au karejo. Jala dang na lao adong dapottu karejo.’ Manang na umparah muse, boi do dibahen hamu kegagalanmuna i mempengaruhi pandanganmuna tu sude aspek ni ngolumuna. Jala gabe ro ma tu rohamuna, ‘Dang adong na boi huulahon manang aha pe. Dang marguna au manang tu ise pe.’ Sian dua kasus on patuduhon, cara marpikkir sisongon i patuduhon na so marpikkiran positif do hamuna.

Pasidikkon Pikkiran na So Positif

Songon dia do hamu boi pasidikkon i? Na parjolo ikkon taboto do akka na dia pikkiran na negatif. Dung i berupaya ma hamu lao pasidikkon i. Lului ma hatorangan na masuk akkal. Contohna, na tutu do dang adong na olo mambahen hamu karejo umbahen na so dijalo hamu karejo disi? Manang halak na ummalo sian hamu do na dilului bos i lao karejo disi?

Lului ma fakta na sebenarna lao patuduhon, molo pikkiranta na so marpikkiran positif i alani reaksitta na berlebihan do. Tikki ditolak hamu na tutu do hamu dang boi mangulahon manang aha pe? Manang boi do dipikkirhon hamu akka na berhasil diulahon hamu. Contohna parale-aleonmuna tu Debata, hubunganmuna tu keluarga manang tu donganmuna. Unang ma sai didok rohamuna dang adong manang aha pe na denggan naung diulahon hamu. Memang naung pasti do diboto hamu na lao so adong be dapotmuna karejo? Adong dope na boi diulahon hamu lao pasidikkon cara marpikkir na negatif.

Marpikkir Positif jala Lao Mamboto Aha Tujuanta

Piga-piga taon na parpudi on dipaboa akka peneliti do arti ni harapan nang pe dang apala takkas aha lapatanna. Didok nasida molo harapan i adong do hubunganna tu haporseaon, na sanggup do hamuna mangulahon sude aha tujuanmuna. Songon na lao dipaboa di artikel na mangihut, sebenarna harapan i godang do cakupanna. Alai lapatanna na dipaboa dison nga cukup di piga-piga aspek. Molo fokus do hita tu harapanta, boi ma hita diurupi lao patuduhon cara marpikkir na lebih positif, jala gabe taboto ma aha tujuanta.

Asa boi pos rohatta na boi do tapasaut akka tujuanta di ari na naeng ro, porlu do taparsiajari akka pengalaman taringot songon dia hita lao pasautton akka tujuanta i. Molo dang adong dope pengalamanmuna, ra boi do denggan dipikkirhon hamuna songon dia hamu lao pasautton tujuanmuna i. Na parjolo, aha do tujuanmuna? Alani godang ni akka ulaon, olo do ra dang tapikkirhon be aha na tahalomohon di ngolutta jala aha na urrikkot di ngolutta. Lao manottuhon aha do tujuanta, takkas do dipaboa di Bibel songon dia hita lao mamboto “dia na urrikkot”.​—Pilippi 1:​10.

Dung tatottuhon dia na urrikkot di ngolutta, gabe ummura ma hita mambahen tujuan di ngolutta. Uppamana, parale-aleonta tu Debata, tu keluarga dohot di parkarejoan. Alai, unang ma pittor pagodanghu tabahen tujuanta asa boi tapillit dia do tujuan na ummura taulahon. Alana molo adong tujuan i na maol taulahon boi do gabe metmet rohatta jala olo do gabe menyerah. Alani i porlu do tatottuhon akka tujuanta, na dia tujuan jangka panjang dohot na dia tujuan jangka pendek.

Adong sada pepatah na mandok, “Molo adong upaya di hita, pasti adong dalanna.” Molo nungnga tatottuhon aha do tujuanta na urrikot, ikkon berupaya do hita mangulahon i asa boi saut akka tujuanta i. Molo sai tapikkirhon do hasil ni tujuanta i, boi ma hita gabe marsitutu lao mangulahon i. Tottu sai adong do tantangan na ro. Alai, nang pe adong tantangan unang ma menyerah hita mangulahon i.

Alai porlu do tapikkirhon akka cara na mura taulahon lao pasautton tujuanta i. Sahalak pengarang na margoar si C. R. Snyder nungnga mambahen penelitian taringot nilai harapan. Didok ibana do jolo ikkon tapikkirhon do marragam cara asa boi tapasaut aha pe tujuanta. Molo nungnga tabahen songon i, nang pe dang marhasil cara na parjolo, boi ma tapakke cara na paduahon, patoluhon dohot cara na asing.

Didok si Snyder do muse asa marsiajar hita sadihari hita lao manguba sada tujuanta i tu tujuan na asing. Molo gagal do tujuan na tabahen i hape gabe sogo rohatta, on mambahen hita gabe marmetmet ni roha. Asing ni i, molo tauba do tujuanta na parjolo i tu tujuan na masuk akkal, gabe adong ma muse na taharappon.

Adong do contoh na dipaboa di Bibel taringot on. Contohna, Raja Daud na lomo rohana naeng mambangun bagas joro tu Debatana i ma Jahowa. Alai, didok Debata tu ibana anakna do na mambangun i, i ma si Salomo. Unang apala mandele manang gabe kecewa ibana ala dang saut na di rohana i, gabe dipauba si Daud ma tujuanna. Gabe dipapungu ibana do akka hepeng, akka bahan-bahan na lao dipakke anakna annon lao pasaehon proyek i.​—1 Raja-Raja 8:​17-​19; 1 Kronika 29:​3-7.

Nang pe nga marhasil hita pasautton harapanta i ala nga tapasiding pikkiran na so positif, alai olo do tahilala sae adong dope na hurang. Alana kecewa pe hita na di luar kendalitta do i. Molo sai tapikkiri do hasusaan na masa tu akka jolma, songon hapogoson, porang, ketidakadilan, sahit, hamatean, songon dia ma hita asa toktong mampartahatton harapanta?

[Gambar]

Molo dang dijalo hamu di sada parkarejoan na dihalomohon rohamuna, gabe didok rohamuna do na lao so adong be dapotmuna karejo?

[Gambar]

Dang dipaksahon Raja Daud na ikkon saut sude na dihalomohon rohana

Didia do Boi Dapotmuna

Harapan?

SEGA ma jam tanganmuna jala mate. Godang do cara na boi dipillit hamu lao padenggatton jam tanganmuna i. Godang do iklan na paboahon songon dia carana padenggatton jam tangan, alai dang sai sarupa cara na dipaboa di iklan i. Alai, songon dia molo diboto hamu tetanggamuna do na mambahen jam tangan i martaon-taon naung salpu. Jala tikki didok ibana olo do ibana padenggatton i jala gratis, pasti olo do hamu kan?

Dos songon jam tangan i ma harapanmuna. Molo gabe mago do harapanmuna songon akka halak saonari on, tudia do hamu mangalului asa diurupi? Godang do halak na mandok boi pasaehon masalah. Alai, ala pagodanghu na mangalehon saran, boi do mambahen hamu gabe bingung. Jala dang sai sarupa pandapot ni akka halak. Jadi boasa dang tu na manoppa hita lao asa mangido diurupi? Alana didok Bibel, “Sasittongna, dang dao Ibana sian ganup hita on” jala rade do Debata lao mangurupi hita.​—Ulaon ni Apostel 17:27; 1 Petrus 5:7.

Arti ni Harapan

Unggodang do hatorangan na dipaboa Bibel taringot harapan sian na dipaboa dokter, ilmuwan dohot psikologi saonari on. Bahasa asli na diterjemahon harapan di Bibel, dipaboa do lapatanna, i ma paimahon alani masihol, jala adong na denggan na dipaima. Harapan i adong dua bagian i ma, lomo ni roha tu akka na denggan dohot bukti na boi dihaporseai na lao adong na denggan lao masa di ari na naeng ro.

Harapan na dipaboa di Bibel dang holan hata-hata sambing. Alai adong do bukti na takkas na dipaboa taringot harapan i. Songon harapan na ikkon adong buktina, songon i do tong haporseaon. (Heber 11:1) Alai molo di Bibel asing do lapatan ni haporseaon dohot harapan.​—1 Korint 13:13.

Contohna: Molo dipangido hamu ale-alemuna mangurupi hamu, pasti pos do rohamuna urupanna do hamu. Pos do rohamuna tu ale-alemuna i ala na porsea do hamu tu ibana, jala ala nga takkas ditanda hamu ibana. Jala nungnga diida hamu adong akka na denggan na dibahen ibana tu hamu di tikki naung salpu. Adong do hubungan ni haporseaon dohot harapan. Alai beda do na dua on. Songon i do tong hamu tu Debata?

Dasar Harapan

Sian Debata do ro harapan na pasti. Di Bibel didok do Jahowa i “haposan ni Israel”. (Jeremia 14:⁠8) Harapan na pasti na diharappon naposo ni Debata ro sian Debata do i. Alani i, Ibana ma na gabe harapan ni naposona. Harapan sisongon on, dang sarupa songon angan-angan. Dilehon Debata do bukti na pasti tu nasida. Saleleng marratus taon Ibana dohot naposona sai dipasaut Ibana do janjina tu akka naposona. Si Josua na gabe pamimpin ni halak Israel mandok, “Takkas do diboto hamu . . . dang adong nanggo sada pe sian janji ni Jahowa Debatamuna i na so saut.”​—Josua 23:⁠14.

Nang pe nungnga marribu taon naung salpu i masa, toktong dope hata i marlakku sahat tu saonari. Godang do dipaboa di Bibel akka janji ni Debata na mambahen longang rohatta. Jala dipaboa do muse catatan sejarah na boi dihaporseai taringot akka janjina naung saut. Pos do roha tu sude akka janji ni Debata na lao masa di ari na naeng ro. Jala tikki disurat akka janjina i hira naung saut do tikki dipaboa Ibana janjina i.

I do alana didok molo Bibel i bukku harapan. Jadi tikki diparsiajari hamu sian Bibel songon dia Debata mangurupi jolma, lam pos ma rohamuna tu Ibana. Didok si Paulus, “Nasa na tarsurat hian, disurat do i lao mangajari hita asa taboto aha na lao paboaon ni Debata tu hita. Ai diurupi na tarsurat i do hita asa pos rohatta tu janji ni Debata, asa margogo, jala togu manaon sitaonon.”​—Rom 15:⁠4.

Aha do Harapan na Dilehon Debata tu Hita?

Tikki sadihari do hita porlu harapan i, holan tikki adong do bahaya? Jadi godangan halak tikki mate na dihaholongi nasida, hira na so adong be harapan. Asing ni hamatean, aha do muse na mambahen hita putus asa? Aha pe na tabahen, dang boi hita pasidikkon hamatean i. I do alana didok Bibel, hamatean i “musu na parpudi”.​—1 Korint 15:26.

Molo songon i, adong do harapan tu akka halak naung mate? Didok Bibel, hamatean i, i ma musu na parpudi na lao “ditaluhon”. Jahowa do umgogo sian hamatean. Jala nungnga godang bukti na dipatudu Ibana. Songon dia carana? Dipahehe Ibana do akka halak naung mate. Dipaboa do di Bibel dipakke Jahowa do huasona lao pahehehon halak naung mate. Adong do dipaboa sia halak na dipahehe sian hamatean.

Dilehon Jahowa do huaso tu Anakna Jesus lao pahehehon halak naung mate. Dipahehe Jesus do ale-alena na margoar si Lasarus naung mate saleleng opat ari. Jala dang sip-sip Jesus tikki mangulahon i. Alai, diulahon ibana do i di jolo ni godang halak.​—Johannes 11:38-48, 53; 12:9, 10.

Olo do gabe sukkun-sukkun rohatta, ‘Boasa ma dipahehe halak naung mate? Molo dipahehe, matua jala mate do annon muse?’ Toho do i. Alai, ala adong catatan taringot akka halak naung dipahehe, on mambahen las rohatta molo halak na tahaholongi boi muse mulak mangolu. Jala gabe bukti do on tu hita molo halak naung mate boi mulak mangolu muse. I do alana gabe adong harapan di hita.

Didok Jesus, “Au do haheheon dohot hangoluan.” (Johannes 11:25) Tu ibana do dilehon Jahowa huaso lao pahehehon akka halak naung mate haduan. Didok Jesus, “Na ro ma tikkina begeon ni saluhut na di kuburan i ma soarana [Kristus] jala kaluar ma nasida.” (Johannes 5:28, 29) Jadi sude akka halak naung mate boi do annon dipahehe lao mangolu di paradeiso.

Dipaboa panurirang Jesaya do songon dia taringot haheheon, “Mulak mangolu do muse akka jolma naung mate. Na lao hehe do bakke ni akka bangsokki. Hamu akka na tinggal di orbuk! Dungo ma hamu jala marsurak ma marlas ni roha,Nambur na dabu tu hamu dos songon nambur di tikki manogot, Jala pasombuon ni tano i ma mulak mangolu muse akka halak na so margogo mangalo hamatean.”​—Jesaya 26:19.

Tottu on mambahen las do rohatta. Nga di inganan na aman be halak naung mate i, dos songon poso-poso na di bagasan kandungan. Akka halak naung mate i, sai toktong do diingot Debata. (Lukas 20:37, 38) Jala satokkin nai, lao dipahehe do nasida di portibi na imbaru. Dos songon poso-poso na dipaima lao tubu, songon i ma tong akka halak naung mate dipaima akka keluargana be. Jadi tung pe adong hamatean, adong do harapan.

Aha do Manfaat ni Harapan

Godang do hatorangan taringot harapan na diajarhon si Paulus. Didok ibana do molo harapan i bagian na rikkot sian pertahanan haporseaon. Digombarhon ma i songon takkuluk bosi. (1 Tesalonik 5:⁠8) Lapatanna, tikki najolo didok Bibel molo sahalak tentara dipakke do takkuluk na sian logam tikki lao marporang. Biasana takkulukna i dilappis do dohot kain manang bahan sian kulit. Molo adong pe na naeng attuk tu ulu i, gabe dang hona be ulu i. Aha do na naeng dipaboa si Paulus? Songon takkuluk nakkin na boi manjaga ulu ni tentara i, dos songon i ma harapan na boi manjaga pikkiranta. Molo pos rohamuna tu sakkap ni Debata, boi do i mambahen dame pikkiranmuna manang gabe dang mandele be hamu nang pe adong sitaononmuna. Adong do sian hita na so porlu takkuluk sisongon i?

Lao patorakkon adong hubungan ni harapan on tu lomo ni roha ni Debata, dipakke si Paulus do muse tudosan na asing. Didok ibana, “Songon jangkar ni kapal do janji i di ngolutta na mambahen hita togu.” (Heber 6:19) Ala nungnga piga-piga hali si Paulus selamat tikki naeng lonong kapal na dituppangi ibana, gabe diboto ibana ma manfaat ni jangkar. Jadi tikki ro badai, pittor dipaturun parkapal i do jangkar ni kapal i. Molo nga sahat jangkar ni kapal i tu dasar ni laut jala pattik, gabe boi ma kapal i selamat sian badai jala dang tarsarat ombak jala dang manombom batu karang.

Suang songon i ma, molo janji ni Debata i sada harapan na pasti di hita jala na togu, boi ma harapan i mangurupi hita asa toktong martahan tikki masa akka hasusaan. Marjanji do Jahowa, satokkin nai lao pasoonna nama porang, hajahaton, arsak ni roha dohot hamatean. (Ida kotak di halaman 10) Molo pos do rohatta tu harapan i, boi do mambahen hita gabe aman. Jala harapan i boi mambahen hita gabe mangihutton aturan ni Debata jala dang taihutton be akka ulaon na rorang na diulahon portibi on.

Dohot do tu hamu dilehon Jahowa harapan i. Lomo do rohana asa denggan ngolumuna. Lomo do roha ni Debata “asa malua saluhut jolma”. Songon dia carana? Na parjolo ikkon sude do halak “mandapot parbinotoan na bagas taringot tu hasittongan”. (1 Timoteus 2:⁠4) Na menerbitton sijahaon on, mangido hamu asa dapotmuna hangoluan ikkon dapotmuna do parbinotoan taringot Bibel. Harapan naung dijanjihon Debata tu hamu, dao do undenggan sian harapan na dijanjihon portibi on tu hamu.

Alani harapan i, gabe dang mandele be hamu. Alana dilehon Debata do gogo tu hamu lao pasautton rencanamuna sesuai tu lomo ni rohana. (2 Korint 4:7; Pilippi 4:13) Harapan na songon i do na porlu di hamu? Sabar ma hamu paimahon i, jala satokkin nai nama i saut. Jala boi do dapotmuna harapan i.

[Kotak/Gambar]

Alasan Marpos ni Roha

Akka ayat on boi mangurupi hamu asa marpos ni roha tu janji ni Debata:

◼ Marjanji do Debata lao mangalehon hangoluan na denggan haduan.

Bibel mandok lao bahenon ni Debata do saluhut portibi on gabe paradeiso. Marsada jala marlas ni roha ma akka halak na tinggal disi.​—Psalmen 37:11, 29; Jesaya 25:8; Pangungkapon 21:3, 4.

◼ Dang boi margabus Debata.

Magigi do Jahowa tu sude gabus. Badia do Jahowa i jala dang boi Ibana margabus.​—Poda 6:16-19; Jesaya 6:2, 3; Titus 1:2; Heber 6:18.

◼ Massai balga situtu do huaso ni Debata.

Holan huaso ni Jahowa do na umbalga. Dang adong na boi mangabbati Debata pasautton janjina.​—2 Musa 15:11; Jesaya 40:25, 26.

◼ Lomo roha ni Debata asa mangolu salelengna hamu.

​—Johannes 3:16; 1 Timoteus 2:3, 4.

◼ Akka na denggan do na diida Debata sian hamu.

Dang sai hasalaanmuna na diida Debata, alai akka na denggan do diida Ibana sian hamu. (Psalmen 103:12-14; 130:3; Heber 6:10) Lomo do rohana asa akka na denggan na diulahon hamu jala las do rohana molo diulahon hamuna i.​—Poda 27:11.

◼ Marjanji do Debata mangurupi hamu pasautton rencanamuna.

Akka naposo ni Debata dang porlu mandele. Alana dilehon Debata do tondi parbadiana lao mangurupi hita.​—Pilippi 4:13.

◼ Dang hea dibahen Debata kecewa halak na porsea tu Ibana.

Dang bahenon ni Debata hamu kecewa. Alana boi do Ibana diandalhon jala dihaporseai.​—Psalmen 25:3.

[Gambar]

Songon takkuluk na boi manjaga ulu, dos songon i ma harapan na boi manjaga pikkiranta

[Gambar]

Dos songon jangkar, harapan pe boi do mambahen hamu togu

[Credit Line]

Courtesy René Seindal/Su concessione del Museo Archeologico Regionale A. Salinas di Palermo