Boi do Bibel Mangurupi Tikki Posi Sahitta?

Na didok Bibel

Boi. Parduli do Debata tikki marsahit naposona. Dipaboa Bibel do songon dia perasaan ni Jahowa tu akka naposona na setia. Bibel mandok, “Tikki peak ibana di podoman ala marsahit, dipargogoi Jahowa do ibana.” (Psalmen 41:3) Molo marsahit na posi hamu, adong tolu na boi diulahon hamu asa tarapul rohamuna:

1. Martangiang asa margogo. Didok Bibel, boi do ‘lehonon ni Debata tu hamu hadameon na so boi diattusi jolma’. Molo dame rohatta dang sai marsak be hita mamikkiri sahitta i jala gabe margogo ma hita manaon i.​—Pilippi 4:6, 7.

2. Marpikkiran na positif. Bibel mandok, “Dos songon ubat na mambahen malum do las ni roha. Alai moru do gogo molo marsak roha.” (Poda 17:22) Marlawak ma hamu sipata, alana boi do on mangorui lungun ni rohamuna. Jala marguna do on tu kesehatanmuna.

3. Marpos ni roha tu janji ni Debata. Molo toktong taingot janji ni Debata taringot masa depan, boi ma marlas ni roha hita nang pe posi sahitta. (Rom 12:12) Dipaboa Bibel do aha na lao masa di ari na naeng ro. Bibel mandok, “Dang adong nanggo sahalak pe na maringanan disi na mandok, ‘Marsahit do au.’” (Jesaya 33:24) Boi do pamalumon ni Debata sahit na posi na so boi diubati akka dokter saonari. Contohna, dipaboa Bibel do aha na lao masa tu akka halak na matua. Bibel mandok, “Sai lam sehat ma ibana, ussehat sian tikki haposoonna. Sai mulak ma muse gogona songon tikki poso dope ibana.”​—Job 33:25.

Catatan: Pos do roha ni Saksi Jahowa na diurupi Debata nasida. Alai marubat do tong hami molo marsahit. (Markus 2:17) Nang pe songon i, dang olo hami manottuhon pengobatan na dia na ikkon dipillit halak. Ai ganup do halak ikkon mambahen keputusanna be.