Hea do dihilala hamu songon na didok nasida? Ndang lomo roha ni godangan halak manjaha Bibel. Alai songon dia molo diboto hamu Bibel boi mangurupi asa marlas ni roha jala boi mambahen denggan parngoluonmuna? Jala boha molo adong na paboahon tu hamu cara marsiajar Bibel na denggan? Taronjar do rohamuna laho manulingkiti isi ni Bibel?

Taparrohahon ma pigapiga hatorangan sian angka halak na mandapot laba alani manjaha Bibel.

Si Ezekiel na marumur hirahira 20 taon mandok, ”Najolo ndang martujuan ngolungku, dos songon mamboan motor na so martujuan. Alai dung hujaha Bibel, gabe marlaba jala martujuan ma parngoluonku.”

Si Frieda na marumur hirahira 20 taon paboahon, ”Najolo, parmuruk do ahu. Alai ala hujaha Bibel, gabe boi ma huorom diringku. Gabe godang ma donganku saonari.

Si Eunice, sahalak borua na marumur hirahira 50 taon mandok, ”Lam tu dengganna ma parangengku dung manjaha Bibel.

Songon na taida hatorangan ni nasida dohot na asing, manjaha Bibel mambahen denggan parngoluonta. (Jesaya 48:17, 18) Umpamana, mangurupi hita (1) mamillit na dumenggan, (2) mamillit aleale, (3) mangadopi arsak ni roha, jala (4) na rumingkot, mamboto hasintongan taringot tu Debata. Ala sian Debata do poda na di Bibel, lam denggan ma ngolunta molo mangihuthon i.

Alani i, taparade ma tingkinta laho mamungka panjahaion Bibel! Alai songon dia do carana asa lam mura manjaha Bibel jala gabe lam tahalomohon?

Aha do na boi mangurupi hita asa tahalomohon manjaha Bibel? Parrohahon ma lima cara naung diulahon godangan halak.

Parade ma inganan na denggan. Lului ma inganan na buni jala pasiding ma na boi manggugai hita. Denggan do molo torang jala lambok alogo tingki hita manjaha.

Parade ma pingkiran. Molo taingot Bibel i sian Debata, gabe rade ma pingkiranta laho manjaha, dos songon dakdanak na rade manangihon poda ni natuatuana. Olo do ra sala pandapotta taringot tu Bibel saleleng on. Ingkon tapasiding ma i asa rade pingkiranta manjalo pangajarion na sian Debata.​—Psalmen 25:4.

Martangiang. Bibel marisi pingkiran ni Debata. Alani i, tahaporluhon do pangurupionNa laho mangantusi i. Marjanji do Ibana mangalehon ”Tondi Parbadia tu angka na mangido I sian Ibana.” (Lukas 11:13) Tondi parbadia boi mangurupi hita mangantusi lomo ni roha ni Debata. Jala boi do i mangurupi hita asa mangantusi ”nang angka na buni di bagasan diri ni Debata”.​—1 Korint 2:10, Bibel siganup ari.

Antusi ma lapatanna. Unang ma holan na manjaha sambing, alai huhut ma tarimangi. Lului ma alus ni sungkunsungkun songon, ’Parange aha do na boi hutiru sian halak na didok di ayat on? Songon dia do ahu mangulahon i di parngoluonku?’

Tontuhon ma tujuanna. Asa tadapot laba tingki manjaha Bibel, tontuhon ma na laho taparsiajari, na marlaba tu parngoluonta. Umpamana, asa lam mananda Debata, asa lam denggan parangenta jala asa gabe tungganeboru manang tungganedoli na burju. Dung i, tapillit ma ayat ni Bibel na boi mangurupi hita mangulahon i.a

On ma lima cara na boi mangurupi hita. Alai, songon dia do asa tahalomohon manjaha Bibel? Artikel na mangihut mangulas carana.

Las do rohamuna tingki manjaha Bibel manang ndang? Caramuna manjaha mangkorhon do tu pangkilalaanmuna. Taparrohahon ma aha na boi mangurupi hita asa las rohanta tingki manjaha Bibel.

Pillit ma terjemahan na sintong jala na mura antusan. Molo pagodanghu hatorangan manang hata na maol taantusi, boi do gabe malas ma hita manjaha Bibel. Alani i, lului ma terjemahan ni Bibel na mura taantusi asa boi hona tu rohanta. Terjemahan na denggan i ma terjemahan ni Bibel na hombar tu aslina jala tangkas.a

Pangke ma teknologi. Saonari nunga adong Bibel elektronik. Pigapiga Bibel, boi do tajaha sian internet manang ta-download asa boi tajaha di komputerta, di tablet, manang di HP-nta. Adong do Bibel elektronik na boi mangurupi hamu asa pintor mura mangida ayat di terjemahan na asing manang hatorangan na sarupa di ayat na asing. Molo umlomo rohamuna manangihon sian na manjaha, nunga adong rekaman panjahaion Bibel di pigapiga bahasa. Godang halak na manangihon rekaman panjahaion Bibel tingki di pardalanan, tingki manunsi manang tingki mangulahon ulaon na asing na boi huhut manangihon rekaman penjahaion Bibel. Lomo do rohamuna mamangke cara on?

Pangke ma pangurupion laho marsiajar Bibel. Boi do lam taantusi isi ni Bibel, molo tapangke angka alat na boi mangurupi. Adong peta na boi mangurupi hita mangida manang mamboto angka luat na disurat di Bibel. Adong do muse hatorangan di situs jw.org manang di majalah on, na boi mangurupi hita manangkasi hatorangan na adong di Bibel.

Bahen ma marragam cara. Molo ndang lomo rohanta manjaha Bibel jojor sian 1 Musa tu Pangungkapon, boi do tabahen cara na asing asa boi gabe tahalomohon. Umpamana, manjaha taringot ulaon ni angka halak na disurat di Bibel, ida ma kotak ”Mananda Angka Halak na Disurat di Bibel”. Manang, boi do tajaha taringot pigapiga hatorangan na sarupa manang manjaha angka ayat mangihuthon jujur taonna. Lomo do rohamu mangulahon cara on?

Sumurung do Bibel, ala podana sian Panompanta. (2 Timoteus 3:16) Mangkorhon do i tu saluhut parngoluonta. Bibel mandok, ”Marngolu do hata ni Debata jala marpangkorhon.” (Heber 4:12) Hata ni Debata boi mambahen lam denggan parngoluonta marhite manogunogu hita ganup ari jala mangurupi hita mananda Debata dohot bagabagaNa.​—1 Timoteus 4:8; Jakobus 4:8.

Lam denggan parngoluonta saonari. Poda na sian Bibel boi mangurupi hita tingki mangulahon ulaon na mangihut.

• Maradophon dongan.​—Epesus 4:31, 32; 5:22, 25, 28, 33.

• Kesehatan.​—Psalmen 37:8; Poda 17:22.

• Marpangalaho na denggan.​—1 Korint 6:9, 10.

• Mangatur parhepengon.​—Poda 10:4; 28:19; Epesus 4:28.a

Marlaba situtu do poda na sian Bibel. Umpamana tu na baru marhasohotan na tading di Asia. Ala baru marhasohotan, maol do dihilala nasida mardos ni roha. Alai, dung diulahon nasida poda na sian Bibel, tungganedolina i ma si Vicent mandok, ”Dung hujaha Bibel, gabe lambok ma rohangku tingki pasaehon parsalisian. Gabe martua ma hami saonari ala mangulahon hata ni Debata.” Tungganeboruna, i ma si Annalou mandok, ”Angka sitiruon na adong di Bibel godang mangurupi ahu. Gabe denggan ma parsaripeonnami jala martujuan ma ngolunami.”

Lam mananda Debata. Asing ni marlaba tu parsaripeonna, didok si Vicent muse, ”Dung manjaha Bibel, gabe lam solhot ma ahu saonari tu Debata Jahowa.” I ma na rumingkot na boi tadapot sian manjaha Bibel—lam mananda Debata. Ndang holan poda na denggan na tadapot sian Bibel, alai boi do hita gabe maraleale tu Ibana. Dipaboa Ibana do tangkas taringot ”ngolu na tutu”, i ma hangoluan na dumenggan di ari na naeng ro. (1 Timoteus 6:19) Holan di Bibel do boi tadapot hatorangan sisongon on.

Molo tongtong tajaha Bibel, boi ma tadapot sude labana. Lam denggan ma parngoluonta jala lam tatanda ma Debata. Alai, olo do ra adong sungkunsungkun tingki hita manjaha Bibel. Tatiru ma songon sahalak parpangkat sian Etiopia na mangolu 2000 taon naung salpu. Godang do sungkunsungkunna taringot Bibel. Tingki disungkun tu ibana taringot na dijaha ibana, didok ma ”Sian dia ma boi huantusi i, anggo so adong na patorangkon tu ahu?”b Pintor dijalo ibana ma pangurupion sian sahalak sisean ni Jesus i ma si Pilippus. (Ulaon ni Apostel 8:30, 31, 34, Bibel siganup ari.) Molo lomo rohamuna mandapot gumodang hatorangan taringot Bibel, isi ma formulir di situs www.pr2711.com/bbc manang lului ma alamat na jumonok tu hamu na adong di majalah on. Boi do hamu mangkatai dohot Sitindangi Ni Jahowa manang lului ma Bale Harajaon di luatmuna. Olo do hamu manjaha Bibel jala mangulahon podana di parngoluonmuna?