Sai didok si Johannes do tu akka halak, ‘Na lao ro do halak na umbalga huasona sian au.’ Tikki marumur hira-hira 30 taon Jesus, ro ma ibana sian Galilea tu Sunge Jordan. Disi do si Johannes mandidi akka halak. Dipangido Jesus ma asa dididi ibana. Alai didok si Johannes ma, ‘Seharusna dang au na mandidi ho, ho do na mandidi au.’ Didok Jesus ma, ‘Alai dipangido Jahowa do asa ho na mandidi au.’ Masuk ma nasida tu Sunge Jordan. Dung i, dididi si Johannes ma Jesus.

Dung kaluar Jesus sian aek, martangiang ma ibana. Di tikki i, tarbukka ma langit jala turun ma tondi parbadia ni Jahowa na songon merpati tu atas ni Jesus. Dung i, tarbege ma soara ni Jahowa na mandok, ‘Ho do Anakku, anak hasianku. Halomoan ni rohakku do ho.’

Tikki turun tondi parbadia ni Jahowa tu Jesus, di tikki i ma ibana gabe Kristus manang Messias. Saonari diulahon ibana ma ulaon na dilehon Jahowa tu ibana.

Dung tardidi Jesus, lao ma ibana tu padang belantara. Disi ma ibana saleleng 40 ari. Dung mulak ibana, dijuppangi ibana ma si Johannes. Tikki diida si Johannes ro Jesus, didok ibana ma, ‘On ma Anak Domba ni Debata na lao manesa dosa ni jolma.’ Marhite hatana i dipatudu si Johannes ma, Jesus do Messias i. Diboto ho do aha na masa tikki di padang belantara Jesus? Taida ma di pelajaran berikutna.

Dung tardidi Jesus, ditogu-togu tondi parbadia ma ibana tu padang belantara. Dang mangan ibana disi saleleng 40 ari, alani i gabe male hian ma ibana. Dung i ro ma Sibolis manguji ibana. Didok ma, ‘Molo Anak ni Debata do ho, bahen ma jo batu on gabe roti.’ Alai didok Jesus ma, ‘Adong do ayat na mandok, dang holan sipanganon na mambahen jolma mangolu. Alai ikkon taoloi do hata ni Debata.’

Dung i didok Sibolis ma muse tu Jesus, ‘Molo toho do ho Anak ni Debata, dabuhon ma dirim sian ginjang ni bagas joro on. Ai adong do ayat na mandok, disuru Debata do malaikatna lao manjaga ho.’ Alai didok Jesus ma, ‘Adong do ayat na mandok, unang ma uji Jahowa.’

Dung i, dipatudu Sibolis ma tu Jesus sude harajaon na adong di portibi on, hamoraonna, dohot hasangaponna. Didok ma, ‘Hulehon pe sude harajaon on tu ho molo olo ho manomba au apala sahali pe.’ Alai didok Jesus ma, ‘Lao ma ho Bolis! Adong do ayat na mandok, holan Jahowa do na ikkon sombaonmu.’

Lao ma Sibolis. Dung i ro ma akka malaikat, jala dilehon ma Jesus mangan. Mulai sian i, dipaboa Jesus ma tu akka halak taringot Harajaon ni Debata. On ma na ikkon diulahon ibana di tano on. Lomo do roha ni akka halak mambege na diajarhon Jesus, jala sai diihutton nasida do Jesus tudia pe ibana lao.

Hira-hira di bulan April taon 30 M, lao ma Jesus tu Jerusalem. Godang do halak na ro tu kota i lao mangarayahon Paska. Di perayaan i, ikkon diboan nasida do binatang na lao dipersembahon tu Jahowa. Adong do halak na mamboan binatang i sian hutana, alai adong do na manuhor i di Jerusalem.

Tikki masuk Jesus tu bagas joro, diida ibana ma disi godang halak marjualan binatang. Dibahen nasida do jabu ni Jahowa gabe inganan marjualan. Gabe muruk ma Jesus. Dibuat ibana ma cambuk na sian tali jala diusir ma akka domba dohot lombu sian i. Dibalikkon ibana ma meja ni panukkar hepeng jala disappatton ma hepeng logam ni nasida tu tano. Didok Jesus ma tu akka parjualan merpati, ‘Boan hamu on sude! Unang bahen hamu jabu ni Bapakku gabe inganan marjualan!’

Kagum ma halak na di bagas joro mangida i. Gabe diingot akka muridna ma nubuat taringot Messias na mandok, ‘Massai holong do rohakku tu jabu ni Jahowa.’

Dukkon i di taon 33 M, diusir Jesus do muse akka parjualan sian bagas joro. Sogo do rohana tu akka halak na so mangargai jabu ni Bapakna.

Dung sae Paska, mulak ma Jesus dohot akka muridna tu Galilea, jala lewat sian Samaria do nasida. Di jonok ni kota Sikar, istirahat ma Jesus di sumur ni si Jakkob. Dung i lao ma akka muridna manuhor sipanganon tu kota.

Ro ma sahalak borua lao mambuat aek tu sumur i. Didok Jesus ma tu ibana, “Lehon jo aek i inumokku.” Didok borua i ma, ‘Boasa dipakkulingi Amang au? Ai halak Samaria do au. Kan dang boi makkatai halak Jahudi tu halak Samaria?’ Alai didok Jesus ma, ‘Molo diboto ho ise au, pasti pangidoonmu do aek sian au. Jala lehonokku ma tu ho aek hangoluan.’ Didok borua i ma, ‘Maksud ni Amang songon dia? Ai timba ni Amang pe so adong.’ Didok Jesus ma, ‘Manang ise na manginum aek na hulehon, dang na lao mauas be ibana.’ Didok borua i ma, “Lehon ma tu au aek i Amang.”

Dung i, didok Jesus ma tu borua i, ‘Jou ma suamim tuson.’ Didok borua i ma, ‘Dang adong suamikku.’ Dung i, didok Jesus ma, ‘Tutu do i. Nungnga lima hali ho menikah. Jala dang suamim donganmu saonari.’ Didok borua i ma muse, ‘Sahalak nabi do ho huida Amang. Didok halak Samaria, boi do manomba Debata di dolok. Didok halak Jahudi, holan di Jerusalem do boi manomba Debata. Alai porsea do au molo dung ro Messias, paboaonna do tu hami cara manomba Debata.’ Didok Jesus ma muse, ‘Au do Messias i.’ Dang hea dope dipaboa Jesus songon i tu manang ise pe.

Hatop ma borua i mulak tu hutana, jala dipaboa ibana ma tu akka halak Samaria, ‘Pajuppang au nakkin dohot sahalak bawa. Diboto ibana do sude taringot au. Ibana do ra Messias i. Beta ma taida tusan!’ Dung i, diihutton nasida ma borua i tu sumur i, jala ditangihon nasida do aha na diajarhon Jesus.

Ditogihon halak Samaria ma Jesus tu huta ni  nasida. Disi ma Jesus saleleng dua ari mangajari. Gabe godang ma na porsea tu ibana. Didok nasida ma tu borua Samaria i, ‘Dung dibege hami na didok ibana, porsea do  hami ibana do na paluahon portibi on.’

Dung tardidi Jesus, mulai ma dipaboa ibana tu akka halak, ‘Nungnga jonok Harajaon ni Debata.’ Lao do akka muridna rap dohot Jesus marbarita tu Galilea dohot tu Judea. Dung mulak Jesus tu Nasaret, lao ma ibana tu sinagoga. Dijahahon ibana ma gulungan Jesaya na mandok, ‘Dilehon Jahowa do tondi parbadia tu au lao paboahon barita na uli.’ Aha do lapatanna? Memang, lomo do roha ni akka halak mangida Jesus mambahen mukjizat. Alai, lao paboahon barita na uli do alasan utama ni Jahowa mangalehon tondi parbadia tu Jesus. Dung i didok Jesus ma tu akka halak na di sinagoga i, ‘Sadari on saut ma na didok di ayat on.’

Dung i lao ma Jesus tu Laut Galilea. Pajuppang ma ibana disi dohot si Petrus, si Andreas, si Jakobus, dohot si Johannes. Panjala dekke do nasida. Didok Jesus ma, ‘Ihutton ma au asa hubahen hamu gabe sijala jolma.’ Ditinggalhon nasida ma karejo ni nasida, jala gabe murid ni Jesus ma nasida. Lao ma nasida tu sude luat di Galilea paboahon Harajaon ni Jahowa. Dipaboa nasida do i di sinagoga, di onan, dohot di akka dalan. Tudia pe nasida lao, godang do halak na mangihutton nasida. Tarbege ma barita taringot Jesus tu sude inganan, bahkan sahat tu Siria.

Dung i, dilehon Jesus ma huaso tu piga-piga muridna lao pamaluppon na marsahit dohot mangusir malaikat na jahat. Na deba nai marbarita dohot Jesus tu akka kota dohot tu huta-huta. Adong do akka borua na porsea tu ibana, songon si Maria Magdalena, si Johanna, si Susana, dohot na asing. Dilehon nasida do akka na porlu tu Jesus dohot tu akka muridna.

Dung dilatik Jesus akka muridna, disuru ma nasida marbarita. Lao ma nasida tu Galilea. Godang do na gabe murid ni Jesus jala tardidi. Alani godangna, dipatudos Jesus ma nasida songon ladang na siap dipanen. Didok ma, ‘Pangido ma tu Jahowa asa dilehon godang parkarejo na lao mamanen.’ Dipillit Jesus ma 70 halak muridna. Disuru ma nasida dua halak sapardalanan lao paboahon barita na uli tu Judea. Diajari nasida do sude halak taringot Harajaon ni Debata. Dung mulak, las ma roha ni nasida. Diceritahon nasida ma i tu Jesus. Ikkon torus do dibaritahon barita na uli, jala dang boi Sibolis mangabbati i.

Lomo do roha ni Jesus asa torus marbarita akka muridna molo nungnga lao ibana tu surgo. Didok ibana ma tu nasida, ‘Paboa hamu ma barita na uli tu sude inganan di portibi on. Ajari ma nasida taringot Hata ni Debata, jala didi ma nasida.’

Lao paboahon taringot Harajaon ni Debata do Jesus ro tu tano on. Asa boi dipatudu Jesus aha na lao bahenonna dung gabe Raja, dilehon Jahowa ma tondi parbadia tu ibana lao mambahen akka mukjizat. Tudia pe Jesus lao, sai ro do akka na marsahit mangido asa dipamalum. Dipamalum Jesus do nasida sude. Gabe boi ma mangida akka na mapitung, mambege akka na nengel, mardalan akka na pincang, jala dibebasson ma halak na kesurupan. Holan ujung ni baju ni Jesus pe dijama, malum do nasida. Sai diihutton akka halak do Jesus tudia pe ibana lao. Bahkan tikki istirahat pe, olo do Jesus mangurupi nasida.

Di sada tikki, diboan akka halak ma sahalak bawa na pincang tu inganan ni Jesus marborngin. Alai dang boi nasida masuk alani godang ni jolma. Alani i, dibukka nasida ma atap ni jabu i jala dipaturun ma bawa i tu jolo ni Jesus. Dung i didok Jesus ma tu bawa i, ‘Jongjong jala mardalan ma ho.’ Tikki mardalan bawa i, gabe kagum ma akka halak na disi.

Dung i tikki lao Jesus tu sada huta, adong ma sappulu bawa na marsahit kusta manggora Jesus sian na dao. Tikki i, dang boi jonok na marsahit kusta tu na asing. Didok nasida ma, ‘Jesus, asi ma roham tu hami!’ Disuru Jesus ma nasida lao tu bagas joro. Didok di Patik molo nungnga malum, ikkon lao do na marsahit kusta tu bagas joro. Alai tikki di pardalanan dope, nungnga malum nasida. Dung diboto sahalak na marsahit kusta i naung malum ibana, mulak ma ibana manjuppangi Jesus mandok mauliate jala dipuji ibana ma Debata. Sian sappulu na marsahit kusta i, holan sada do na mandok mauliate.

Adong ma muse sahalak borua na marsahit saleleng 12 taon. Lomo hian do rohana asa malum sahitna i. Alani i, sipsip ma ibana lao tu pudi ni Jesus, jala dijama ma ujung ni baju ni Jesus. Pittor malum ma sahitna i. Gabe disukkun Jesus ma, ‘Ise na manjama bajukku?’ Mabiar do borua i, alai ro ma ibana, jala dipaboa do boasa dijama baju ni Jesus. Lambok ma didok Jesus, ‘Ale borukku, mulak ma ho di bagasan dame.’

Adong ma sahalak petugas di bagas joro na margoar si Jairus. Ro ma ibana tu Jesus jala didok, ‘Beta jo tu jabukku, naeng mate borukku.’ Alai dang sahat dope Jesus tu jabuna, nungnga mate boruna i. Dung sahat Jesus, diida ibana ma tangis akka halak na disi dohot keluarga ni si Jairus. Didok Jesus ma, ‘Unang be tangis hamu. Na modom do ibana.’ Ditiop Jesus ma tangan ni boru ni si Jairus i, didok ma, ‘Ale boru, dungo ma ho!’ Pittor dungo ma ibana, jala disuru Jesus ma asa dilehon natua-tuana ibana mangan. Pasti las hian do roha ni natua-tuana!

Dung sada satonga taon Jesus paboahon Harajaon ni Debata tu akka halak, ikkon dibahen ibana do keputusan na penting. Ise do na lao dipillit Jesus lao mandongani ibana marbarita? Jala ise do na lao dilatik ibana gabe pengawas di huria? Dipangido Jesus do asa diurupi Jahowa ibana mambahen keputusan. Alani i lao ma Jesus sahalakna tu dolok, disi ma ibana martangiang saborngin manipat. Marsogotna i, dijou Jesus ma akka muridna jala dipillit ma sian nasida 12 halak gabe apostelna. Diboto ho do goar ni nasida? Goar ni nasida i ma si Petrus, si Andreas, si Jakobus, si Johannes, si Pilippus, si Bartolomeus, si Tomas, si Mateus, si Jakobus anak ni si Alpeus, si Tadeus, si Simon, dohot si Judas Iskariot.

Sai rap do Jesus dohot 12 apostelna i. Dung dilatik Jesus nasida, disuru ma nasida marbarita. Dilehon Jahowa ma huaso tu nasida lao mangusir malaikat na jahat dohot pamaluppon na marsahit.

Didok halak Parise do akka apostelna i halak na so sikkola jala dang terkenal. Alai dibahen Jesus do akka apostelna i gabe donganna, dilatik do nasida, jala porsea do Jesus tu nasida. Akka apostel i ma na mandongani Jesus sebelum mate ibana, jala nasida do tong na mandongani Jesus dung dipahehe. Godangan sian nasida sahuta do dohot Jesus di Galilea. Jala piga-piga nungnga menikah.

Jolma na so sempurna do akka apostel i. Sipata olo do nasida sala makkatai manang mambahen keputusan na sala. Olo do nasida dang sabar tu na asing. Jala hea do nasida marsoal taringot ise na unjago sian nasida. Alai sasittongna burju do nasida, jala dihaholongi nasida do Jahowa. Dung nakkok Jesus tu surgo, nasida ma na gabe anggota na parjolo di huria Kristen, jala godang do tugas na penting na diulahon nasida.

Dung dipillit Jesus 12 apostelna, turun ma ibana sian dolok jala lao ma ibana tu sada inganan. Nungnga godang halak marpungu disi. Adong na sian Galilea, Judea, Tirus, Sidon, Siria, dohot sian seberang ni Sunge Jordan. Diboan nasida do akka na marsahit dohot akka na kesurupan alani malaikat na jahat. Dipamalum Jesus do nasida. Dung i hundul ma Jesus mangajari nasida. Dipaboa ma tu nasida aha na ikkon diulahon asa boi gabe dongan ni Debata. Ikkon tasadari do na porlu do hita diajari Jahowa jala tahaholongi ma Ibana. Alai dang boi tahaholongi Debata molo dang tahaholongi halak na asing. Ikkon burju do hita tu sude halak, termasuk ma i tu halak na jahat.

Didok Jesus ma, ‘Unang ma holan donganmu haholongi. Haholongi ma muse halak na jahat jala maappon ma nasida. Molo haccit roha ni halak tu ho, juppangi ma ibana jala minta maaf ma ho. Bahen ma tu halak songon na dipangido roham dibahen halak tu ho.’

Didok Jesus do muse tu nasida, ‘Upporlu do mardongan tu Jahowa sian hepeng. Boi do ditakko halak hepengmuna. Alai dang boi ditakko halak pasu-pasu na dapotmuna ala gabe dongan ni Debata. Unang ma sai marsak hamu alani sipanganon, siinumon, manang alani pakkean. Bereng hamu ma akka pidong. Sai dilehon Debata do nasida mangan. Dang gabe lam ganjang umurmuna molo marsak hamu. Ingot ma, diboto Jahowa do aha na porlu di hamu.’

Dang hea dibege nasida adong halak na malo mangajari songon Jesus. Dang hea halak Parise dohot siboto surat mangajarhon na songon i tu nasida. Boasa Jesus malo mangajari? Ala Jahowa do na mangajari ibana.

Lomo do roha ni halak Parise dipuji halak. Diulahon nasida pe na denggan jala martangiang di inganan na rame, asa boi do diida halak. Dihapal nasida do tangiang na ganjang, jala i do na sai didok nasida tikki martangiang di sinagoga manang di inganan na rame. Alani i, gabe tarsonggot ma akka halak tikki didok Jesus, ‘Unang ma songon halak Parise hamu martangiang. Dirippu nasida do lomo roha ni Debata ala ganjang tangiang ni nasida, hape daong. Unang ma mulak-ulak dokkon hamu hata na sarupa. Alana, lomo do roha ni Jahowa asa dipaboa hamu na di bagasan rohamuna.’

‘Songon on ma hamu martangiang: “Ale Amanami na di banua ginjang, sai dipabadia ma goarmu. Sai ro ma Harajaonmu. Sai saut ma lomo ni roham di tano on songon na di banua ginjang.”’ Didok Jesus muse, boi do nasida martangiang asa adong sipanganon ni nasida sadari i, asa disesa dosa ni nasida, dohot manangiakkon akka na asing.

Jesus mandok, ‘Sai martangiang ma hamu. Pangido ma akka na denggan sian Jahowa Bapakmuna. Pasti lomo do roha ni natua-tua mangalehon akka na denggan tu gellengna. Molo dipangido gellengmuna roti, batu do na dilehon hamu? Molo dipangido dekke, ulok do na dilehon hamu?’

Dung i dipaboa Jesus ma parsiajaranna, ‘Haru hamu, diboto hamu do mangalehon na denggan tu gellengmuna. Apalagi ma Jahowa Bapakmuna, dilehon Ibana do tondi parbadia molo dipangido hamu i tu Ibana.’ Molo ho, diulahon ho do na didok Jesus i? Akka aha ma na ditangiakkon ho?

Nungnga jonok ari Paska taon 32 M. Dung sae marbarita tu godang inganan, mulak ma akka apostel ni Jesus. Ala nungnga loja nasida, ditogihon Jesus ma nasida marparau tu Betsaida, asa istirahat nasida disi. Tikki naeng sahat di Betsaida, diida Jesus ma nungnga adong marribu halak paimahon ibana disi. Di tikki i naeng istirahat do Jesus dohot akka apostelna, alai olo do Jesus mangajari akka na ro i taringot Harajaon ni Debata. Dipamalum Jesus do muse akka na marsahit. Alai dung botari, didok akka apostel ma tu Jesus, ‘Nungnga male nasida, suru ma nasida mulak asa boi dituhor nasida sipanganon.’

Didok Jesus ma, ‘Unang pola mulak nasida. Lehon hamu ma nasida mangan.’ Didok akka apostel i ma, ‘Jadi, tuhoronnami ma roti di nasida?’ Didok si Pilippus ma, ‘Nang pe adong hepengta, alai dang cukkup i, alana godang hian do jolma on.’

Didok Jesus ma, ‘Aha do sipanganon na adong di hamu?’ Didok si Andreas ma, ‘Holan lima roti dohot dua dekke do na adong, dang cukkup on.’ Didok Jesus ma, ‘Boan ma tuson roti dohot dekke i.’ Dung i disuru Jesus ma hundul akka na ro i. Dibahen ma nasida markelompok. Adong na 50 sakelompok jala adong na 100. Dibuat Jesus ma roti dohot dekke i, jala ditangiakkon ma. Dilehon ma i tu akka apostel asa dibagihon. Adong do 5.000 bawa na mangan i, asing dope akka borua dohot dakdanak. Mangan ma nasida sappe butong. Dung sae mangan, dipapungu akka apostel i ma roti na lobi, godangna 12 karanjang! Sada mukjizat do on kan?

Kagum ma sude jolma i. Alani i, naeng dibahen nasida ma Jesus gabe raja. Alai diboto Jesus do dang tikkina dope ibana dibahen Jahowa gabe raja. Alani i, disuru Jesus ma asa mulak sude jolma i jala didok ma tu akka apostelna asa lao nasida tu seberang ni Laut Galilea. Lao ma nasida marparau, alai lao ma Jesus sahalakna tu dolok. Marhua? Lao martangiang tu Bapakna. Nang pe sibuk Jesus, sai dilehon ibana do tikki lao martangiang.

Dang holan pamaluppon na marsahit dohot pahehehon na mate na boi diulahon Jesus. Alai boi do dikendalihon ibana alogo dohot udan. Dung sae Jesus martangiang di dolok, diida ibana ma sian i ro badai di Laut Galilea. Sai didayungi akka apostelna ma parau i lao mangalo alogo i. Turun ma Jesus jala mardalan ma ibana di atas ni aek mandapotton nasida. Tikki diida akka apostelna Jesus mardalan di atas ni aek, gabe mabiar ma nasida. Alai didok Jesus ma, ‘Unang pola mabiar hamu. Au do on.’

Didok si Petrus ma, ‘Tuan, molo ho do i, dokkon ma asa ro au tusi.’ Didok Jesus ma, ‘Ro ma ho.’ Turun ma si Petrus sian parau i, mardalan ma ibana di atas ni aek lao mandapotton Jesus. Alai dung lam jonok, diida si Petrus ma badai na balga, gabe mabiar ma ibana. Gabe naeng lonong ma ibana. Didok si Petrus ma, ‘Tuan, tolong jo au!’ Ditiop Jesus ma tanganna jala didok ma, ‘Boasa mabiar ho? Na so adong do haporseaonmu?’

Dung i naik ma Jesus dohot si Petrus tu parau i. Pittor so ma badai i. Boi do dibayakkon ho songon dia perasaan ni akka apostel i? Didok nasida ma, ‘Tutu do ho Anak ni Debata.’

Dang holan sahali i Jesus pasohon badai. Di sada tikki, marlayar ma Jesus dohot akka apostelna. Modom do ibana di parau i. Toppu ma ro badai. Ro ma galumbang jala masuk ma aek tu parau i, sappe naeng gok do aek di parau i. Didungoi akka apostel i ma Jesus. Didok nasida ma, ‘Guru, urupi jo hami. Nungnga naeng mate hita!’ Dungo ma Jesus jala didok ma tu laut i, “So ma!” Pittor so ma alogo i jala tenang ma laut i. Didok Jesus ma tu nasida, ‘Na so adong do haporseaonmuna?’ Dung i ninna akka apostel i ma, “Haru alogo dohot laut pe mangoloi do tu ibana.” Diboto akka apostel i ma, molo porsea nasida tu Jesus, dang porlu nasida mabiar tu manang aha pe.

Sogo do roha ni halak Parise tu Jesus. Alani i, dilului nasida do cara lao manakkup Jesus. Didok nasida, sala do Jesus ala pamaluppon halak di ari Sabat. Di sada tikki di ari Sabat, diida Jesus ma sahalak bawa na buta sian mulai tubu, jala mangido-ido do ibana di dalan. Didok ma tu akka muridna, ‘Ida hamu ma, boi do bahenon ni Debata malum bawa on.’ Dibahen Jesus ma tijurna tu tano jala dibahen ma i tu mata ni na buta i. Didok Jesus ma, ‘Lao ma ho marsuap tu kolam Siloam.’ Dung marsuap bawa i, boi ma ibana mangida.

Heran do akka jolma mangida i. Ninna nasida ma, ‘Pangido-ido na buta i do i kan? Manang na adong do na mirip tu ibana?’ Dialusi bawa i ma, ‘Au do na buta i!’ Disukkun nasida ma ibana, ‘Alai boasa boi ho mangida?’ Diceritahon ibana ma songon dia ibana boi mangida. Dung i, diboan ma bawa i tu halak Parise.

Didok bawa i ma, ‘Dibahen Jesus gambo tu matakku. Dung i disuru ma au marsuap. Alani i, boi ma au mangida.’ Didok halak Parise i ma, ‘Dipamalum Jesus ho di ari Sabat? Dang sian Debata huasona i.’ Alai adong ma na mandok, ‘Molo dang sian Debata huasona i, dang mungkin boi ibana pamaluppon.’

Dijou halak Parise ma orang tua ni na buta i. Disukkun ma, ‘Anakmuna do on? Songon dia do carana gabe boi ibana mangida saonari?’ Alai mabiar do orang tuana tu halak Parise. Ai diboto nasida do olo halak Parise mangusir halak sian sinagoga molo porsea tu Jesus. Gabe didok nasida ma, ‘Dang diboto hami. Sukkun hamu ma ibana.’ Sai disukkuni halak Parise ma anakna i. Gabe didok ibana ma, ‘Kan nga hupaboa tu hamu. Sai disukkuni hamu dope au.’ Gabe muruk ma halak Parise i jala diusir ma ibana.

Dung i dilului Jesus ma bawa i jala disukkun ma, ‘Porsea do ho tu Messias?’ Dialusi bawa i ma, ‘Ise do Messias i, asa boi au porsea tu ibana?’ Didok Jesus ma, ‘Au do Messias i.’ Burju do Jesus kan? Dipamalum ibana do na buta i jala dipatogu haporseaonna.

Di Betania, adong tolu dongan ni Jesus. Goarna i ma si Lasarus, dohot dua itona si Maria, dohot si Marta. Tikki i, di seberang Sunge Jordan do Jesus. Disuru si Maria dohot si Marta ma halak paboahon barita tu Jesus, ‘Hatop jo ho ro. Parah hian sahit ni si Lasarus.’ Alai dang langsung lao Jesus. Dung dua ari pe asa diajak Jesus akka muridna tu Betania. Didok ibana ma, ‘Beta ma hita tu Betania, asa hudungoi jo si Lasarus. Ai modom ibana.’ Didok akka apostelna ma, ‘Malum do sahitna i molo modom ibana.’ Gabe didok Jesus ma, ‘Nungnga mate si Lasarus.’

Tikki sahat Jesus di Betania, nungnga opat ari si Lasarus dikubur. Godang do jolma na ro menghibur si Maria dohot si Marta. Dung diboto si Marta naung ro Jesus, dijuppangi ibana ma Jesus. Ninna ma, ‘Molo dison hian ho Tuan, dang mate itokki.’ Didok Jesus ma, ‘Boi do mangolu muse itomi. Porsea do ho?’ Dialusi si Marta ma, ‘Porsea do au mangolu ibana muse di ari haheheon.’ Didok Jesus ma, “Au do haheheon dohot hangoluan.”

Dipaboa si Marta ma tu si Maria, ‘Nungnga ro Jesus’. Lari ma si Maria mandapotton Jesus, jala godang do na mangihutton ibana. Marsomba ma ibana tu pat ni Jesus jala tangis. Ninna ma, ‘Molo dison hian ho Tuan, dang mate itokki!’ Gabe dohot ma Jesus tangis ala diida sai tangis si Maria. Godang do na mangida Jesus tangis. Didok nasida ma, ‘Holong hian do rohana tu si Lasarus ate.’ Alai adong do muse na mandok, ‘Boasa dipasombu ibana mate donganna i?’ Aha ma na dibahen Jesus dukkon i?

Lao ma Jesus tu kuburan ni si Lasarus. Adong do batu na balga na manutup kuburan i. Didok Jesus ma, ‘Geser hamu ma batu i.’ Alai didok si Marta ma, ‘Nga opat ari ibana dikubur! Nga bau be i.’ Alai digeser nasida do batu i. Dung i martangiang ma Jesus, ninna ma, ‘Mauliate ma Amang, sai ditangihon Ho do au. Alai hudok pe songon i, asa diboto halak on do, Ho do na manuru au.’ Dung i gogo ma didok Jesus, ‘Lasarus, kaluar ma ho!’ Kaluar ma si Lasarus. Dibukkus kain dope dagingna. Didok Jesus ma, ‘Bukka hamu ma kain i, asa boi ibana mardalan.’

Gabe godang ma halak na porsea tu Jesus dung diida nasida na masa i. Alai adong do na paboahon i tu halak Parise. Gabe naeng dibunu halak Parise ma Jesus dohot si Lasarus. Dung i, lao ma sada sian 12 apostel ni Jesus manjuppangi halak Parise, i ma si Judas Iskariot. Ninna ma, ‘Molo huurupi hamu manakkup Jesus, sadia ma bayaronmuna tu au?’ Setuju ma nasida mangalehon 30 keping perak. Mulai sian i, sai dilului si Judas ma cara asa boi Jesus ditakkup halak Parise.

Ganup taon di tanggal 14 Nisan, dirayahon halak Jahudi do Paska. Perayaan on paingotton halak Jahudi songon dia Jahowa paluahon nasida tikki gabe budak di Mesir, jala mamboan nasida tu Tano Kanaan. Taon 33 M, dirayahon Jesus ma Paska dohot 12 apostelna di sada kamar di Jerusalem. Di perayaan i didok Jesus ma, ‘Adong do sada sian hamu na naeng menghianati au.’ Gabe tarsonggot ma akka apostelna i. Disukkun nasida ma Jesus, ‘Ise i Tuan?’ Didok Jesus ma, ‘Na manjalo roti on sian au, ibana ma halakna.’ Dilehon Jesus ma roti tu si Judas Iskariot. Dung i lao ma si Judas sian kamar i.

Dung ditangiakkon Jesus roti i, diponggoli ma i jala dilehon tu akka apostelna. Didok ibana ma, ‘Allang hamu ma roti on. On ma na manggombarhon dagingku, na hulehon lao manobus hamu.’ Dung martangiang muse Jesus, dilehon Jesus ma anggur tu akka apostelna i. Didok ma, ‘Inum hamu ma anggur on. On ma na manggombarhon mudarhu na manesa dosamuna. Ingot hamu ma janjikkon, gabe raja ma hamu rap dohot au di surgo. Bahen hamu ma perayaan on ganup taon.’ Sahat tu saonari, dirayahon siihutton Jesus do on ganup taon, jala didok do perayaan on Borngin Parningotan Ari Hamamate ni Jesus.

Dung sae perayaan i, marbadai ma akka apostel i lao mamboto ise do na ussangap sian nasida. Gabe didok Jesus ma, ‘Manang ise na ussangap, ikkon olo do mengalah.’

‘Hamu do akka donganku. I do alana hupaboa tu hamu sude na hubege sian Ama i. Tokkin nai lao nama au tu Ama i. Alai tinggal dope hamu di tano on. Alani i, marsihaholongan ma hamu songon au na makkaholongi hamu. Asa diboto halak na muridhu hamu.’

Ditangiakkon Jesus ma asa dijaga Jahowa akka muridna i, jala asa mardame nasida. Ditangiakkon Jesus do muse asa dipabadia goar ni Jahowa. Marende ma nasida mamuji Jahowa. Dukkon i, lao ma nasida sian inganan i. Satokkin nai, lao ditakkup nama Jesus.

Dung tonga borngin, mardalan ma Jesus dohot akka apostelna sian Lembah Kidron tu Dolok Jetun. Bulan purnama do di tikki i. Dung sahat nasida di Taman Getsemane, didok Jesus ma tu akka apostelna, “Toktong ma hamu dison jala toktong ma hamu dungo.” Dung i mardalan ma Jesus tu jolo saotik jala berlutut ma ibana. Marsak hian do roha ni Jesus, alani i martangiang ma ibana tu Jahowa. Ninna ma, “Lomo ni roham ma na saut.” Dung i ro ma malaikat patoguhon roha ni Jesus. Tikki didapotton Jesus muse apostelna, diida ibana ma modom do akka apostel i. Didok Jesus ma, ‘Dungo ma hamu! Unang be sai modom! Ai naeng ditakkup akka musukku nama au.’

Dung i, sahat ma si Judas rap dohot godang halak mamboan podang dohot attuk-attuk tu taman i. Diboto ibana do na disi Jesus. Ai jotjot do nasida lao tu taman i. Nungnga dipaboa si Judas hian tu akka tentara i tanda lao patuduhon na dia Jesus. Didok ibana ma tu Jesus, “Horas Guru!” Dung i diumma ibana ma Jesus. Alai didok Jesus ma, ‘Songon on do caram menghianati au Judas?’

Disukkun Jesus ma tu nasida, ‘Mangalului ise hamu?’ Dialusi nasida ma, “Jesus halak Nasaret i.” Didok Jesus ma, “Au do i.” Mambege i, gabe mundur ma nasida jala mardabuan. Disukkun Jesus ma muse, ‘Ise do na dilului hamu?’ Dialusi nasida ma muse, “Jesus halak Nasaret i.” Didok Jesus ma, ‘Kan nga hudok au do i. Loas hamu ma lao akka muridhon.’

Tikki diida si Petrus na masa i, dibuat ma podangna, ditallik ma pinggol ni si Malkus, budak ni sintua ni malim. Alai dipamalum Jesus do pinggolna i. Didok ma tu si Petrus, ‘Sippan podangmi. Manang ise na mamakke podang, mate do alani podang.’ Ditakkup akka tentara i ma Jesus jala diikkat ma tanganna. Gabe lari ma akka apostelna i. Dung i diboan ma Jesus tu Malim Kepala Hannas. Disukkuni si Hannas ma Jesus, jala disuru ibana ma asa diboan Jesus tu Sintua ni Malim Kayapas. Aha ma na masa tu akka apostel ni Jesus?

Tikki mangarayahon Paska Jesus dohot akka apostelna, didok Jesus do tu nasida, ‘Borngin on, sude do hamu maninggalhon au.’ Didok si Petrus ma, ‘Nang pe sude maninggalhon ho, alai dang hutinggalhon ho.’ Alai didok Jesus ma tu si Petrus, ‘Dang martahuak dope manuk, nungnga tolu hali didok ho na so ditanda ho au.’

Tikki diboan akka tentara i Jesus tu jabu ni si Kayapas, adong do dua apostelna na mangihutton sian pudi. Sada sian nasida, i ma si Petrus. Alai apostel na asing i, lari do maninggalhon Jesus. Diihutton si Petrus do Jesus sahat tu halaman ni jabu ni si Kayapas. Tikki hundul si Petrus di labbung ni api, adong ma sahalak borua na mandok, ‘Hutanda do ho! Dongan ni Jesus do ho kan?’

Didok si Petrus ma, ‘Daong! Dang huboto aha maksudmu!’ Lao ma si Petrus sian labbung ni api i. Alai adong ma muse na mandok tu ibana, ‘Dongan ni Jesus do on!’ Didok si Petrus ma, ‘Dang hutanda ise Jesus i!’ Dung i, adong ma muse bawa na mandok, ‘Muridna do ho kan? Huboto do na sian Galilea ho. Logatmu pe sarupa do dohot Jesus.’ Alai marsumpa ma si Petrus, ninna ma, ‘Dang hutanda ibana!’

Dung i, martahuak ma manuk. Diida Jesus ma tu si Petrus. Gabe diingot si Petrus ma hata ni Jesus. Dung i lao ma si Petrus huhut tangis.

Marpungu ma anggota ni Sanhedrin di jabu ni si Kayapas. Dilului nasida ma hasalaan ni Jesus asa boi dihukum mate ibana. Alai, dang adong dapot ni nasida hasalaan ni Jesus. Ujungna, disukkun si Kayapas ma Jesus, ‘Anak ni Debata do ho?’ Didok Jesus ma, ‘Ido.’ Dung i didok si Kayapas ma muse, ‘Dang porlu be bukti, nungnga dibege hamu ibana mangaleai Debata.’ Setuju ma nasida sude asa dihukum mate Jesus. Dipastap nasida ma Jesus, ditijuri, ditutup matana, jala dipukkuli. Didok nasida ma, ‘Molo nabi do ho, paboa ma tu hami ise na mamukkul ho!’

Marsogotna i, diboan ma Jesus tu pengadilan ni halak Jahudi. Disukkun nasida ma Jesus, ‘Anak ni Debata do ho?’ Dialusi Jesus ma, ‘Ido!’ Dung i, didok nasida ma nungnga dileai Jesus Debata. Diboan nasida ma Jesus tu si Latus, Gubernur ni Rom. Aha do na masa dukkon i? Taida ma di pelajaran berikutna.

Dung diboan akka malim kepala Jesus tu jabu ni si Latus, disukkun si Latus ma nasida, ‘Aha do sala ni bawa on?’ Dialusi akka malim kepala i ma, ‘Didok bawa on, raja do ibana!’ Disukkun si Latus ma Jesus, “Raja ni halak Jahudi do ho?” Dialusi Jesus ma, “Dang sian portibi on Harajaokku.”

Dung i, disuru si Latus ma asa diboan Jesus tu si Herodes, pamaretta ni Galilea. Didok roha ni si Latus atik na boi do dapot ni si Herodes sala ni Jesus. Alai dang adong sala ni Jesus. Alani i, dipaulak ma muse ibana tu si Latus. Dung i, didok si Latus ma tu akka jolma i, ‘Dang adong sala ni bawa on. Bebassonokku nama ibana.’ Alai gogo ma didok nasida, ‘Pamate ma ibana! Pamate ma ibana!’ Dicambuk akka tentara i ma Jesus, ditijuri, jala ditinju. Dibahen nasida ma mahkota sian suga-suga tu ulu ni Jesus. Didok nasida ma, “Horas ma di raja ni halak Jahudi.” Dung i didok si Latus ma muse tu nasida, ‘Dang adong sala ni bawa on.’ Alai gogo ma didok nasida, ‘Hukum mate ma ibana di hau!’ Disuru si Latus ma asa dihukum mate Jesus.

Diboan akka tentara i ma Jesus tu Golgata. Dipakkuhon ma Jesus tu hau, dung i dipajongjong ma hau i. Martangiang ma Jesus, “Ale Amang, sesa ma dosa ni nasida, ai dang diboto nasida na binahen ni nasida i.” Diejek akka jolma i ma Jesus. Ninna ma, ‘Molo anak ni Debata do ho, selamatton ma dirim.’

Adong sahalak parjahat na dipakkuhon di labbung ni Jesus mandok tu ibana, “Ingot ma au molo dung masuk ho tu Harajaonmi.” Didok Jesus ma tu ibana, “Rap do ho dohot au di Paradeiso.” Dung arian, golap ma inganan i saleleng tolu jom. Adong do murid ni Jesus na jongjong di labbung ni hau i, termasuk ma si Maria omak ni Jesus. Didok Jesus ma tu si Johannes asa diurus si Maria omakna i jala dibahen songon omakna sandiri.

Ujungna didok Jesus ma, ‘Nungnga sae be.’ Dung i mate ma ibana. Toppu ma masa gempa na massai gogo. Ribak dua ma tirai na adong di bagas joro di Jerusalem. Gabe didok komandan ni tentara i ma, ‘Tutu do ibana anak ni Debata.’

Dung mate Jesus, ro ma sahalak bawa na mora na margoar si Josep manjuppangi si Latus. Dipangido ibana ma tu si Latus asa dipaloas ibana mambuat mayat ni Jesus. Dung dibuat ibana mayat ni Jesus, dibukkus ma i dohot kain linen na arga jala dibahen ma akka rempah-rempah. Dung i dikubur ma Jesus di kuburan na baru. Dibahen do batu na balga manutup kuburan i. Alai didok akka malim kepala ma tu si Latus, ‘Mabiar do hami dibuat akka murid ni Jesus mayatna i, jala didok nasida ma na mangolu muse ibana.’ Didok si Latus ma, ‘Lao ma hamu. Denggan ma jaga hamu kuburan i.’

Dung tolu ari, ro ma akka borua tu kuburan ni Jesus. Diida nasida ma nungnga guling batu na manutup kuburan i. Adong do malaikat di bagasan kuburan i, jala didok ma tu akka borua i, ‘Unang mabiar hamu. Nungnga mangolu muse Jesus. Lao ma hamu, suru ma akka muridna manjuppangi ibana di Galilea.’

Lao ma si Maria Magdalena paboahon i tu si Petrus dohot tu si Johannes. Ninna ma, ‘Nungnga dibuat halak mayat ni Jesus.’ Lari ma si Petrus dohot si Johannes tu kuburan i. Alai nungnga kosong kuburan i. Alani i, mulak ma nasida tu jabuna.

Ro ma muse si Maria tu kuburan ni Jesus jala diida ma adong dua malaikat disi. Didok ibana ma tu malaikat i, ‘Nungnga ditakko halak Tuanki.’ Dung i, diida ibana ma sahalak bawa. Dirippu ibana do panjaga ni ladang bawa i. Disukkun si Maria ma, ‘Amang, didia do dibahen ho mayat ni Jesus i?’ Didok bawa i ma, “Maria!” Gabe diboto si Maria ma, Jesus do hape bawa i. Didok ibana ma, “Guru!” Dihaol si Maria ma Jesus. Didok Jesus ma muse, ‘Lao ma ho jala paboa ma tu akka muridhu naung pajuppang hita.’ Hatop ma lao si Maria jala dipaboa ma i tu akka murid ni Jesus.

Laos di na sadari i, adong dua murid ni Jesus na mardalan sian Jerusalem naeng lao tu Emmaus. Didapotton sahalak bawa ma nasida. Disukkun ma aha na dihatai nasida. Didok nasida ma, ‘Dang diboto ho? Tolu ari naung salpu, dihukum mate malim kepala do Jesus. Alai adong akka borua mandok, mulak mangolu muse Jesus!’ Disukkun bawa i ma, ‘Na so porsea do hamu tu na didok akka nabi? Kan nungnga didok nasida, ikkon mate do Kristus jala mangolu muse.’ Dipatorang bawa i ma hata ni Debata tu nasida. Dung sahat di Emmaus, ditogihon nasida ma bawa i asa rap dohot nasida. Tikki mangan nasida, dibuat bawa i ma roti jala ditangiakkon. Gabe disadari nasida ma Jesus do hape bawa i. Dung i, pittor toppu ma Jesus mago sian jolo ni nasida.

Hatop ma nasida mulak tu Jerusalem. Dipaboa ma tu akka murid na asing sude na masa tu nasida. Laos di tikki i, ro ma Jesus. Mulana, dang porsea nasida na Jesus do i. Alani i didok Jesus ma, ‘Ida ma tangankon jala tiop hamu ma au. Adong do tarsurat, ikkon mate do Kristus i jala mangolu muse.’

Dung pajuppang Jesus dohot akka apostelna, lao ma si Petrus tu Laut Galilea manjala dekke. Rap do ibana dohot si Tomas, si Jakobus, si Johannes dohot akka murid na asing. Nungnga saborngin nasida manakkup dekke, alai dang adong dope dapot ni nasida.

Marsogotna i, diida nasida ma adong bawa jongjong di topi ni laut i. Disukkun bawa i ma, ‘Adong do dekke dapotmuna?’ Dialusi nasida ma, “Dang adong!” Didok bawa i ma, ‘Sappatton hamu ma jala i tu sabola kanan ni parau i.’ Dung dibahen nasida songon i, godang ma dekke dapot ni nasida sappe gok jala i. Gabe dang boi be ditarik nasida jala i tu parau. Diboto si Johannes ma na Jesus do i. Didok ibana ma, ‘Tuan do i!’ Mangalompat ma si Petrus tu laut jala marlange ma ibana sahat tu topi ni laut. Alai marparau do murid na asing sahat tu topi ni laut.

Dung sahat di topi ni laut, diida nasida ma adong roti dohot dekke naung masak. Disuru Jesus do asa diboan dekke na dapot ni nasida i lao dipanggang. Dung i didok ibana ma, ‘Sarapan ma hamu.’

Disukkun Jesus ma tu si Petrus, ‘Umholong do roham tu au sian na manakkup dekke?’ Dialusi si Petrus ma, ‘Olo Tuan, diboto ho do na holong rohakku tu ho.’ Didok Jesus ma, “Lehon ma mangan anak ni biru-birukki.” Disukkun ma muse, ‘Holong do roham tu au Petrus?’ Didok si Petrus ma, ‘Olo Tuan.’ Didok Jesus ma muse, “Parmahani ma anak ni biru-birukki.” Disukkun Jesus do songon i sappe tolu hali. Gabe lungun ma roha ni si Petrus. Didok si Petrus ma, ‘Sude do diboto ho Tuan. Diboto ho do holong rohakku tu ho.’ Didok Jesus ma muse, “Lehon ma mangan anak ni biru-birukki.” Dung i didok ma muse, “Toktong ma ihutton au.”

Di Galilea, dilehon Jesus ma paretta tu akka muridna. Ninna ma, ‘Lao ma hamu tu sude bangso. Bahen ma nasida gabe siseanku. Ajari ma nasida songon naung huajarhon tu hamu jala didi hamu ma nasida.’ Dung i marjanji ma Jesus, ‘Sai na donganakku do hamu.’

Saleleng 40 ari dung mulak mangolu Jesus, didapotton ibana ma marratus muridna di Galilea dohot di Jerusalem. Dibahen Jesus do akka mukjizat jala diajarhon do tu nasida akka na penting. Na parpudi, pajuppang ma muse Jesus dohot akka muridna di Dolok Jetun.

Sebelumna hea do didok Jesus tikki di Jerusalem, ‘Unang tinggalhon hamu kota on. Torus ma paima hamu janji ni Debata.’ Alai dang diboto akka muridna i dope aha maksud ni Jesus tikki i. Disukkun nasida ma Jesus, ‘Naeng gabe Raja nama ho di Israel?’ Didok Jesus ma, ‘Dang tikkina dope saonari au gabe Raja. Alai satokkin nai, jaloonmu ma tondi parbadia ni Debata. Gabe saksikku ma hamu di Jerusalem, di Judea, dohot di Samaria sahat tu ujung ni portibi on.’

Dung i, naik ma Jesus tu surgo. Ditutupi awan ma ibana. Gabe dang diida akka muridna i be ibana.

Mulak ma akka murid ni Jesus sian Dolok Jetun i tu Jerusalem. Dung i, jotjot ma nasida marpungu jala rap martangiang di kamar parginjang. Sai dipaima nasida do petunjuk sian Jesus.