Nandigan do Dibahen Debata Alam Semesta on?

Na Didok Bibel

Dang dipaboa di Bibel mulai nandigan dibahen Debata tano on jala songon dia Ibana mambahen i. Holan songon on do na didok Bibel, “Di mula ni mulana ditompa Debata langit dohot tano on.” (1 Musa 1:1) Dang adong dipaboa di Bibel nandigan i dimulai. Alai, molo taida sian urutan ni penciptaan di bukku 1 Musa, taboto ma nungnga adong alam semesta on sebelum onom ari periode penciptaan i.

Onom hali 24 jam do periode penciptaan i?

Daong. Marragam do lapatan ni hata “ari” na disurat di Bibel mangihutton aha na dibahas di ayat i. Contohna, adong do ayat na mandok dos songon sadari do onom ari periode penciptaan i.—1 Musa 2:4.

Aha do dibahen Debata saleleng onom ari periode penciptaan i?

Di mulana “tarulang” dope tano on jala dang boi diingani. Jadi dibahen Debata ma tano on asa boi diingani. (1 Musa 1:2) Dung i dibahen Ibana ma akka na mangolu di tano on. Didok Bibel dibahen ma i saleleng onom ari manang onom ari periode penciptaan:

Ari na Parjolo: Dibahen Debata ma asa sahat cahaya tu tano on, gabe adong ma arian dohot borngin.—1 Musa 1:3-5.
Ari na Paduahon: Dibahen Debata ma ruang kosong, na mambagi aek na di tano on dohot aek na di ginjang ni tano on.—1 Musa 1:6-8.
Ari na Patoluhon: Dibahen Debata ma asa tarida tano darat. Dung i dibahen ma asa tubu suan-suanan.—1 Musa 1:9-13.
Ari na Paopatton: Dibahen Debata ma mataniari, bulan dohot akka bintang tarida sian tano on.—1 Musa 1:14-19.
Ari na Palimahon: Dibahen Debata ma binatang na mangolu di aek dohot binatang na boi habang.—1 Musa 1:20-23.
Ari na Paonomhon: Dibahen Debata ma binatang na mangolu di darat dohot jolma.—1 Musa 1:24-31.

Dung sae onom ari periode penciptaan, maradi ma Debata.—1 Musa 2:1, 2.

Sadalan do na disurat di bukku 1 Musa taringot penciptaan tu ilmu pengetahuan?

Dang adong memang dipaboa Bibel sude taringot penciptaan, songon na dibahen di bukku ilmu pengetahuan. Alai mura do diattusi hatorangan na dipaboa Bibel taringot penciptaan. Akka halak na disurat di Bibel pe boi do mangattusi i. Dang maralo na didok Bibel tu ilmu pengetahuan. Ahli astronomi Robert Jastrow mandok, “Nang pe dang sarupa sude hatorangan na dipaboa ilmu pengetahuan tu na disurat di Bibel, alai sarupa do didok na dua i taringot mula ni hangoluan; adong do sada peristiwa na balga jala na tiba-tiba terjadi di sada tikki sahat tu na adong jolma.”

Nandigan do dibahen mataniari, bulan dohot akka bintang?

Nungnga adong hian mataniari, bulan, dohot akka bintang sebelum dibahen Debata langit “di mula ni mulana”. (1 Musa 1:1) Alai, ala hapal hian do atmosfer na adong di ginjang ni tano on gabe dang boi tombus cahaya tu tano on. (1 Musa 1:2) Nang pe tarida cahaya di ari na parjolo, alai dang tarida dope sian dia cahaya i. Di ari na paopatton, lam ias ma atmosfer i. Alani i ma didok Bibel dibahen mataniari, bulan, dohot akka bintang asa “disondangi tano on”, boi ma dokkonon nga tarida be mataniari, bulan dohot akka bintang sian tano on.—1 Musa 1:17.

Nga sadia umur ni tano on didok Bibel?

Dang adong dipaboa Bibel sadia umur ni tano on. Na dipaboa 1 Musa 1:1 marmula do alam semesta on, termasuk tano on. Dang maralo hata on tu ilmu pengetahuan jala dang maralo on tu na didok akka ilmuwan taringot umur ni tano on.