Adong do Ayat ni Bibel i na Bertentangan Dohot Ayat na Asing?

Na didok Bibel

Selaras do sude isi ni Bibel. Adong do ra piga-piga ayat ni Bibel hira na bertentangan idaon. Alai boi do denggan taattusi sude ayat i molo tapakke akka prinsip na di toru on:

1. Pikkirhon ma ikatan kalimatna. Molo dang manat tajaha konteks manang ikatan ni akka kalimatna, boi do gabe dang taattusi aha lapatan ni na tajaha i.

2. Pikkirhon ma sudut pandang ni na manurat Bibel i. Taingot ma tikki adong piga-piga halak mangida sada peristiwa, olo do dang sai sarupa hata dohot perincian na dipakke nasida lao patorakkon i.

3. Pikkirhon ma kebiasaan di tikki i dohot na didok sejarah taringot i.

4. Ikkon boi do tabedahon hata na dipakke disi, holan gambaran do manang na dang.

5. Ingot ma, olo didok sasahalak mangulahon sada ulaon hape dang ibana sandiri na langsung mangulahon i.a

6. Pakke ma terjemahan ni Bibel na akurat manang sittong.

7. Tapaloas ma Bibel i na mangajari hita. Jala, unang ma tacampur i tu ajaran ni agama na so sittong.

Di toru on adong piga-piga ayat ni Bibel na idaon hira bertentangan tu ayat na asing. Ida ma songon dia akka prinsip nakkin boi patorakkon taringot i.

Prinsip 1: Ikatan kalimat

Boasa didok tetap dope karejo Debata hape nungnga maradi Ibana di ari papituhon? Di bukku 1 Musa didok do, “maradi ma [Debata] sian sude ulaonna di ari papituhon”. Molo taida ikatan kalimatna, maksud ni hata ulaon dison dang na sude ulaon ni Debata. Alai maksudna, ulaonna tikki manoppa tano on dohot nasa isina do. (1 Musa 2:​2-4) Jadi tikki didok Jesus, “toktong do karejo [Debata] sahat tu saonari”, dang bertentangan i tu ayat na dipaboa di bukku 1 Musa i. Alana na dihatai Jesus dison, i ma akka karejo na asing na diulahon Debata. (Johannes 5:​17) Misalna, manogu-nogu dohot manjaga jolma jala mangurupi akka halak na manurat Bibel.​—Psalmen 20:6; 105:5; 2 Petrus 1:​21.

Prinsip 2 dohot 3: Sudut pandang ni panurat Bibel dohot bukti sejarah

Didia do sasittongna dipamalum Jesus sahalak bawa na mapitung? Didok di bukku Lukas, dipamalum Jesus ma sahalak bawa na mapitung “dung jonok [ibana] tu Jeriko”. Hape didok di bukku Mateus, Jesus pamaluppon dua halak bawa na mapitung “tikki kaluar nasida sian Jeriko”. (Lukas 18:35-​43; Mateus 20:29-​34) Sebenarna saling melengkapi do dua catatan on nang pe disurat sian dua sudut pandang na berbeda. Memang lebih terperinci do catatan ni si Mateus. Dipaboa ibana do adong dua bawa na mapitung. Alai molo si Lukas fokus tu bawa na mapitung na makkatai dohot Jesus. Molo taringot lokasina, akka arkeolog mandok adong dua kota Jeriko di jaman ni Jesus. Na parjolo, i ma kota na leleng na dibangun halak Jahudi. Jala na paduahon, i ma kota na baru na dibangun halak Rom. Hira-hira sada satonga kilometer (1,5 km) ma jarak ni dua kota on. Jadi olo do ra, posisi ni Jesus tikki na mambahen mukjizat i, di antara ni kota na leleng dohot kota na baru.

Prinsip 4: Holan gambaran do manang na dang

Na lao hancur do tano on? Di Parjamita 1:4 didok, “Hot do anggo tano on saleleng ni lelengna”. Hape di 2 Petrus 3:​10 didok, na lao “malala ma . . . tano on”. Molo di Bibel hata “tano on”, adong dua lapatanna. Na parjolo lapatanna planet bumi on, jala na paduahon lapatanna akka jolma na di tano on. (1 Musa 1:1; 11:1) Jadi tikki didok di 2 Petrus 3:​10 na lao malala “tano on”, dang na maksudna na lao dihancurhon planet bumi on. Alai maksudna disi, “akka [jolma] na so pasangappon Debata” do lao dihancurhon.​—2 Petrus 3:7.

Prinsip 5: Ise do na mangulahon sada tindakan

Ise do na ro mangido bantuan ni Jesus tikki di Kapernaum? Di Mateus 8:​5, 6 didok, ro do sahalak perwira mandapotton Jesus lao mangido bantuan. Hape di Lukas 7:3 didok, akka pangituai ni halak Jahudi do na disuru perwira i mandapotton Jesus. Molo taida sekilas, hira na bertentangan do dua ayat on. Alai molo taida ikatan kalimatna, gabe taboto ma perwira i do na naeng mangido bantuan sian Jesus. Alai dang ibana na langsung ro mandapotton Jesus, akka pangituai ni halak Jahudi do na disuru ibana.

Prinsip 6: Terjemahan na akurat manang sittong

Sude do jolma mardosa? Didok di Bibel, nungnga mardosa be sude jolma alani dosa ni si Adam. (Rom 5:​12) Alai adong do piga-piga terjemahan ni Bibel hira na bertentangan tu ajaran on. Contohna adong do terjemahan ni Bibel na mandok molo halak na burju “dang mardosa”. (1 Johannes 3:6, Lembaga Alkitab Indonesia) Alai molo tapareso teks aslina di bahasa Junani, hata “dosa” na dipakke di 1 Johannes 3:6 i, kata kerja do i. Maksudna, i ma sada tindakan na torus diulahon. Jadi adong do perbedaan ni dosa na tawarisi sian si Adam tu dosa na sengaja jala torus taulahon. Molo dosa sian si Adam, dang boi i tahindari. Alani i do piga-piga terjemahan ni Bibel menerjemahon ayat i gabe, “dang diulahon dosa” manang “dang torus mangulahon dosa”.​—Terjemahan Tano na Imbaru; Bahasa Indonesia Masa Kini.

Prinsip 7: Bibel ma na taparsiajari, dang ajaran ni akka agama

Sarupa do Jesus dohot Debata? Hea do didok Jesus, “Sada do au dohot Ama i.” Alai hea do muse didok ibana, “Umbalga do Damang i sian au.” Molo taida, hira na bertentangan do dua ayat on. (Johannes 10:30; 14:28) Alani i, asa taboto aha do sebenarna maksud ni akka ayat i, ikkon taparsiajari do aha na didok Bibel taringot Jahowa dohot Jesus. Jala, unang ma tahubung-hubungkon ayat i tu akka ajaran ni agama na so sesuai tu ajaran ni Bibel, songon ajaran taringot debata Sitolusada. Didok do di Bibel molo Jahowa i Bapak ni Jesus jala Debata na disomba Jesus. (Mateus 4:​10; Markus 15:34; Johannes 17:3; 20:17; 2 Korint 1:3) Jadi dang sarupa Jesus dohot Debata.

Molo taida ikatan kalimatna, tikki didok Jesus “sada do au dohot Ama i”, maksud ni Jesus disi sarupa do tujuan ni nasida. Alana hea do muse didok Jesus, “Marsada do Ama i dohot au, jala marsada do au dohot Ama i.” (Johannes 10:38) Asing ni i, sarupa do muse tujuan ni Jesus dohot akka siseanna. Di tangiangna, hea do didok Jesus, “Nungnga hulehon hasangapon tu nasida, i ma hasangapon na dilehon Ho tu au, asa gabe sada nasida songon Ho na sada dohot au. Marsada do au dohot nasida, jala marsada do Ho dohot au.”​—Johannes 17:22, 23.