PELAJARAN 26
Boasa Susa Hita Jala Godang Hajahaton di Portibi on?
Tikki susa hita, olo do gabe sukkun-sukkun rohatta, “Boasa ma terjadi on tu au?” Alai pasti las do rohatta ala dipaboa do alus ni i di Bibel!
1. Aha do na dibahen Sibolis makana adong hajahaton di portibi on?
Dialo Sibolis do Debata. Lomo do rohana asa ibana na mamaretta di alam semesta on. Alani i dipengaruhi ibana ma jolma na parjolo, i ma si Adam dohot si Hawa asa mangalo tong tu Debata. Jadi digabusi ibana ma si Hawa. (1 Musa 3:1-5) Hira na didok Sibolis ma tu si Hawa, adong na denggan na ditabunihon Jahowa sian nasida. Didok ibana do muse, dang ikkon dioloi jolma hata ni Debata asa boi marlas ni roha. Jala didok Sibolis, dang na tutu mate si Hawa molo tung pe diallang ibana parbue ni hau i. Alani i ma didok Bibel Sibolis i ‘pargabus jala ama ni gabus’.—Johannes 8:44.
2. Aha do ujungna na diulahon si Adam dohot si Hawa?
Burju hian do Jahowa tu si Adam dohot si Hawa. Diloas Ibana do diallang nasida sude parbue ni hau na di Taman Eden. Holan sada do na so boi diallang nasida. (1 Musa 2:15-17) Alai dialo nasida do Debata. Didok di Bibel, ‘Diputikkon si Hawa ma parbue ni hau i jala dipangan.’ Jala dohot do tong si Adam mangallang i. (1 Musa 3:6) Tikki i sempurna do si Adam dohot si Hawa. Jadi sebenarna dang maol di nasida lao mangulahon na sittong. Alai dialo nasida do Debata. Ujungna mardosa ma nasida jala dang olo be nasida diatur Debata. Gabe susa ma nasida alani i.—1 Musa 3:16-19.
3. Aha do akibat keputusan ni si Adam dohot si Hawa tu hita?
Dung mardosa si Adam dohot si Hawa, dang sempurna be nasida. Jala dohot do sude pinopparna gabe dang sempurna. Didok di Bibel, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.”—Rom 5:12.
Adong do piga-piga alasan na mambahen hita susa. Contohna, olo do gabe susa hita alani kesalahanta sandiri. Boi do tong hita susa alani kesalahan ni halak. Jala boi do tong hita susa ala masa kejadian na so terduga tu hita.—Jaha Parjamita 9:11.
ASA LAM TAATTUSI
Taparsiajari ma boasa boi tadok dang Debata na mambahen hajahaton dohot hasusaan di portibi on. Jala boha do perasaanna tikki susa hita.
4. Alani ise do hita susa?
Godang halak mandok, Debata do na mangarajai portibi on. Toho do i? Putar ma VIDEO.
Jaha ma Jakobus 1:13 dohot 1 Johannes 5:19, dung i bahas ma sukkun-sukkun on:
Toho do Debata na mambahen hita susa jala na mambahen adong hajahaton?
5. Aha do akibatna ala Sibolis na mangarajai portibi on?
Jaha 1 Musa 3:1-6, dung i bahas ma sukkun-sukkun on:
Aha do na didok Sibolis tu si Hawa?—Ida ayat 4 dohot 5.
Sian hata ni Sibolis i, boasa ma diorai Jahowa nasida mangallang parbue ni hau i?
Menurut Sibolis, porlu do jolma diparetta Jahowa asa marlas ni roha?
Jaha Parjamita 8:9, dung i bahas ma sukkun-sukkun on:
Aha do na terjadi ala dang Jahowa dope na mamaretta portibi on?
Sempurna do si Adam dohot si Hawa tikki di Taman Eden. Alai dialo nasida do Jahowa jala diihutton Sibolis
Dung mardosa jolma, gabe godang ma hasusaan dohot hamatean di portibi on
Satokkin nai, bahenon ni Jahowa ma dang adong be dosa, hasusaan, dohot hamatean. Sempurna ma jolma jala mangolu saleleng ni lelengna di Paradeiso
6. Parduli do Jahowa tu hita
Boha do perasaan ni Debata molo susa hita? Jaha ma na didok Raja Daud dohot Apostel Petrus. Jaha Psalmen 31:7 dohot 1 Petrus 5:7, dung i bahas ma sukkun-sukkun on:
Boha do perasaanmuna mamboto na parduli do Jahowa tu hamu?
7. Dang adong be hasusaan satokkin nai
Jaha Jesaya 65:17 dohot Pangungkapon 21:3, 4, dung i bahas ma sukkun-sukkun on:
Boha do perasaanmuna mamboto dang adong be sitaonon satokkin nai?
Diboto hamu do?
Tikki margabus Sibolis, difitnah manang diparoa-roa ibana do Jahowa. Didok ibana dang adil Debata jala dang denggan carana mamaretta. Alani i, porlu do dipabadia goar ni Jahowa. Haduan tikki dang adong be hasusaan, boi ma dipatudu Jahowa dang toho hata ni Sibolis i. Jala holan Ibana do na denggan mamaretta. Jadi saonari, pabadiahon goar ni Jahowa ma na paling penting di alam semesta on.—Mateus 6:9, 10.
ADONG DO NA MANDOK: “Na manguji haporseaotta do Debata makana dibahen hita susa.”
Molo adong na mandokkon songon i, boha do alusmuna?
KESIMPULAN
Alani Sibolis, si Adam, dohot si Hawa do makana godang hasusaan dohot hajahaton di portibi on. Alai parduli do Jahowa tu hita. Satokkin nai, bahenonna ma dang adong be hasusaan di portibi on.
Tinjauan
Aha do na didok Sibolis tu si Hawa?
Aha do akibatna tu hita ala mangalo si Adam dohot si Hawa tu Debata?
Aha do buktina na parduli do Jahowa tu hita?
LULUI MA
Jaha ma aha do na didok Bibel taringot dosa.
Jaha ma aha do na didok Sibolis taringot Debata tikki di Taman Eden.
“Boasa Dipasombu Debata Hita Susa?” (Joujou Paboahon, 1 Januari 2014)
Ida ma alus ni sukkun-sukkun na ro tu roha ni piga-piga halak.
Tonton ma pengalaman ni sahalak bawa naung mamboto boasa godang hasusaan di portibi on.