7. (a) Aha do janji ni si Hanna, jala boasa didok ibana songon i? Aha do hasilna? (b) Aha do pangkorhon ni janji ni si Hanna tu si Samuel? (Ida surat na di toru.)

⁷ Marjanji do si Hanna tu Jahowa tingki marsak ibana. Susa do ngoluna jala direhei ala ndang boi marianakhon. (1 Sam. 1:4-7, 10, 16) Dipatolhas si Hanna ma pangkilalaanna tu Jahowa, jala marjanji do ibana, ”Ale Jahowa Zebaot! Molo ditatap roham pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse tu Jahowa saleleng mangolu ibana, jala ndang jadi hona raut parnabung uluna.”a (1 Sam. 1:11) Ditangihon Jahowa do tangiang ni si Hanna. Dung salpu sataon, tubuan anak ma ibana, digoari ma anakna i si Samuel. Las situtu roha ni si Hanna! Alai diingot ibana do janjina tu Debata. Dung tubu si Samuel, didok si Hanna, ”Ai sian Jahowa ibana hupangido.”​—1 Sam. 1:20.