• Sai Rade do Jahowa Mengampuni Hita
    Joujou Paboahon (Edisi Siparsiajaran)—2022 | Juni

    • RADE DO JAHOWA MENGAMPUNI

      4. Boasa boi pos rohatta na olo Jahowa mengampuni hasalaatta?

      4 Dipaboa do di Bibel na rade do Jahowa mengampuni hita. Hea do makkatai Jahowa tu si Musa marhite sada suru-suruan di Dolok Sinai. Didok Ibana, “Au do Jahowa, Debata na burju jala parasi roha. Au do Jahowa na lambat tarrimas, jala gok holong ni roha dohot hasittongan. Hupatudu do holong ni roha tu marribu halak. Jala husesa do hasalaan ni halak, hajahatonna, dohot dosana.” (2 Mus. 34:6, 7) Burju do Jahowa, jala asi do rohana tu sude halak na botul-botul bertobat.​—Neh. 9:17; Ps. 86:15.

      Psalmen 103:13, 14 mandok, “Takkas do diboto Ibana songon dia hita ditoppa”. Gambar ni sahalak donganta borua, jala di sakalilingna adong akka fotona tikki gelleng sahat tu na magodang ibana.

      Diboto Jahowa do sude na masa di ngolutta (Ida paragraf 5)

      5. Ala takkas do ditanda Jahowa hita songon na dipaboa di Psalmen 103:13, 14, songon dia ma perasaanna mangida hita?

      5 Jahowa do na manoppa hita. Jadi takkas do ditanda Ibana hita. Pikkirhon ma, ditanda Ibana do ganup halak na adong di tano on jala diboto Ibana do sude taringot nasida. (Ps. 139:15-17) Alani i pasti diboto Ibana do dang sempurna hita sude mulai sian na tubu. Takkas do diboto Ibana songon dia latar belakangta jala aha na hea masa di ngolutta. Ala diboto Jahowa do sudena i, songon dia ma perasaanna mangida hita? Gabe asi do rohana tu hita.​—Ps. 78:39; jaha Psalmen 103:13, 14.

      6. Songon dia do Jahowa patuduhon na rade Ibana mengampuni hita?

      6 Dipatudu Jahowa do na rade Ibana mengampuni hita. Diattusi Ibana do alani tindakan ni si Adam do umbahen na mardosa jala mate hita sude. (Rom 5:12) Dang adong halak na boi manobus dirina manang donganna sian dosa dohot hamatean. (Ps. 49:7-9) Alai asi do roha ni Debata tu hita, gabe dibahen Ibana ma pengaturan asa boi hita malua sian i. Songon na dipaboa di Johannes 3:16, dilehon Jahowa do Anakna na sasada i mate humokkop hita. (Mat. 20:28; Rom 5:19) Rade do Jesus dihukum mate asa boi ganup halak na porsea tu ibana malua sian dosa dohot hamatean. (Heb. 2:9) Pasti lungun hian do roha ni Jahowa mangida parmate ni Anakna i. Alai ala lomo hian roha ni Jahowa mengampuni hita, dilehon Ibana do Anakna i mate lao manesa dosatta.

      7. Akka ise do halak na hea diampuni Jahowa?

      7 Di Bibel, godang do dipaboa akka halak na diampuni Jahowa. (Eps. 4:32) Ise ma hira-hira na diingot hamu? Diingot hamu do ra Raja Manasse. Godang do akka na jahat na diulahon ibana. Disomba ibana do debata na so sittong jala dijujui ibana do halak na asing mangulahon na sarupa. Ditutung ibana do anakna gabe pelean tu debata na so sittong. Dipajongjong ibana do muse akka langgatan tu debata na so sittong di bagas joro. Bibel mandok, “Massai godang do hajahaton na dibahen si Manasse di jolo ni Jahowa na mambahen haccit rohana.” (2 Kron. 33:2-7) Alai tikki dipatudu si Manasse na botul-botul ibana bertobat, diampuni Jahowa do ibana. Bahkan dibahen Jahowa do muse ibana gabe raja. (2 Kron. 33:12, 13) Contoh na asing, i ma Raja Daud. Hea do ibana berzina jala mambunu halak na so marsala. Alai tikki diakkui si Daud dosana jala botul-botul ibana bertobat, diampuni Jahowa do ibana. (2 Sam. 12:9, 10, 13, 14) Akka contoh on paposson rohatta na rade do Jahowa mengampuni hita. Saonari tabahas ma, aha na mambahen berbeda cara ni Jahowa mengampuni tu cara ni jolma mengampuni.