“Jou-Jou do Bisuk i”

1. Songon dia do pandangan ni godang halak taringot bisuk ni Jahowa? (Poda 1:20, 21)

DI GODANG negara, jotjot do akka donganta marbarita na uli di inganan na rame mamakke rak beroda. Ramah do akka donganta i. Ditawarhon do akka sijahaon tu akka halak na lewat. Hea do ra hamu dohot tu ulaon i. Jadi pasti diattusi hamu do ilustrasi na adong di bukku Poda na mandok, ‘joujou do bisuk na sittong i di inganan na rame asa dibege akka halak podana i’. (Jaha Poda 1:20, 21, surat na di toru.) Boi do dapot ni akka halak “bisuk na sittong”, i ma bisuk sian Jahowa, molo dijaha nasida Bibel dohot akka publikasitta. Porlu do dapot ni nasida bisuk sisongon i, asa dapot ni nasida hangoluan na saleleng ni lelengna. Alani i do las rohatta molo adong halak na olo mambuat publikasitta. Alai dang sude halak songon i. Adong do na so berminat tu ajaran ni Bibel. Na asing diparekkeli do hita. Jala adong do na marpikkir, nungnga ketinggalan jaman isi ni Bibel i. Bahkan adong do na makkritik ajaran ni Bibel taringot standar moral. Didok nasida, halak na mangihutton standar moral ni Bibel i halak na kaku jala merasa dirina sittong. Nang pe songon i, parasi roha do Jahowa. Sai diurupi Ibana do akka halak asa boi marbisuk. Songon dia ma carana?

2. Sian dia do dapotta bisuk ni Jahowa, alai aha do na diulahon godangan halak?

² Dipaboa Jahowa do bisukna di Bibel, jala hampir sude do halak boi manjaha i. Adong do muse bisuk sian Jahowa di publikasitta, na adong di lobi sian 1.000 bahasa. Godang do manfaatna molo olo hita manjaha jala mangulahon bisuk na taparsiajari i. Alai godang do halak na so olo manangihon Jahowa. Tikki mambahen keputusan, lomo ni roha ni nasida sandiri do na diihutton. Manang diihutton nasida do bisuk ni akka jolma. Leas do roha ni nasida tu hita ala taulahon prinsip ni Bibel. Jadi di artikel on tabahas ma, boasa akka halak dang olo manangihon bisuk ni Debata. Alai na parjolo, tabahas ma jo songon dia carana mandapot bisuk sian Jahowa.

PARBINOTOAN TARINGOT JAHOWA MAMBAHEN HITA MARBISUK

3. Songon dia do carana asa dapotta bisuk sian Jahowa?

³ Halak na marbisuk, dipakke do parbinotoanna lao mambahen keputusan na denggan. Alai asa boi botul-botul marbisuk, dang cukkup holan i. Didok Bibel, “Biar mida Jahowa do parmulaan ni bisuk, jala parbinotoan taringot Debata Nabadia i do na mambahen halak mamboto dia na sittong dohot dia na sala.” (Poda 9:10) Jadi tikki naeng mambahen keputusan na penting, porlu do taihutton cara marpikkir ni Jahowa. Carana tapareso ma isi ni Bibel dohot akka publikasitta. Molo taulahon i, dapotta ma bisuk na sian Jahowa.​—Poda 2:5-7.

4. Boasa tadok holan Jahowa do na boi mangurupi hita asa botul-botul marbisuk?

⁴ Holan Jahowa do na boi mangurupi hita asa botul-botul marbisuk. (Rom 16:27) Boasa tadok songon i? Alasan na parjolo, Ibana do na manoppa saluhutna. Jadi holan Ibana do na takkas mamboto sude taringot toppaanna. (Ps. 104:24) Na paduahon, sude tindakan ni Jahowa patuduhon bisukna. (Rom 11:33) Na patoluhon, selalu do bermanfaat bisuk ni Jahowa. (Poda 2:10-12) Jadi asa boi hita gabe halak na botul-botul marbisuk, ikkon taattusi do tolu alasan i jala tapakke ma i tikki mambahen keputusan.

5. Aha do akibatna ala dang olo akka halak mangalului bisuk ni Jahowa?

⁵ Godang do halak mangakkui luar biasa do alam semesta on. Alai dang olo nasida mangakkui na adong do Panoppa. Sebalikna tu evolusi do nasida porsea. Na asing mandok porsea do ibana tu Debata, alai dilanggar ibana do prinsip ni Bibel ala didok rohana nungnga ketinggalan jaman i. Jadi dipillit nasida do lomo ni roha ni nasida sandiri. Boha do hasilna? Gabe lam denggan do portibi on ala diandalhon nasida pikkiran ni nasida sandiri? Adong do harapan ni nasida na pasti? Boi do nasida botul-botul marlas ni roha? Daong. Sude na masa di sakalilingta paposson rohatta tutu do na didok di ayat on, “Molo adong bisuk, parbinotoan, dohot poda na maralo tu lomo ni roha ni Jahowa, dang boi dohonon i sittong.” (Poda 21:30) Gabe bertekad ma hita lao mangalului bisuk sian Jahowa. Alai memang godangan halak dang olo mangulahon i. Boasa?

BOASA ADONG NA SO OLO MANANGIHON BISUK NI JAHOWA?

6. Sesuai tu Poda 1:22-25, halak na songon dia do na so olo manangihon bisuk ni Jahowa?

⁶ Godang do halak saonari dang olo mambege bisuk “na joujou di dalan”. Bibel mandok adong tolu kelompok na so olo manangihon bisuk, i ma “akka na so marpengalaman”, “akka pangarehei”, dohot “akka na oto”. (Jaha Poda 1:22-25.) Tabahas ma boasa dang olo nasida manangihon bisuk ni Jahowa, jala songon dia carana asa unang tatiru nasida.

7. Boasa dang olo muba akka halak “na so marpengalaman” i?

⁷ Halak “na so marpengalaman”, i ma halak na porsea tu sude na dibegena jala mura dioto-otoi. (Poda 14:15) Jotjot do juppangta halak sisongon i tikki marbarita na uli. Godang do halak saonari na ditipu akka pamimpin agama dohot akka pamimpin politik. Tarsonggot do ra nasida tikki mamboto dioto-otoi akka pamimpin i nasida. Alai halak “na so marpengalaman” na dipaboa di Poda 1:22 i dang olo muba, ai lomo do roha ni nasida tu sudena i. (Jer. 5:31) Lomo do roha ni nasida mangihutton keinginanna sandiri. Dang olo nasida mangalului aha na didok Bibel jala mangulahon i di ngoluna. Adong do sahalak borua na taat beragama di Quebec, Kanada, mandok songon on tu donganta, “Molo tung pe ditipu pamimpin agama hami, dosana ma i. Dang dohot hami mardosa disi.” Godang do halak na songon borua i. Alai dang olo hita maniru nasida. Ai sengaja do nasida manolak bisuk ni Jahowa.​—Poda 1:32; 27:12.

8. Aha do na mangurupi hita asa gabe halak na marbisuk?

⁸ Dijujui Bibel do hita asa ‘unang songon pikkiran ni dakdanak pikkiranta, alai songon pikkiran ni halak na magodang ma’. (1 Kor. 14:20) Asa boi hita marbisuk, porlu do taulahon prinsip ni Bibel. I ma na mangurupi hita pasaehon masalah jala mambahen keputusan na denggan. Jadi denggan do molo sai tapareso diritta. Contohna, molo nungnga taratur hamu marsiajar Bibel jala ro marpungu, pikkiri ma boasa dang tergerak dope hamu mangalehon diri tu Jahowa jala tardidi. Molo nungnga tardidi hita, berupaya do hita asa lam denggan marbarita dohot mangajari? Akka prinsip ni Bibel do na tapakke tikki mambahen keputusan? Sifat ni Jesus do na tatiru tikki berurusan dohot na asing? Molo taida adong na porlu dipadenggan, berupaya ma hita padenggatton i. Jala taingot ma, sipasingot na sian Jahowa boi do mambahen halak ‘na so marpengalaman gabe marbisuk’.​—Ps. 19:7.

9. Sian dia taboto na so olo “akka pangarehei” manangihon bisuk ni Jahowa?

⁹ Kelompok na paduahon na so olo manangihon bisuk ni Jahowa, i ma “akka pangarehei”. Hea do ra tajuppangi halak sisongon on tikki marbarita na uli. Lomo do roha ni nasida mangarehei na asing. (Ps. 123:4) Nungnga dipaboa di Bibel, lam godang do akka pangarehei di ari parpudi. (2 Ptr. 3:3, 4) Godang do halak saonari na songon hela ni si Lot, na so olo manangihon sipasingot sian Jahowa. (1 Mus. 19:14) Direhei nasida do akka halak na mangihutton prinsip ni Bibel, jala diihutton nasida do “hisap-hisap ni nasida na jahat”. (Jud. 7, 17, 18) Dipaboa do di Bibel, akka halak na murtad dohot akka halak na manolak bisuk ni Jahowa termasuk do tu kelompok ni akka pangarehei.

10. Sesuai tu Psalmen 1:1, songon dia do carana manjaga diritta sian akka pangarehei?

¹⁰ Songon dia do carana manjaga diritta sian akka pangarehei? Unang ma bergaul hita dohot akka halak na kritis. (Jaha Psalmen 1:1.) Jala unang ma olo hita manjaha sijahaon na dibahen halak na murtad manang mambege hata ni nasida. Molo dang hati-hati, boi do gabe halak na kritis hita, jala gabe taraguhon ma bimbingan ni Jahowa dohot akka petunjuk sian organisasi. Tasukkun ma diritta, ‘Molo adong petunjuk manang pemahaman na baru, olo do au mangihutton i? Jotjot do au makkritik jala mangida hasalaan ni akka dongan bawa na manguluhon di huria?’ Molo hatop tapadenggan kelemahanta i, las ma roha ni Jahowa tu hita.​—Poda 3:34, 35.

11. Songon dia do tanggapan ni “halak na oto” tu standar ni Jahowa?

¹¹ Kelompok na patoluhon na so olo manangihon bisuk ni Jahowa, i ma “halak na oto”. Didok do nasida oto ala dang olo mangihutton standar ni Jahowa. Sebalikna nasida holan mangulahon aha na sittong menurut nasida. (Poda 12:15) Ditolak nasida do Jahowa, Haroroan ni bisuk i. (Ps. 53:1) Hea do ra pajuppang hita dohot halak sisongon i tikki marbarita. Dikritik nasida do hita ala mangihutton prinsip ni Bibel. Hape sasittongna, dang adong na denggan sian nasida. Bibel mandok, “Dang na lao marbisuk halak na oto, jala dang adong sidohononna di gerbang ni kota.” (Poda 24:7) Dang adong dapotta nasehat na denggan sian halak na oto. Alani i dipasingot Jahowa do hita asa mandao “sian halak na oto”!​—Poda 14:7.

12. Aha do na boi mangurupi hita asa unang songon halak na oto?

¹² Godang do halak na so olo manangihon bisuk ni Jahowa. Alai hita dang songon i. Tahaholongi do patik ni Jahowa jala taulahon do i. Boi do lam togu holongta i molo tabandingkon songon dia parngoluon ni halak na mangoloi Jahowa dohot halak na so mangoloi Jahowa. Songon na taida, godang do masalah ni akka halak na oto ala manolak bisuk ni Jahowa. Alai molo halak na mangoloi Jahowa, dao do undenggan ngolu ni nasida.​—Ps. 32:8, 10.

13. Dipaksa Jahowa do hita asa olo manangihon bisukna i?

¹³ Lomo do roha ni Jahowa asa sude halak manangihon bisukna, alai dang dipaksa Ibana manang ise pe manjalo i. Nang pe songon i, dipaboa Ibana do akibatna molo dang olo manangihon bisukna. (Poda 1:29-32) “Jaloon ni nasida ma upa ni pambahenan ni nasida”. Gabe marsak ma nasida, susa ngoluna, jala ujungna pamateon ni Jahowa ma nasida saleleng ni lelengna. Alai aha do upa ni halak na manangihon bisuk ni Jahowa? Marjanji do Jahowa, “Na lao dame do ngolu ni halak na manangihon Au jala dang mabiar nasida molo ro jea.”​—Poda 1:33.

BERMANFAAT DO MANGIHUTTON BISUK NI JAHOWA

14-15. Aha do na boi taparsiajari sian Poda 4:23?

¹⁴ Tikki taulahon bisuk ni Jahowa selalu do adong manfaatna. Songon naung tabahas nakkin, dang maol mandapot bisuk ni Jahowa. Misalna, di bukku Poda disurat do godang nasehat na mambahen hita marbisuk jala na marguna saleleng ni lelengna. Saonari tabahas ma jo opat contohna.

¹⁵ Jaga ma roham. Bibel mandok, “Sian sude na ikkon jagaonmu, jaga ma roham, ai sian i do ro hangoluan.” (Poda 4:23) Coba ma jo tapikkirhon on: Aha do na ikkon taulahon asa sehat jantungta? Tajaga ma sipanganonta, olahraga ma hita, jala tahindari ma kebiasaan na so denggan. Sarupa songon i ma, ikkon tajaga do tong rohatta. Carana, tajaha ma Bibel ganup ari, tapersiappon ma bahan tu parpunguan, taratur ma hita marpungu, mangalean komentar ma hita, ringgas ma hita marbarita na uli, jala tajaga ma asa toktong ias pikkiranta. Unang ma tatotton akka hiburan na patuduhon seks na so patut, jala unang ma mardongan hita tu halak na so hasea pangalahona.

16. Aha do manfaatna molo taihutton nasehat di Poda 23:4, 5?

¹⁶ Puas ma tu akka na adong di hita. Bibel mandok, “Unang ma marsitutu ho mangalului hamoraon. . . . Tikki diida ho hamoraon i, dang disi be i, ai marhabong do i songon lali dung i habang tu langit.” (Poda 23:4, 5) Sian ayat on taboto ma, boi do hatop habis hepeng dohot arta. Alai godang halak saonari, na mora dohot na pogos holan mamikkiri hepeng. Rela do nasida sega reputasina, sega hubunganna tu na asing, bahkan sappe marsahit holan alani hepeng. (Poda 28:20; 1 Tim. 6:9, 10) Sebalikna bisuk ni Jahowa boi do mangurupi hita asa seimbang. Dang holan hepeng be na sai tapikkiri, alai gabe puas ma hita tu akka na adong di hita.​—Pjm. 7:12.

17. Sesuai tu Poda 12:18, songon dia do “hata ni halak na marbisuk” i?

¹⁷ Tapikkiri ma aha sidohonotta. Molo dang manat hita, boi do gabe haccit roha ni na asing mambege hatatta. Bibel mandok, “Dos songon podang na manikkam do akka hata na asal dipandok, alai pamaluppon do hata ni halak na marbisuk.” (Poda 12:18) Asa toktong denggan hubungatta tu na asing, unang ma margosip hita. (Poda 20:19) Dung i ikkon taratur do hita manjaha jala mangarimangi isi ni Bibel, asa boi hatatta i patoguhon na asing. (Luk. 6:45) Hasilna gabe songon “haroro ni bisuk” ma akka hata na tadok.​—Poda 18:4.

18. Songon dia do nasehat di Poda 24:6 mangurupi hita marhasil marbarita na uli dohot mangajari?

¹⁸ Ihutton ma petunjuk. Bibel mandok, “Molo marporang ho, ihutton ma poda sian halak na marbisuk, jala boi do monang molo godang na mamodai.” (Poda 24:6) Molo taihutton prinsip na adong di ayat on, boi ma i mangurupi hita asa marhasil marbarita na uli dohot mangajari. Nang pe nungnga terbiasa hita mamakke sada cara, alai tacoba ma akka cara na asing na dilehon organisasi. Di parpunguan, diajari do hita asa malo marbarita na uli dohot mangajari. Disediahon organisasi do muse akka alat na efektif. Contohna akka publikasi dohot video na boi mangurupi hita mangajarhon isi ni Bibel tu na asing. Berupaya do hamu asa lam terampil mamakke i?

19. Tikki tabege bisuk ni Jahowa, songon dia do perasaanta? (Poda 3:13-18)

¹⁹ Jaha Poda 3:13-18. Marlas ni roha do hita ala boi tabege bisuk ni Jahowa i sian Bibel. Boi do tabayakkon songon dia parngoluotta molo dang adong i. Pasti dang bahagia hita. Di artikel on, nungnga tabahas akka nasehat ni Jahowa na adong di bukku Poda na boi mangurupi hita asa marbisuk. Alai sasittongna sude do isi ni Bibel i boi mambahen hita marbisuk. Jadi berupaya ma hita mamparsiajari jala mangulahon i. Nang pe godang halak saonari dang mangargai bisuk ni Jahowa i, alai molo ‘sai marsitiopan hita tusi, marlas ni roha ma hita’.