Aha do Maksudna ‘Makkaholongi Musutta’?
Na didok Bibel
Tikki marjamita Jesus di dolok didok ibana do, “Toktong ma haholongi musum.” (Mateus 5:44; Lukas 6:27, 35) Maksud ni Jesus disi, ikkon tahaholongi do halak na marsogo ni roha tu hita manang na mambahen na so adil tu hita.
Lao patuduhon na dihaholongi Jesus akka musuna, olo do ibana mengampuni halak na mambahen na jahat tu ibana. (Lukas 23:33, 34) Ajaran ni Jesus taringot makkaholongi musu sesuai do tu na disurat di Akka Bukku Heber, na biasana didok Perjanjian Lama.—2 Musa 23:4, 5; Poda 24:17; 25:21.
“Toktong ma haholongi musum jala tangiakkon ma halak na mambahen na haccit tu hamu.”—Mateus 5:43, 44.
Dibahas ma di artikel on
Boasa ikkon tahaholongi musutta?
Lao maniru Debata. “Ai burju do [Debata] tu halak na so mamboto mandok mauliate dohot tu halak na jahat.” (Lukas 6:35) Jala “dipabissar Ibana do mataniari tu akka parjahat”.—Mateus 5:45.
Holong na tapatudu boi do mambahen musu gabe muba. Bibel mandok, molo tabahen na denggan tu musutta “dos ma i songon na mambahen gara tu ginjang ni uluna”. (Poda 25:22, surat na di toru) Hata na di ayat on paingotton hita tu proses manutung biji ni logam asa menghasilkan logam na denggan. Jadi molo burju hita tu halak na marsogo ni roha tu hita, boi ma gabe muba rohana jala dang marsogo ni roha be tu hita.
Songon dia do carana makkaholongi musutta?
“Bahen ma na denggan tu halak na marsogo ni roha tu hamu.” (Lukas 6:27) Didok di Bibel, “Molo male musum, lehon ma ibana mangan, molo mauas, lehon ma ibana minum.” (Rom 12:20) Cara na asing lao makkaholongi musutta i ma mangulahon Aturan Emas na mandok, “Aha na dihalomohon rohamuna bahenon ni halak tu hamu, ikkon songon i do bahenonmuna tu nasida.”—Lukas 6:31.
“Hatahon hamu ma hata na denggan tu halak na mamburai hamu.” (Lukas 6:28) Tikki kasar hata ni musutta, toktong ma lambok jala denggan hatatta tu nasida. Didok di Bibel, “Unang ma balos hamu . . . issak-issak dohot issak-issak. Alai balos hamu ma na jahat dohot na denggan.” (1 Petrus 3:9) Poda on boi mangurupi hita asa unang marsogo ni roha.
“Tangiakkon ma halak na mangaleai hamu.” (Lukas 6:28) Molo adong sasahalak na mangaleai hamu, “unang ma balosson na jahat tu ibana”. (Rom 12:17) Alai pangido ma tu Debata asa diampuni hasalaanna i. (Lukas 23:34; Ulaon ni Apostel 7:59, 60) Daripada balas dendam, pasahat ma parsoalan i tu Debata asa Ibana na pasaehon parsoalan i sesuai tu standarna na adil.—3 Musa 19:18; Rom 12:19.
“Toktong ma haholongi musum jala bahen ma na denggan tu halak na marsogo ni roha tu hamu, hatahon hamu ma hata na denggan tu halak na mamburai hamu jala tangiakkon ma halak na mangaleai hamu.”—Lukas 6:27, 28.
‘Sabar ma hamu jala burju.’ (1 Korint 13:4) Di suratna na terkenal na paboahon taringot holong, dipakke Apostel Paulus do hata Junani na sarupa (agape) songon na disurat di Mateus 5:44 dohot Lukas 6:27, 35. Tapatudu ma holong sisongon i tu musutta marhite sabar tu nasida, burju, dang marlate ni roha, dang marhata manggang, jala dang marginjang ni roha.
“Halak na marholong ni roha i sabar, burju, dang marlate ni roha, dang marhata manggang, dang marginjang ni roha, sopan, dang holan dirina sandiri na dipikkirhon, dang parmuruk, jala dang dipaingot-ingot holong i hasalaan ni halak. Dang las rohana tu ulaon na so sittong, alai las do rohana tu akka ulaon na sittong. Tahan manaon sude hasusaan, porsea di sasude, toktong paimahon akka na denggan di sasude, sabar jala togu do haporseaonna tikki mangadopi manang aha pe. Dang na olo salpu holong ni roha i.”—1 Korint 13:4-8.
Boi do hita marporang lao mangalo musutta?
Dang boi. Alana nungnga diajarhon Jesus tu akka siseanna asa unang marporang nasida mangalo musu. Contohna, tikki paboahon na lao diserang Jerusalem, dang disuru Jesus akka siseanna asa tinggal lao marporang, gariada disuru do nasida asa lari sian kota i. (Lukas 21:20, 21) Didok Jesus do muse tu si Petrus, “Pamasuk ma podangmi tu ingananna. Ai manang ise na manittak podang, mate do dibahen podang.” (Mateus 26:52) Jadi, Bibel dohot sejarah patuduhon molo akka sisean ni Jesus di abad na parjolo dang olo marporang mangalo musu ni nasida.a—2 Timoteus 2:24.
Pandapot na sala taringot makkaholongi musu
Pandapot na sala: Di Patik ni Debata, disuru do halak Israel asa marsogo ni roha tu musuna.
Na sasittongna: Dang adong paretta sisongon i di Patik ni Debata. Gariada, disuru do halak Israel asa makkaholongi dongan jolma. (3 Musa 19:18) Istilah ‘dongan jolma’ di ayat on maksudna, i ma halak na asing. Alai piga-piga halak Jahudi marpikkir, holan sesama halak Jahudi do donganna jolma. Alani i, dianggap nasida do halak na so Jahudi gabe musu. (Mateus 5:43, 44) Dipadenggan Jesus ma cara marpikkir ni nasida marhite sada ilustrasi taringot halak Samaria na burju.—Lukas 10:29-37.
Pandapot na sala: Molo tahaholongi musutta, berarti setuju hita tu tindakanna na sala.
Na sasittongna: Dipaboa do di Bibel, molo tahaholongi sasahalak dang berarti setuju hita tu tindakanna na sala. Contohna, sogo do roha ni Jesus tu ulaon kekerasan, alai dipatudu ibana do holong tikki manangiakkon akka halak na menganiaya ibana. (Lukas 23:34) Sogo do roha ni Jesus tu ulaon na sala dohot dosa, alai dilehon do ngoluna tu akka pardosa.—Johannes 3:16; Rom 6:23.
a Bukku The Rise of Christianity by E. W. Barnes mandok, “Molo manat taperiksa, gabe taboto ma sahat tu tikki ni si Marcus Aurelius [Kaisar Roma sian taon 161 sahat tu 180 M], dang adong halak Kristen na gabe tentara, jala dang adong tentara dung gabe halak Kristen na tetap di dinas militer.”