PELAJARAN 29
Boha do Sebenarna Keadaan ni Halak Naung Mate?
Adong do keluarga manang donganmuna naung mate? Molo adong, sukkun-sukkun do ra rohamuna, ‘Boha do sebenarna keadaan ni halak naung mate? Boi dope hita pajuppang dohot nasida?’ Di pelajaran on dohot di pelajaran berikutna, taida ma alusna sian Bibel.
1. Boha do sebenarna keadaan ni halak naung mate?
Didok Jesus do halak naung mate i dos songon halak na modom. Halak na renges modom, dang diboto ibana aha na masa di sakalilingna. Dos songon i ma, dung mate sasahalak dang dihilala be na haccit. Jala dang kesepian na mate i, nang pe dang boi be pajuppang tu keluargana manang tu donganna. Bibel mandok, “Anggo na mate, dang diboto agia aha.”—Jaha Parjamita 9:5.
2. Aha do manfaatna molo taboto boha sebenarna keadaan ni halak naung mate?
Godang do halak na mabiar tu hamatean jala mabiar tu halak naung mate. Alai molo takkas diboto hamu boha sebenarna didok Bibel taringot keadaan ni halak naung mate, pasti dang mabiar be hamu. Justru las do rohamuna! Jesus mandok, “Paluaon ni hasittongan i ma hamu.” (Johannes 8:32) Piga-piga agama mangajarhon mangolu dope tondi ni halak naung mate. Alai dang songon i na didok Bibel. Dang dihilala na mate i be na haccit. Jala ala dang diboto na mate i be agia aha, dang boi nasida mangganggu hita. Jadi dang porlu hita mangalehon pelean, marsuap di kuburan, manang martangiang tu halak naung mate.
Adong halak na mandok, boi do nasida makkatai tu halak naung mate. Alai dang toho i! Songon naung taboto sian Bibel, dang diboto halak naung mate be agia aha. Jadi molo adong halak na makkatai tu halak naung mate, sebenarna tu suru-suruan na jahat do ibana makkatai. Na menyamar do suru-suruan na jahat i gabe songon halak naung mate i. Alani i molo taboto boha sebenarna keadaan ni halak naung mate, boi ma tapadao diritta sian suru-suruan na jahat. Diorai Jahowa do hita makkatai tu halak naung mate asa unang marjea hita dibahen suru-suruan na jahat.—Jaha 5 Musa 18:10-12.
ASA LAM TAATTUSI
Lam godang ma na taboto sian Bibel taringot hamatean. Jala molo nungnga taboto dang disiksa Debata halak naung mate, gabe pos ma rohatta parholong do Debata.
3. Boha do didok Bibel taringot keadaan ni halak naung mate?
Marragam do pandapot ni akka halak di liat portibi on taringot keadaan ni halak naung mate. Alai dang boi tadok sittong do sude na dihaporseai nasida i.
Boha do pandangan ni akka halak di ingananmuna taringot keadaan ni halak naung mate?
Asa taboto aha do na didok Bibel taringot i, putar ma VIDEO.
Jaha Parjamita 3:20, dung i bahas ma sukkun-sukkun on:
Menurut ayat on, boha do ujungna molo nungnga mate sasahalak?
Toho do mangolu dope tondina?
Dipaboa do di Bibel songon dia keadaan ni si Lasarus dung mate ibana. Dongan kompak ni Jesus do si Lasarus. Tikki dijaha hamu Johannes 11:11-14, parrohahon ma boha do didok Jesus keadaan ni si Lasarus dung mate ibana. Dung i bahas ma sukkun-sukkun on:
Sarupa songon na boha do didok Jesus halak naung mate?
Ala didok do halak naung mate i dos songon halak na modom, attong boha do sebenarna keadaan ni halak naung mate?
Boha do perasaanmuna dung diboto hamu sian Bibel keadaan ni halak naung mate?
4. Godang do manfaatna molo taboto boha keadaan ni halak naung mate
Molo taboto boha do sebenarna keadaan ni halak naung mate, dang mabiar be hita tu nasida. Jaha Parjamita 9:10, dung i bahas ma sukkun-sukkun on:
Boi do halak naung mate mangganggu hita?
Dung taboto sian Bibel boha do sebenarna keadaan ni halak naung mate, pasti gabe dang olo be hita mangalean pelean, marsuap di kuburan, manang martangiang tu halak naung mate. Jaha Jesaya 8:19 dohot Pangungkapon 4:11, dung i bahas ma sukkun-sukkun on:
Boha do perasaan ni Jahowa mangida halak na martangiang manang mangalean pelean tu halak naung mate?
Dung taboto boha sebenarna keadaan ni halak naung mate, dang olo be hita mangulahon kebiasaan na mambahen muruk Jahowa
5. Tarapul do rohatta molo taboto boha keadaan ni halak naung mate
Godang halak marpikkir molo nungnga mate nasida, pasti disiksa do nasida alani pangalahona najolo. Alai pasti las do rohatta ala taboto dang disiksa Debata hape halak naung mate, nang pe jahat hian ibana saleleng ngoluna. Jaha Rom 6:7, dung i bahas ma sukkun-sukkun on:
Didok di Bibel molo nungnga mate sasahalak, nungnga malua be ibana sian dosana. Jadi toho do disiksa halak naung mate alani dosana najolo?
Molo lam tatanda sifat ni Jahowa, lam pos ma rohatta dang mungkin disiksa Debata halak naung mate. Jaha 5 Musa 32:4 dohot 1 Johannes 4:8, dung i bahas ma sukkun-sukkun on:
Mungkin do disiksa Debata halak naung mate hape didok di ayat i na tigor, na sittong, jala parholong do Debata?
Boha do perasaanmuna mamboto on?
ADONG DO NA MANDOK: “Mabiar do au bah disiksa molo nungnga mate.”
Molo adong na mandok songon i, ayat ni Bibel na dia ma na dipakke hamu lao patuduhon dang toho na didokna i?
KESIMPULAN
Dung mate sasahalak, dang diboto ibana be agia aha. Dang dihilala be na haccit jala dang boi halak naung mate mangganggu hita.
Tinjauan
Boha do sebenarna keadaan ni halak naung mate?
Aha do manfaatna molo takkas taboto keadaan ni halak naung mate?
Boasa tarapul rohatta molo taboto keadaan ni halak naung mate?
LULUI MA
Ida ma aha do sebenarna lapatan ni hata “jiwa” di Bibel.
Toho do dihukum Debata halak na jahat di api narokko?
Porlu do hita mabiar tu halak naung mate?
Toho do Adong Tondi ni Halak Naung Mate? Boi do i Mangurupi Hita Manang Mangganggu Hita? (brosur)
Jaha ma pengalaman ni sahalak bawa na las rohana dung mamboto boha do sebenarna keadaan ni halak naung mate.
“Las do Rohakku Dung Huboto Alusna sian Bibel” (Joujou Paboahon, 1 Februari 2015)