Songon dia Asa Denggan Hamu Mamakke Tikkimuna?

Cara 1: Bahen ma Rencana

Tottuhon ma dia na uppetting. Bibel mandok ikkon taboto do “dia na urrikkot”. (Pilippi 1:10) Bahen ma daftar ni akka na penting manang na ikkon hatop diulahon hamu. Alai ingot ma, nang pe penting ulaon i di hamu, alai dang sai i na ikkon parjolo diulahon hamu. Misalna manuhor baju. Jala ingot ma, nang pe adong sada ulaon na dirasa hamu ikkon parjolo i diulahon hamu, alai sebenarna olo do dang pola penting i. Misalna manonton TV.a

Jolo pikkirhon ma. Didok do di Parjamita 10:10, “Molo majal kampak ni sasahalak jala dang dipatajom, gabe loja ma ibana mamakke i. Alai boi do marhasil sasahalak molo marbisuk ibana.” Aha do maksudna? Ikkon jolo dipatajom sahalak tukkang do kampakna sebelum mengkampak hau asa unang habis tikkina. Dos songon i ma sebelum diulahon hamu ulaonmuna, ikkon jolo dibahen hamu do rencana asa hatop sae ulaonmuna i. Unang ma palelengku hamu makkarejohon ulaon na so pola penting, asa unang habis gogo dohot tikkimuna. Molo nga sae dikarejohon hamu sada ulaon jala adong dope tikkimuna, karejohon ma muse ulaon na asing na adong di rencanamuna i. Ujungna gabe godang ma na boi dikarejohon hamu jala denggan hasilna.

Masuk akkal ma. Unang ma dikarejohon hamu ulaon na so pola penting manang na holan pasudahon tikki. Molo pagodangku na dikarejohon hamu jala molo pagodangku janji na dibahen hamu tu halak, olo do gabe palojahu jala dang marlas ni roha be hamu.

Cara 2: Denggan ma pakke tikkimuna

Pittor hatop ma ulahon. Bibel mandok, “Molo sai alogo do na dipaida-ida halak, dang saut be ibana manuan boni. Molo sai ombun do na dipaida-ida halak, dang saut be ibana mamanen.” (Parjamita 11:4) Aha do maksudna? Asa unang habis tikkimuna, pittor hatop ma karejohon hamu ulaonmuna i. Dos songon sahalak pangula, molo jolo dipaima ibana denggan cuaca asa mangula, dang adong na boi panenonna. Songon i ma hita. Sai adong do ra situasi na so tarduga na mambahen hita ragu. Manang olo do ra ikkon jolo talului do godang hatorangan sebelum mambahen sada keputusan. Memang ikkon jolo denggan do tapikkirhon sebelum mambahen sada keputusan. Poda 14:15 mandok, “Dipikkiri halak na marbisuk do ganup lakkana.” Alai faktana keputusan aha pe na tabahen, dang boi tapastihon songon dia hasilna haduan.​—Parjamita 11:6.

Sadari ma keterbatasanmuna. Denggan do memang molo timbo target na tarencanahon tu sada ulaon. Alai molo patimbohu target na tabahen, olo do gabe gagal jala kecewa ma hita. Contohna halak na naeng marsiajar bahasa na baru. Ikkon olo do ibana mangakkui keterbatasanna. Alai molo dang olo ibana mangakkui keterbatasanna, didok rohana unang ma nian adong na sala. Hape sebenarna dang boi ibana marhasil molo songon i cara berpikkirna. Poda 11:2 mandok, “Marbisuk do halak na serep marroha.” Halak na serep marroha dang holan mamikkirhon dirina sandiri jala olo do ibana mangakkui keterbatasanna.

Cara 3: Seimbang ma Hamu

Seimbang ma pandanganmuna taringot karejo dohot rekreasi. “Dumenggan do sanggolom istirahat sian dua golom halojaon, na dos songon mangalele alogo.” (Parjamita 4:6) Halak na satonga mate karejo biasana dang dapotna hasil sian “dua golom halojaon”. Hape nga habis tikki dohot gogona tusi. Molo halak na malas, tumagon do di ibana “sanggolom istirahat” jala pasudahon tikkina lao marsonang-sonang. Hape sasittongna didok Bibel ikkon seimbang do pandanganta taringot karejo. Ikkon kerja keras do hita jala tanikmati hasilna. “Silehon-lehon ni Debata” do i.​—Parjamita 5:19.

Unang ma hurang modom. Sahalak panurat Bibel mandok, “Hupapeak ma dagingku jala sonang ma au modom.” (Psalmen 4:8) Halak na dewasa ikkon ualu jom do modom di bagasan saborngin. Alana boi do i berpengaruh tu pikkiran, perasaan, dohot kesehatanna. Molo cukup hita modom, boi do hita konsentrasi marsiajar jala dang mura-mura lupa. Alai molo hurang modom hita, gabe maol ma hita konsentrasi tikki marsiajar. Gabe mura-mura muruk, mura-mura mambahen kesalahan, jala olo do gabe kecelakaan hita.

Bahen ma tujuan na masuk akkal. “Tumagon do las roha alani na adong di jolo niba sian apala mangalului na so adong.” (Parjamita 6:9) Aha do lapatanna? Molo marbisuk sasahalak, dang dipasombu ibana lomo ni rohana na mangatur dirina. Tarlumobi molo dang masuk akkal lomo ni rohana i. Alani i, dang mura-mura halak sisongon i terpengaruh tu iklan jala dang lomo rohana mengkredit barang. Alai las do rohana tu akka “na adong” di ibana.

Cara 4: Ihutton ma Nasehat na Adong di Bibel

Ihutton ma ajaran na denggan naung diboto hamu saleleng on. Boi do ajaran na denggan na dihaporseai hamu saleleng on mangurupi hamu mamboto dia na denggan, na penting, jala na marguna. Boi do tapatudos ngolutta songon anak ni panah. Jala molo taihutton ajaran na denggan i, dos ma i songon mangarahon anak ni panah i tu sasaran na pas. Molo taihutton ajaran na denggan, gabe boi ma taboto dia na uppetting di ngolutta. Jala gabe boi ma denggan tapakke tikkinta ganup ari. Didia do boi tadapot ajaran na denggan i? Godangan halak mangalului ajaran na denggan i sian Bibel. Jala diakkui nasida denggan do sude nasehat na adong disi.​—Poda 2:6, 7.

Patudu ma holong di sude ulaonmuna. Didok do di Kolosse 3:14, “Holong ni roha do na boi mambahen jolma marsada.” Dang boi dame rohatta jala las rohatta molo dang tapatudu holong, tarlumobi ma i di keluarga. Godang do halak di portibi on dang patuduhon holong di keluargana, alana holan karejo do torus ibana jala mangalului hamoraon. Ujungna dang marlas ni roha be ibana. Alani i ma, jotjot do taringot holong dipaboa di Bibel. Alana on do na paling penting sian sasudena.​—1 Korint 13:1-3; 1 Johannes 4:8.

Pakke ma tikkimuna lao mananda Debata. Adong sahalak bawa na margoar si Geoff. Burju do istrina, adong dua gellengna, jala denggan do karejona di bidang kesehatan. Alai tikki karejo, jotjot do diida ibana halak na marsahit dohot na mate. Gabe sukkun-sukkun ma rohana, “Memang songon on do tujuan ni ngolu on?” Sada tikki dijaha ibana ma sijahaon na dibahen Saksi Jahowa, jala dapotna ma alus ni sukkun-sukkunna i.

Dipaboa si Geoff ma na diparsiajari ibana i tu istri dohot tu gellengna. Gabe marsiajar Bibel ma nasida sekeluarga. Ujungna gabe las ma roha ni nasida, jala diboto nasida ma songon dia cara na denggan mangatur tikki. Jala gabe diboto nasida ma janji ni Debata taringot masa depan. Boi do nasida mangolu saleleng ni lelengna di tano on jala dang adong be hasusaan.​—Pangungkapon 21:3, 4.

Sian pengalaman ni si Geoff, gabe taboto ma tutu do na didok Jesus Kristus, “Marlas ni roha ma na mamboto rikkot ni marale-ale tu Debata.” (Mateus 5:3) Olo do hamu mamakke tikkimuna lao mananda Debata? Molo diboto hamu songon dia carana mangatur tikki, gabe denggan ma ngolumuna.