Boi do Hita Mangolu Saleleng ni Lelengna

1. Aha do manfaatna molo tarimangi janji ni Jahowa taringot hangoluan na saleleng ni lelengna?

MARJANJI do Jahowa lao mangalehon “hangoluan na saleleng ni lelengna” tu akka halak na mangoloi Ibana. (Rom 6:23) Molo tarimangi i, gabe lam balga ma holongta tu Ibana. Pikkirhon ma on: Ala massai holong roha ni Jahowa tu hita dilehon ma harapan lao mangolu salelengna, asa unang adong na manirang hita sian Ibana.

2. Songon dia do janji ni Debata taringot hangoluan na salelengna boi mangurupi hita?

² Janji ni Debata taringot hangoluan na salelengna mangurupi hita asa toktong martahan di situasitta na maol saonari. Bahkan molo adong musu na mangancam lao pamatehon hita, dang gabe mabiar hita manang gabe dang olo be manomba Jahowa. Alana taboto do molo toktong hita setia tu Jahowa nang pe ikkon mate, paheheonna do hita jala adong do harapan lao mangolu salelengna. (Joh. 5:28, 29; 1 Kor. 15:55-58; Heb. 2:15) Boasa boi pos rohatta na boi do hita mangolu salelengna? Tabahas ma piga-piga alasanna.

MANGOLU SALELENGNA DO JAHOWA

3. Boasa boi pos rohatta tu janji ni Jahowa taringot hangoluan salelengna? (Psalmen 102:12, 24, 27)

³ Boi do pos rohatta tu janji ni Jahowa taringot hangoluan salelengna ala sian Ibana do ro hangoluan jala Ibana pe mangolu salelengna. (Ps. 36:9) Taparrohahon ma jo piga-piga ayat ni Bibel na mambuktihon i. Contohna, Psalmen 90:2 mandok ‘Debata na so marmula do Jahowa i jala na so marujung’. Songon i do tong na dipaboa di Psalmen 102. (Jaha Psalmen 102:12, 24, 27.) Jala didok Panurirang Habakuk do taringot Jahowa, “Ale Jahowa, toktong do Ho adong sian saleleng ni lelengna ro di saleleng ni lelengna, Ho do Debatakku Nabadia jala dang na lao mate Ho.”​—Hab. 1:12.

4. Gabe ganggu do rohatta molo dang taattusi boasa Jahowa i adong saleleng ni lelengna? Patorang ma.

⁴ “Debata na toktong adong sahat tu saleleng ni lelengna do Jahowa.” (Jes. 40:28) Maol do ra diattusi hamu lapatan ni hata on. Memang godang do dang mangattusi on. I do alana didok si Elihu, “Dang taretong ganjang ni umurna.” (Job 36:26) Alai taingot ma nang pe dang taattusi taringot sada hal, dang na berarti dang tutu i adong. Misalna dang boi takkas taattusi sude taringot cahaya. Alai dang na berarti dang adong cahaya. Sarupa songon i ma, dang boi jolma botul-botul mangattusi na toktong adong saleleng ni lelengna do Jahowa i. Alai nang pe songon i faktana toktong do Jahowa i adong saleleng ni lelengna. (Rom 11:33-36) Nungnga adong Jahowa sebelum adong mataniari, sumber ni cahaya. Pos do rohatta Jahowa do “na manoppa tano on marhite huasona” jala “Ibana do na pahembangkon langit marhite habisukonna”. (Jer. 51:15; Ul. 17:24) Aha dope alasan na asing na mambahen pos rohatta boi do hita mangolu salelengna?

DITOPPA JAHOWA DO HITA ASA MANGOLU SALELENGNA

5. Aha do harapan na dilehon tu si Adam dohot si Hawa?

⁵ Sian sude toppaan ni Jahowa di tano on, holan jolma do na boi mangolu salelengna. Alai asa boi dapot ni nasida hangoluan i dipasingot Jahowa ma si Adam, “Dang boi panganonmu parbue ni hau parbinotoan taringot tu na denggan dohot na roa. Unang pangan parbue ni hau i, molo dipangan ho sian i, mate do ho di ari i.” (1 Mus. 2:17) Jadi molo dioloi si Adam dohot si Hawa paretta ni Jahowa i, dang mate nasida. Jala molo torus nasida setia, bisa jadi diloas Jahowa do nasida mangallang “parbue ni hau hangoluan i”. Sian on taboto boi do nasida “mangolu saleleng-lelengna”.b​—1 Mus. 3:22.

6-7. (a) Aha do muse buktina molo jolma ditoppa asa mangolu salelengna? (b) Aha do na naeng diulahon hamu molo dung mangolu salelengna? (Ida gambar.)

⁶ Hea do dibahen akka pakar riset taringot otak ni jolma. Unggodang do hape informasi na boi disippan otakta lobi sian na boi taparsiajari saleleng ngolutta saonari. Contohna di taon 2010, dibahen nasida ma artikel na paboahon molo otak ni jolma boi manippan informasi na sarupa godangna songon rekaman acara TV na ganjangna lobi sian 300 taon. Jala didok nasida lobi sian i pe boi do otak ni jolma manippan informasi. On patuduhon, ditoppa Jahowa do otakta asa boi mamparsiajari godang informasi lobi sian 70 manang 80 taon umur ni jolma saonari.​—Ps. 90:10.

⁷ Tikki ditoppa Jahowa jolma, dilehon do tu nasida keinginan lao mangolu salelengna. Bibel mandok, “Dibahen [Jahowa] do tu roha ni nasida sakkap lao mangolu saleleng ni lelengna.” (Pjm. 3:11) On ma alasanna boasa hita manganggap hamatean i songon musu. (1 Kor. 15:26) Buktina molo marsahit na parah hita, pasti dang pasrah hita paima tikkina mate. Alai lao do hita tu dokter marubat asa malum sahitta. Berupaya do hita asa unang mate. Jala molo mate halak na tahaholongi, dang soal poso dope ibana manang nga matua, tottu lungun hian do rohatta. (Joh. 11:32, 33) Lomo pe rohatta mangolu salelengna ala na songon i do hita ditoppa Jahowa. Takkas ma, lomo do roha ni Jahowa asa mangolu salelengna hita. Alai adong dope alasan na asing na paposson rohatta boi do hita mangolu salelengna. Saonari tabahas ma akka na diulahon Jahowa najolo dohot saonari na mambuktihon dang hea muba tujuanna na parjolo i.

DANG MUBA SAKKAP NI JAHOWA

8. Sesuai tu Jesaya 55:11, aha do na taparsiajari taringot sakkap ni Jahowa?

⁸ Nang pe mardosa si Adam dohot si Hawa jala gabe mate pinopparna, dang muba sakkap ni Jahowa. (Jaha Jesaya 55:11.) Lomo do rohana asa mangolu salelengna akka naposona na setia. Sian dia taboto? Sian akka na hea dihatahon jala diulahon Jahowa najolo lao pasautton akka sakkapna.

9. Aha do na dijanjihon Debata tu akka naposona? (Daniel 12:2, 13)

⁹ Marjanji do Jahowa lao pahehehon halak na mate jala dilehon do kesempatan tu nasida asa mangolu salelengna. (Ul. 24:15; Tit. 1:1, 2) Diboto si Job do na lomo roha ni Jahowa pahehehon halak naung mate. (Job 14:14, 15) Diboto Panurirang Daniel do muse na lao dipahehe do halak na mate jala boi mangolu salelengna. (Ps. 37:29; jaha Daniel 12:2, 13.) Diboto halak Jahudi di tikki ni Jesus do tong boi do lehonon ni Jahowa “hangoluan na saleleng ni lelengna” tu akka naposona na setia. (Luk. 10:25; 18:18) Jesus pe jotjot do paboahon taringot janji on, jala ibana sandiri na dipahehe Debata do.​—Mat. 19:29; 22:31, 32; Luk. 18:30; Joh. 11:25.

10. Parsiajaran aha do na tadapot sian akka halak na dipahehe najolo? (Ida gambar.)

¹⁰ Sian Jahowa do ro hangoluan, jadi sanggup do Ibana pahehehon halak na mate. Contohna, dilehon Jahowa do huaso tu Panurirang Elia lao pahehehon anak ni ina na mabalu di Sarpat. (1 Raj. 17:21-23) Asing ni i, dilehon Jahowa do huaso tu Panurirang Elisa lao pahehehon anak ni borua Sunem. (2 Raj. 4:18-20, 34-37) Akka contoh on dohot contoh na asing mambuktihon sanggup do Jahowa pahehehon halak na mate. Tikki di tano on Jesus, dipatudu ibana do na sian Bapakna dapotna huaso lao pahehehon halak naung mate. (Joh. 11:23-25, 43, 44) Saonari nga di surgo be Jesus jala nungnga dilehon tu ibana “saluhut huaso na di banua ginjang dohot na di tano on”. Alani i, boi ma ibana pasautton janji ni Jahowa lao pahehehon “saluhut na di kuburan” jala mangalehon hangoluan na saleleng ni lelengna tu nasida.​—Mat. 28:18; Joh. 5:25-29.

11. Aha do manfaat ni tobusan tu hita?

¹¹ Boasa dipasombu Jahowa Anak haholonganna mate? Didok Jesus alasanna, “Ai songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Joh. 3:16) Dilehon Jahowa pe Anakna lao manobus dosatta asa boi do hita mangolu salelengna. (Mat. 20:28) Apostel Paulus mandok massai penting do tobusan i lao pasautton sakkap ni Jahowa. Didok ibana, “Ai songon hamatean i na ro sian sahalak jolma, suang songon i do haheheon ni halak na mate ro do i sian sahalak jolma. Ai sude do jolma mate alani si Adam, suang songon i ma sude do jolma mulak mangolu alani Kristus.”​—1 Kor. 15:21, 22.

12. Aha do na diulahon Jahowa lao pasautton lomo ni rohana?

¹² Diajari Jesus do akka siseanna manangiakkon asa ro Harajaon ni Debata jala asa saut lomo ni rohana di tano on. (Mat. 6:9, 10) Sada sian lomo ni roha ni Debata, i ma asa mangolu saleleng ni lelengna jolma di tano on. Alani i, dipillit Jahowa do Jesus gabe Raja di Harajaonna. Dipillit Jahowa do muse 144.000 halak sian tano on rap mamaretta dohot Jesus, lao pasautton lomo ni roha ni Debata.​—Pgk. 5:9, 10.

13. Aha do na diulahon Jahowa saonari, jala aha do na ikkon diulahon hamu?

¹³ Saonari dipapungu Jahowa do sada “punguan bolon” jala dilatik Ibana gabe rakyat ni Harajaonna. (Pgk. 7:9, 10; Jak. 2:8) Godang halak saonari na tarbagi alani porang dohot prasangka, alai berupaya do punguan bolon marsada nang pe marasing-asing suku, ras, dohot bangso ni nasida. Dipatudu nasida do marhite parniulaonna, na dibahen nasida podang gabe mata bajak. (Mik. 4:3) Dang olo nasida marporang, gariada diurupi nasida do akka halak marsiajar taringot Jahowa dohot lomo ni rohana asa boi mandapot “hangoluan na saleleng ni lelengna”. (1 Tim. 6:19) Adong do na ditentang keluarga jala na susa parhepengonna ala mendukung Harajaon ni Debata. Alai pos do roha ni nasida lehonon ni Jahowa do akka na dihaporluhon nasida. (Mat. 6:25, 30-33; Luk. 18:29, 30) On paposson rohatta tutu do adong Harajaon ni Debata jala pasauton ni Harajaon i do lomo ni roha ni Jahowa.

NGOLU NA DUMENGGAN DI ARI NA NAENG RO

14-15. Songon dia do Jahowa pasautton janjina lao manaluhon hamatean?

¹⁴ Saonari nungnga gabe raja Jesus di surgo jala lao pasauttonna ma sude janji ni Jahowa. (2 Kor. 1:20) Mulai sian taon 1914 nungnga ditaluhon Jesus akka musuna. (Ps. 110:1, 2) Satokkin nai taluhonon ni Jesus dohot si 144.000 i ma sude musu ni nasida jala dihancurhon ma sude akka parjahat.​—Pgk. 6:2.

¹⁵ Saleleng Pamarettaon Saribu Taon ni Jesus, dipahehe ma akka halak na mate jala gabe sempurna ma akka halak na mangoloi Jahowa. Di ujian na parpudi, lehonon ni Jahowa ma tano on “gabe parbagianan ni halak na tigor marroha, jala mangolu ma nasida disi saleleng ni lelengna”. (Ps. 37:10, 11, 29) Massai las do muse rohatta, alana ditaluhon nama “musu na parpudi . . . , i ma hamatean”.​—1 Kor. 15:26.

16. Aha do seharusna alasan utamatta melayani Jahowa?

¹⁶ Songon naung tabahas di artikel on, boi do pos rohatta tu janji taringot hangoluan na salelengna na disurat di Bibel. Janji i boi mangurupi hita asa toktong setia nang pe mangadopi hasusaan di ari parpudi on. Alai asa boi tabahen las roha ni Jahowa, unang ma tasomba Ibana holan ala naeng mangolu salelengna. Alasan utamatta setia tu Jahowa dohot Jesus i ma ala massai holong do rohatta tu nasida. (2 Kor. 5:14, 15) Holong i do na mangonjar rohatta maniru nasida jala paboahon harapanta tu na asing. (Rom 10:13-15) Berupaya ma hita asa gabe halak na burju jala dang holan mamikkiri diritta sandiri. Molo taulahon i gabe las ma roha ni Jahowa tu hita jala gabe ale-alena ma hita salelengna.​—Heb. 13:16.

17. Keputusan aha do na ikkon tabahen? (Mateus 7:13, 14)

¹⁷ Nungnga dilehon Jahowa tu hita sude kesempatan lao mangolu salelengna. Alai saonari hita sandiri do na mamillit toktong do hita di dalan tu hangoluan i manang na dang. (Jaha Mateus 7:13, 14.) Songon dia do annon ngolutta molo dung mangolu salelengna? Tabahas ma i di artikel na mangihut.