Tahaholongi ma Standar ni Jahowa na Sittong

1. Tikki digoda lao mangulahon na sala, songon dia do reaksi ni si Josep?

HEA do si Josep anak ni si Jakkob digoda lao mangulahon na sala. Adong ma sahalak borua mandok tu ibana, “Beta, modom ma ho rap dohot au.” Borua i istri ni si Potipar, tuan ni si Josep. Alai ditolak si Josep do pangidoanna i. Adong do ra halak na marpikkir, ‘Boasa ma pola ditolak si Josep pangidoan ni borua i?’ Di tikki i dang di jabu si Potipar. Jala hatoban do si Josep di jabu i. Jadi boi do bahenon ni borua i susa ngolu ni si Josep molo ditolak si Josep pangidoanna. Alai nang pe nungnga mulak-ulak dirayu borua i si Josep, tetap do ditolak si Josep pangidoan ni borua i. Didok si Josep, “Tung bahenokku ma na jahat asa mardosa au tu Debata? Ai ulaon na jahat do i.”​—1 Mus. 39:7-12.

2. Sian dia diboto si Josep na mangulahon na jahat do ibana molo mangalakkup?

² Sian dia diboto si Josep na mangulahon “na jahat” do ibana molo mangalakkup? Sasittongna dua ratus taon dukkon i pe baru disurat Patik ni si Musa na mandok “unang hamu mangalakkup”. (2 Mus. 20:14) Alai diboto si Josep do dang lomo roha ni Jahowa tu ulaon seks na so patut. Contohna, diboto si Josep do tujuan ni perkawinan dibahen Jahowa, i ma lao pasadahon sada bawa dohot sada borua. Jala pasti nga hea dibege ibana songon dia Jahowa dua hali melindungi si Sara oppung buyutna sian akka raja na naeng mambuat ibana gabe istrina. Songon i ma tong na diulahon Jahowa tu oppungna, si Rebekka. (1 Mus. 2:24; 12:14-20; 20:2-7; 26:6-11) Hasilna gabe diboto si Josep ma dia na sittong di jolo ni Jahowa. Ala holong do roha ni si Josep tu Jahowa, gabe holong ma tong rohana tu standar ni Jahowa na sittong. Jala bertekad ma ibana mangulahon i.

3. Aha do na lao tabahas di artikel on?

³ Pasti lomo do rohatta mangulahon na sittong. Alai dang sempurna hita jala molo dang hati-hati, gabe mura ma hita terpengaruh tu standar ni portibi on. (Jes. 5:20; Rom 12:2) Jadi lao tabahas ma aha do maksudna mangulahon na sittong, jala aha do manfaatna molo taulahon i. Dung i tabahas ma tolu cara, asa lam bertekad hita makkaholongi standar ni Jahowa na sittong.

AHA DO MAKSUDNA MANGULAHON NA SITTONG?

4. Boha do pandangan ni halak saonari taringot na sittong?

⁴ Akka pamimpin di jaman ni Jesus mangakku mangulahon na sittong. Alai dipissang Jesus do nasida ala jotjot menghakimi jala mamaksa na asing mangihutton peraturan ni nasida. (Pjm. 7:16; Luk. 16:15) Adong do tong akka halak di jamanta saonari na songon i. Didok do nasida mangulahon na sittong, hape jotjot do dihakimi nasida halak na asing na so olo mangihutton standar ni nasida. Sasittongna halak na makkilala undenggan ibana sian na asing, halak na sombong do i. Sogo do roha ni Jahowa tu halak sisongon i. Di jolo ni Jahowa dang diulahon ibana na sittong.

5. Halak na songon dia do na mangulahon na sittong menurut Bibel?

⁵ Mangulahon na sittong na dibahas di artikel on, lapatanna mangulahon na sittong di jolo ni Jahowa. Halak na mangulahon na sittong ikkon mangihutton standar ni Jahowa na badia di parngoluonna. Contohna di Patik ni si Musa, didok Jahowa ikkon dipakke partiga-tiga do ‘timbangan na sittong’. (5 Mus. 25:15) Sian i taboto ma halak Kristen ikkon jujur tikki marbisnis molo naeng mangulahon na sittong di jolo ni Debata. Asing ni i, dang lomo rohana molo dibahen na so adil tu halak na asing. Jala tikki naeng mambahen keputusan, ikkon jolo dipikkirhon ibana do songon dia perasaan ni Jahowa asa boi ibana “marpangalaho hombar tu lomo ni roha ni Jahowa”.​—Kol. 1:10.

6. Boasa tadok holan Jahowa do na marhak manottuhon na sittong dohot na sala? (Jesaya 55:8, 9)

⁶ Bibel mandok Jahowa do “mual ni hasittongan”. (Jer. 50:7) Ala Jahowa do Sipanoppa jala sempurna do Ibana, holan Ibana do na marhak manottuhon dia na sittong dohot na sala. Alai molo hita mardosa do jala dang sempurna. Alani i ma dang boi hita manottuhon dia na sittong dohot na sala. (Poda 14:12; jaha Jesaya 55:8, 9.) Nang pe songon i, boi do hita mangihutton standar ni Jahowa na sittong ala dilehon do tu hita kemampuan lao maniru Ibana. (1 Mus. 1:27) Lomo do rohatta mangulahon i jala alani holongta tu Jahowa, berupaya do hita maniru Ibana sian nasa tolapta.​—Eps. 5:1.

7. Boasa ikkon taihutton standar ni Jahowa? Paboa ma ilustrasina.

⁷ Godang do manfaatna molo taihutton standar ni Jahowa. Boasa tadok songon i? Coba ma jo tapikkirhon on: Boha do molo tiap bank mambahen nilai mata uang ni nasida sandiri, manang boha do molo adong perusahaan konstruksi na mambahen standar ukuran ni nasida sandiri? Pasti sursar do hasilna. Boha do molo dokter dohot perawat dang mangihutton standar perawatan kesehatan naung ditetappon? Boi do gabe mate pasienna. Sian on taboto ma molo taihutton standar na ditottuhon, parohon manfaat do i tu hita. Songon i ma tong standar ni Jahowa taringot na sittong dohot na sala, gabe perlindungan do i di hita.

8. Aha do na lao lehonon ni Jahowa tu akka halak na mangihutton standarna?

⁸ Dipasu-pasu Jahowa do akka halak na berupaya mangihutton standarna. Didok Ibana, “Lehononna do tano on gabe parbagianan ni halak na tigor marroha, jala mangolu ma nasida disi saleleng ni lelengna.” (Ps. 37:29) Boi do dibayakkon hamu songon dia parngoluotta molo sude halak di portibi on mangihutton standar ni Jahowa? Pasti gabe dame ma tahilala jala marlas ni roha ma hita. Jala i do lomo ni roha ni Jahowa. Jadi ala nungnga taboto godang hian manfaatna molo taihutton standar ni Jahowa, pasti gabe bertekad do hita mangulahon i di parngoluotta. Saonari taida ma tolu carana.

TORUS MA TAIHUTTON STANDAR NI JAHOWA NA SITTONG

9. Songon dia do carana asa lam berupaya hita mangulahon na sittong?

⁹ Cara na parjolo: Tahaholongi ma Jahowa na mambahen standar na sittong dohot na sala. Asa boi tahaholongi na sittong, ikkon holong do rohatta tu Jahowa na mambahen standar i. Lam holong rohatta tu Jahowa, lam berupaya ma hita mangulahon na sittong. Coba ma tabayakkon on: Autsugari holong roha ni si Adam dohot si Hawa tu Jahowa, pasti dang olo nasida mangalanggar patik ni Debata.​—1 Mus. 3:1-6, 16-19.

10. Asa lam diattusi si Abraham cara marpikkir ni Jahowa, aha do na diulahon ibana?

¹⁰ Tottu dang olo hita maniru si Adam dohot si Hawa. Berupaya do hita marsiajar taringot Jahowa, mangargai akka sifatna, jala mangattusi cara marpikkirna. Molo taulahon i gabe lam balga ma holongta tu Jahowa. Taparrohahon ma contoh ni si Abraham. Massai holong do rohana tu Jahowa. Torus do dioloi ibana Jahowa, nang pe dang sai diattusi ibana keputusan ni Jahowa i. Gariada berusaha do si Abraham lam mananda Jahowa. Sada tikki naeng dihancurhon Jahowa ma kota Sodom dohot Gumora. Mulana mabiar do si Abraham dihukum “Hakim ni saluhut tano on” halak na burju rap dohot halak na jahat di kota i. Alai diboto si Abraham do dang mungkin bahenon ni Jahowa songon i. Jadi disukkun ibana ma tu Jahowa piga-piga hali taringot i. Sabar do Jahowa mangalusi ibana. Gabe diattusi si Abraham ma diboto Jahowa do roha ni ganup jolma, jala dang mungkin dihukum Ibana halak na burju rap dohot halak na jahat.​—1 Mus. 18:20-32.

11. Aha do buktina na porsea jala holong do roha ni si Abraham tu Jahowa?

¹¹ Dung diboto si Abraham keputusan ni Jahowa taringot Sodom dohot Gumora, gabe lam holong ma rohana tu Jahowa, jala lam bertekad ma ibana lao pasangappon Jahowa. Alai martaon-taon dukkon i, adong ma situasi na maol na manguji haporseaon ni si Abraham tu Debata. Dipangido Jahowa ma asa dipelehon ibana anak hasianna si Isak. Alai di tikki i nungnga takkas ditanda ibana Jahowa, jadi dang pola disukkun ibana be boasa dipangido Jahowa asa dipelehon si Isak. Gariada pittor diulahon si Abraham do i. Nang pe songon i, pasti lungun hian do roha ni si Abraham. Alai ala nungnga takkas ditanda ibana Jahowa, pos do rohana dang mungkin bahenon ni Debata ulaon na kejam manang na so sittong. Sesuai tu surat ni Apostel Paulus, porsea do si Abraham na sanggup do Jahowa pahehehon si Isak. (Heb. 11:17-19) Asing ni i, nungnga marjanji Jahowa gabe sada bangso na balga do pinoppar ni si Isak, nang pe dang margelleng dope si Isak di tikki i. Ala holong hian do roha ni si Abraham tu Jahowa, pos do rohana sai bahenon ni Jahowa do na sittong. Gabe dioloi ibana ma pangidoan ni Jahowa i nang pe maol mangulahon i.​—1 Mus. 22:1-12.

12. Songon dia do hita boi maniru si Abraham? (Psalmen 73:28)

¹² Songon dia do hita boi maniru si Abraham? Torus ma hita marsiajar taringot Jahowa. Molo taulahon i, gabe lam holong ma rohatta tu Jahowa jala lam jonok ma hita tu Ibana. (Jaha Psalmen 73:28.) Gabe tarlatik ma panggora ni rohatta lao mangihutton cara marpikkir ni Jahowa. (Heb. 5:14) Hasilna gabe lam mura ma hita menolak godaan. Bahkan dang tarpikkir hita mangulahon manang aha pe na mambahen lungun roha ni Jahowa jala na manegai hubungatta tu Ibana. Aha dope cara na asing asa lam bertekad hita mangulahon na sittong?

13. Sesuai tu Poda 15:9, aha dope na porlu taulahon?

¹³ Cara na paduahon: Berupaya ma asa makkaholongi na sittong ganup ari. Asa lam kuat ototta, ikkon ringgas do hita olahraga. Dos songon i ma asa lam tahaholongi na sittong, ikkon adong upaya na tabahen. Alai dang maol mangulahon i ala Debata na masuk akkal do Jahowa. Dang hea diharappon Ibana hita mangulahon lobi sian na tolapta. (Ps. 103:14) Pos ma rohatta, ‘dihaholongi Jahowa do halak na marsitutu mangulahon na sittong’. (Jaha Poda 15:9.) Songon sasahalak na mambahen cita-cita rohani, pasti berupaya do ibana asa boi dapotna i. Suang songon i ma, ikkon berupaya do hita makkaholongi na sittong. Pos ma rohatta sai urupan ni Jahowa do hita lao mambahen kemajuan.​—Ps. 84:5, 7.

14. Aha do “baju partahanan” i, jala boasa ikkon tapakke i?

¹⁴ Didok Jahowa dang gabe susa hita molo taulahon na sittong, justru melindungi hita do i. (1 Joh. 5:3) Taingot ma muse perlengkapan porang na sian Debata na dipaboa si Paulus. (Eps. 6:14-18) Sada sian perlengkapan porang i ma “baju partahanan”, lapatanna mangulahon na sittong. Songon baju partahanan ni sahalak tentara na boi melindungi jantungna, songon i ma standar ni Jahowa taringot na sittong na manjaga roha dohot pikkiranta. Alani i massai penting do mamakke baju partahanan, i ma mangulahon na sittong.​—Poda 4:23.

15. Songon dia do carana mamakke baju partahanan i?

¹⁵ Songon dia do carana mamakke baju partahanan i? Taihutton ma cara marpikkir ni Jahowa tikki naeng mambahen keputusan ganup ari. Contohna molo naeng makkatai hita, mambege musik, manonton, manang mamillit bukku na lao tajaha, tasukkun ma diritta, ‘Aha do pengaruh ni on tu au? Lomo do roha ni Jahowa molo huulahon on? Manang mambahen au gabe tamak, egois, jala mamikkiri seks na so patut dohot kekerasan do au alani on?’ (Plp. 4:8) Molo sai tapastihon keputusanta i sesuai tu lomo ni roha ni Jahowa, berarti na manjaga rohatta do hita disi sian ulaon na sala.

16-17. Songon dia do Jesaya 48:18, paposson rohatta na sanggup do hita mangulahon standar ni Jahowa salelengna?

¹⁶ Hea do hamu merasa dang sanggup mangihutton standar ni Jahowa na sittong ganup ari? Molo hea, tapikkirhon ma ilustrasi na dipaboa Jahowa di Jesaya 48:18. (Jaha.) Disarupahon Ibana do akka pambahenanta na denggan “songon galumbang ni laut”. Bayakkon ma hamu jongjong di topi ni laut na bidang. Diida hamu ma dang marna so galumbang ni laut i. Dang hea ro tu pikkiranmuna sada tikki so galumbang di laut i. Alana torus do ro galumbang ni laut i sian tikki tu tikki.

¹⁷ Songon dia do carana asa boi pambahenanta na denggan i disarupahon songon galumbang ni laut? Tikki naeng mambahen keputusan, sai tapikkirhon ma aha na dihalomohon Jahowa. Dung i pittor taulahon ma i. Taingot ma dang soal sadia maol keputusan na ikkon tabahen, sai urupan ni Jahowa do hita. Lehononna do tu hita gogo asa boi hita torus mangulahon na sittong ganup ari.​—Jes. 40:29-31.

18. Boasa dang boi hita menghakimi halak na asing?

¹⁸ Cara na patoluhon: Paloas ma Jahowa na menghakimi. Memang ikkon berupaya do hita mangihutton standar ni Jahowa na sittong. Alai unang ma tahakimi halak na asing molo dang olo nasida mangulahon i, jala unang ma taanggap undenggan hita sian nasida. Taingot ma Jahowa do “Hakim ni Saluhut tano on”. (1 Mus. 18:25) Jadi dang adong hakta lao menghakimi na asing. Jesus pe mandok, “Unang be uhumi hamu halak na asing, asa unang diuhumi Debata hamu.”​—Mat. 7:1.b

19. Songon dia do si Josep patuduhon holan Jahowa do na marhak manguhumi akka abangna i?

¹⁹ Taida ma jo muse contoh ni si Josep. Dang olo ibana manguhumi na asing, nang pe dibahen na so adil tu ibana. Dianiaya akka abangna do ibana, dijual gabe hatoban, jala margabus do nasida mandok tu bapakna nungnga mate ibana. Martaon-taon dukkon i, pajuppang ma muse si Josep dohot akka abangna i. Tikki i, nungnga gabe pejabat tinggi si Josep. Sasittongna boi do dibalos si Josep pambahenan ni akka abangna i. Jala i do na dikhawatirhon nasida nang pe nga botul-botul menyesal nasida. Alai didok si Josep tu nasida, “Unang pola mabiar hamu. Ai dang Debata au, na boi manguhumi hamu.” (1 Mus. 37:18-20, 27, 28, 31-35; 50:15-21) Sian hata ni si Josep on, takkas do diboto ibana holan Jahowa do na marhak manguhumi akka abangna i.

20-21. Boasa dang boi taanggap diritta undenggan sian na asing?

²⁰ Taloas ma Jahowa na gabe Hakim di hita. Unang ma hea taraguhon motif ni akka donganta, alana dang taboto aha na adong di roha ni nasida. Holan Jahowa do na boi ‘mamareso sakkap ni roha ni jolma’. (Poda 16:2) Holong hian do roha ni Jahowa tu sude jolma, nang pe berbeda latar belakang dohot kebudayaan ni nasida. Jala dipangido Jahowa do hita ‘mambukka roha’ tu akka dongan sahaporseaonta. (2 Kor. 6:13, surat na di toru) Alani i, unang ma tahakimi akka donganta. Gariada ikkon tahaholongi do nasida.

²¹ Unang ma tahakimi akka halak na so sahaporseaon dohot hita. (1 Tim. 2:3, 4) Unang ma tadok taringot keluargatta, “Pasti dang olo nasida gabe Saksi.” Molo tadokkon songon i, berarti nungnga tahakimi nasida jala merasa hita undenggan sian nasida. Hape sahat tu saonari, dilehon Jahowa dope kesempatan “tu sude jolma” asa muba. (Ul. 17:30) Taingot ma molo taanggap undenggan hita sian na asing, berarti halak na so sittong do hita di jolo ni Jahowa.

22. Aha do manfaatna molo torus taihutton standar ni Jahowa na sittong?

²² Sai torus ma taihutton standar ni Jahowa na sittong asa marlas ni roha hita jala gabe teladan di na asing. Hasilna lam akrab ma hita dohot akka dongan jala lam dihaholongi nasida ma Jahowa. Anggiat ma hita torus “mauas male tu hasittongan”. (Mat. 5:6) Pos ma rohatta diida jala diargai Jahowa do upayatta lao mangulahon na sittong. Nang pe saonari godangan halak dang olo be mangulahon na sittong, alai unang ma menyerah hita! Pos ma rohatta, “dihaholongi Jahowa do halak na tigor marroha”.​—Ps. 146:8.