Manfaatna Dung Taboto Adong na Manoppa Saluhutna

Boasa penting talului bukti na patuduhon adong do manang na dang na manoppa saluhutna? Alana, boi do akka bukti i paposson rohamuna na tutu adong Debata na manoppa saluhutna. Dung diboto hamuna i, mungkin dilului hamu ma muse tutu do Bibel i sian Debata. Jala molo porsea hamu tu isi ni Bibel, dirasahon hamu ma akka manfaat na dipaboa dison.

Bahagia ma ngolumuna

DIDOK DI BIBEL: “Dipatuduhon Debata do ise Ibana marhite akka ulaonna na denggan. Dilehon do tu hamu udan dohot musim panen. Diparade Ibana do sipanganon asa puas hamu jala asa las rohamuna.”—Ulaon ni Apostel 14:17.

ARTINA: Sude na dinikmati hamu di alam on, hadiah sian Sitoppa saluhutna do i. Pasti lam diargai hamu do akka na dilehonna i molo diboto hamu na massai parduli Ibana tu hamu.

Dapotmuna ma nasehat na denggan na boi mangurupi hamu di parngoluon siganup ari

DIDOK DI BIBEL: “Boi ma diboto ho dia na tigor, dia na sittong, dohot dia na adil, jala diboto ho ma sude na denggan.”—Poda 2:9.

ARTINA: Debata do na mamboto aha na dihaporluhon hamu asa bahagia ngolumuna, ala Ibana do na manoppa hamu. Molo diperiksa hamu isi ni Bibel, dapotmuna ma godang parsiajaran na mambahen denggan ngolumuna.

Diboto hamu ma aha tujuan ni ngolumuna

DIDOK DI BIBEL: “Dapotmu ma parbinotoan taringot Debata.”—Poda 2:5.

ARTINA: Molo dung dapot hamu bukti na tutu adong Sitoppa saluhutna, boi ma dapotmuna alus ni akka sukkun-sukkun na penting on. Misalna: Aha do tujuan ni ngolu on? Boasa godang hasusaan? Aha do na masa molo dung mate jolma? Boi ma dapotmuna alus ni akka sukkun-sukkun on sian Bibel.

Pos ma rohamuna na lao denggan masa depanmuna

DIDOK DI BIBEL: “‘Takkas do huboto aha na lao bahenokku tu hamu,’ ninna Jahowa, ‘hadameon do na lao bahenokku tu hamu dang jea. Jala marjanji do Au na boi pos rohamuna na lao denggan do ngolumuna di ari na naeng ro.’”—Jeremia 29:11.

ARTINA: Marjanji do Debata lao mambahen denggan ngolumuna di ari na naeng ro. Pamagoonna ma hajahaton, hasusaan, dohot hamatean. Molo porsea do hamu tu akka janjina i, boi ma hamu sabar mangadopi akka sitaonon siganup ari.

Manfaat na didapot akka halak ala porsea nasida adong Sitoppa saluhutna

“Takjub do au mangida songon dia cara ni Debata mangurupi au di parngoluon siganup ari. Diurupi do au mamboto aha na uppetting di ngolukku, songon dia carana menghadapi masalah, jala songon dia asa boi gabe ale-ale ni Debata.”—Si Cyndi, Amerika Serikat.

“Dung pos rohakku adong na manoppa saluhutna, puas jala las hian do rohakku. Dang hea au bosan mamparsiajari taringot Ibana. Torus do adong naeng huboto taringot Debata, toppaanna, dohot taringot Bibel Hatana i.”—Si Elise, Prancis.

“Dung huulahon aha na diajarhon Sitoppa hita i, i ma ajaran na adong di Bibel, gabe lam bahagia ma ngolukku. On mangurupi au gabe dang halak na kritis, lam parduli tu na asing, jala puas ma pakkilalaakku. Jala poda na di Bibel mangurupi au gabe sahalak bapak na burju.”—Si Peter, Belanda.

“Sebelum huboto taringot Debata, holan na mangan, modom, dohot karejo do ulaonku ganup ari. Marsak hian do hurasa. Alai saonari huboto ma, hadiah na massai arga do hangoluan i. Porlu do hita marlas ni roha ala massai arga do ngolu i.” —Si Liz, Estonia.

“Torus do au mabiar jala khawatir. Alai dung huboto satokkin nai dang adong be hajahaton, ketidakadilan, dohot hasusaan, gabe moru ma rasa khawatirhi.”—Si Adrien, Prancis.