PASAL 4

Jahowa Patimbulhon GoarNa

NA DIULAS DI PASAL ON

Naposo ni Debata pabadiahon goar ni Debata

1, 2. Songon dia do Terjemahan Dunia Baru patimbulhon goar ni Debata?

ARI Selasa manogot tanggal 2 Desember 1947, rade do punguan ni dongan sahaporseaonta na miniahan di Betel di Brooklyn, New York mangulahon ulaon na balga. Saleleng 12 taon ma nasida marsitutu mangulahon ulaon i. Ujungna, ari Minggu tanggal 13 Maret 1960, sae ma diterjemahon nasida teks na parpudi sian Bibel na baru i. Tolu bulan dungkon i, tanggal 18 Juni 1960, dipatandahon si Nathan Knorr ma Kitab Suci Terjemahan Dunia Baru naung lengkap di bahasa Inggris di kebaktian di Manchester, Inggris. Didok si Knorr, ’On ma ari na parohon las ni roha tu sude Sitindangi Ni Jahowa di liat portibi on!’ Hata ni si Knorr hombar tu pangkilalaan ni angka na ro di tingki i. Las do roha ni nasida ala goar ni Debata adong dibahen di godang ayat.

1) Kitab-Kitab Yunani Kristen Terjemahan Dunia Baru dibagihon taon 1950; 2) Donganta di Ghana patuduhon Kitab-Kitab Yunani Kristen Terjemahan Dunia Baru na dijalo nasida — *Kitab-Kitab Yunani Kristen Terjemahan Dunia Baru* na dipatandahon di *Kebaktian Pertambahan Teokratis* taon 1950 (Hambirang: Yankee Stadium, New York City; siamun: Ghana)

² Di godangan Bibel na diterjemahon, ndang disurat be goar ni Debata. Alai, marsitutu do naposo ni Debata mangalo sangkap ni Sibolis, i ma manesa goar ni Debata asa unang ditanda jolma. Hata pamungka ni Terjemahan Dunia Baru na dipatandahon tingki i mandok, ”Tanda na tandi sian terjemahan on i ma, disurat muse goar ni Debata songon na adong di teks aslina.” Di Kitab Suci Terjemahan Dunia Baru, goar ni Debata, i ma Jahowa disurat lobi sian 7.000 hali. Alani i, terjemahan on patimbulhon goar ni Debata, i ma Jahowa!

3. (a) Taringot tu goar ni Debata, aha do na diantusi ni Parsiajar Bibel di mulana? (b) Aha do lapatan ni ayat di 2 Musa 3:13, 14? (Ida kotak ”Lapatan ni Goar ni Debata”.)

³ Di mulana i, angka Parsiajar Bibel mamboto molo lapatan ni goar ni Debata, i ma ”Ahu nuaeng Ahu sogot”. (2 Mus. 3:14) Alani i, The Watch Tower 1 Januari 1926 mandok, ”Goar ni Debata, i ma Jahowa patuduhon Ibana tongtong adong, . . . na so marmula jala na so marujung.” Alai, tingki diterjemahon Terjemahan Dunia Baru parjolo sahali, diurupi Jahowa do naposoNa laho mangantusi goar ni Debata, ndang holan patuduhon molo Ibana tongtong adong. Alai na rumingkot, adong sangkapNa sipasautonNa. Diboto nasida ma, sasintongna goar ni Debata, i ma Jahowa lapatanna ”Ibana Mambahen jala Ibana Pasauthon”. Tutu, Debata do na mambahen langit, tano dohot sude na adong di hasiangan on, jala Ibana do muse na pasauthon lomo ni rohaNa songon na sinangkapNa hian. Boasa ringkot patimbulhon goar ni Debata, jala songon dia do hita boi mangulahon i?

Goar ni Debata Dipabadia

4, 5. (a) Aha do na tapangido tingki tatangiangkon, ”Sai pinarbadia ma goarmu”? (b) Songon dia jala andigan do goar ni Debata dipabadia?

⁴ Lomo roha ni Jahowa asa dipatimbul goarNa. Jala, i do na rumingkot di Ibana. Tarida do i sian tangiang na diajarhon Jesus, i ma ”Sai pinarbadia ma Goarmu”! (Mat. 6:9) Aha do lapatan ni pangidoan on?

⁵ Nunga taparsiajari di Pasal 1 pangidoan na parjolo sian tangiang ni Jesus, i ma ”Sai pinarbadia ma Goarmu”. Dua pangidoan na asing, i ma ”Sai ro ma harajaonmu! Sai saut ma lomo ni roham”. (Mat. 6:10) Sian tangiang on, tarida ma molo hita mangido tu Jahowa asa ro HarajaonNa, saut sangkapNa, jala dipabadia goarNa. Molo martangiang hita, ”Sai pinarbadia ma Goarmu”, dos ma on songon na mangido asa dipabadia Jahowa goarNa sian sude gabus ni Sibolis. Songon dia do Jahowa mangalusi tangiang on? Ibana mandok, ”Jala ahu ma pabadiahon goarhu na timbul i, naung niramunan di tongatonga ni angka bangso parbegu.” (Hes. 36:23; 38:23) Di Armagedon, diripashon ma angka parjahat, dung i dipabadia ma goarNa di jolo ni sude na tinompaNa.

6. Songon dia do hita pabadiahon goar ni Debata?

⁶ Saleleng on, dilehon Jahowa do tingki tu naposoNa laho pabadiahon goarNa. Alai, ndang na boi lam badia tabahen goar ni Debata ala sasintongna nunga badia goarNa. Antong, songon dia do hita pabadiahon goar ni Debata? Si Jesaya mandok, holan Jahowa do na ingkon ’diparbadiai’. Didok Jahowa do muse taringot tu naposoNa, ”Parbadiaannasida ma goarhu . . . jala habiarannasida [manang, diargai] ma Debata ni Israel.” (Jes. 8:13; 29:23) Laho pabadiahon goar ni Debata, ingkon tapatimbul jala tabahen do goar i sumurung sian na asing. Dung i, tapatudu ma pangargaion tu Jahowa jala taurupi ma na asing mamboto na badia do goar i. Molo tajangkon Jahowa Parhuaso di hita, jala taoloi Ibana, hita patuduhon na taargai jala na tapasangap do goar ni Debata.—Poda 3:1; Pgk. 4:11.

Diparade laho Mamangke jala Patimbulhon Goar ni Debata

7, 8. (a) Songon dia do hita pabadiahon goar ni Debata? (b) Aha do na laho taparsiajari?

⁷ Sian taon 1870-an, nunga dipangke naposo ni Debata goar Jahowa di angka bukunasida. Umpamana, disurat do goar i di majalah Zion’s Watch Tower Agustus 1879 dohot di buku Songs of the Bride, na dipabinsar taon i. Alai, andorang so dilehon Jahowa tu nasida hak na sumurung laho mamangke goarNa di tongatonga ni jolma, ingkon parjolo do ulahonon ni nasida na pinangido ni Jahowa. Songon dia do Jahowa paradehon Parsiajar Bibel laho mangulahon i?

⁸ Molo taparrohahon sejarah ni naposo ni Debata taon 1800-an sahat tu mula ni taon 1900-an, boi ma taida songon dia Jahowa mangurupi naposoNa lam tangkas mangantusi hasintongan taringot tu goarNa. Adong ma tolu hasintongan na laho taparsiajari.

9, 10. (a) Boasa majalah Watch Tower jotjot manaringoti Jesus? (b) Aha do na muba dung taon 1919, jala aha labana? (Ida kotak ”Songon dia The Watchtower Patimbulhon Goar ni Debata”.)

⁹ Parjolo, diurupi Jahowa do naposoNa laho mangantusi hasintongan taringot tu ringkot ni goar ni Debata. Parsiajar Bibel na parjolo mangkilala tobusan do na rumingkot diajarhon di Bibel. I do alana majalah Watch Tower jotjot manaringoti Jesus. Umpamana, dung sataon majalah on dipabinsar, sampulu hali ma gumodang disurat goar ni Jesus sian goar ni Debata, i ma Jahowa. Dipaboa The Watchtower 15 Maret 1976 ma molo Parsiajar Bibel ”pajotjothu” manaringoti Jesus. Alai, diurupi Jahowa do nasida mangantusi molo na rumingkot, i ma goarNa sandiri. Songon dia do pangkilalaan ni Parsiajar Bibel i? Artikel i muse mandok, tarlumobi sian taon 1919, ”dipabadia nasida ma goar ni Debata, i ma Jahowa”. Dung i muse, saleleng sampulu taon dung taon 1919, The Watch Tower nunga manurat lobi sian 6.500 hali goar ni Debata!

¹⁰ Ala nunga jotjot dipaboa goar ni Debata, i ma Jahowa di angka majalah, on patuduhon dihaholongi angka donganta do goar ni Debata. Diihuthon nasida do hata ni si Musa na mandok, ”Baritahononku ma Goar ni Jahowa.” (5 Mus. 32:3; Ps. 34:4) Songon na dipaboa di Bibel, ndang tadingkonon ni Jahowa halak na mangkaholongi goarNa jala dipasupasu do nasida.—Ps. 119:132; Heb. 6:10.

11, 12. (a) Aha do na dipatorang di publikasinta dung taon 1919? (b) Jahowa mangurupi naposoNa mangantusi aha, jala boasa?

¹¹ Paduahon, diurupi do nasida marpangantusion na sintong taringot tu ulaon na disuru Debata tu nasida. Ndang leleng dung taon 1919, taronjar ma roha ni angka donganta na miniahan laho manulingkit surirang ni si Jesaya. Mulai sian i, adong ma na ringkot na dipaboa muse di angka publikasinta. Hatorangan on, boi ma didok sipanganon na diparade di tingkina. Boasa didok songon i?—Mat. 24:45.

¹² Andorang so taon 1919, ndang hea dipatorang The Watch Tower hata ni si Jesaya na mandok, ’Hamu do angka sitindangingku, ninna Jahowa, dohot do naposongku naung hupillit i.’ (Jaha Jesaya 43:10-12.) Alai, ndang sadia leleng dung taon 1919 dipaboa ma hatorangan taringot tu ayat i di publikasinta. Dijujui ma sude na miniahan asa dohot mamaritahon barita taringot tu Jahowa, ala i do ulaon na disuru tu nasida. Sasintongna, sian taon 1925 sahat tu 1931, diulas do Jesaya bindu 43 di 57 majalah The Watch Tower. Jala dipaboa do di ganup majalah molo ayat i, ditujuhon tu halak Kristen na sintong. Tarida ma molo di tingki i, diurupi Jahowa do naposoNa mangantusi aha ulaon na ingkon ulahonon ni nasida. Boasa? Alana ”ingkon jolo ujion” do nasida. (1 Tim. 3:10, Bibel siganup ari) Andorang so diloas mamangke goar ni Debata, Parsiajar Bibel porlu patuduhon molo nasida sitindangiNa.—Luk. 24:47, 48.

LAPATAN NI GOAR NI DEBATA

GOAR Jahowa dibuat sian kata kerja bahasa Heber, lapatanna ”pasauthon”. Adong pakar mandok molo kata kerja i, kausatif (hata na patuduhon adong na mambahen). Alani i, godang na mandok lapatan ni goar ni Debata, i ma ”Ibana Mambahen jala Ibana Pasauthon”. Hombar do lapatan ni Goar ni Debata on tu ulaon ni Jahowa, i ma Sitompa saluhut. Ibana do na manompa nasa na adong jala tongtong do Ibana manggohi jala pasauthon sangkapNa.

Alani i, aha do lapatan ni hata ni Jahowa tu si Musa na disurat di 2 Musa 3:13, 14? Disungkun si Musa ma, ”Ia dung sahat ahu di halak Israel, jala hudok tu nasida: Debata ni ompumuna marsuru ahu tu hamu, gabe didok nasida maon tu ahu: Ise do goarna? Beha ma dohononku tu nasida?” Dialusi Jahowa ma, ”Ahu nuaeng Ahu sogot.” Mangihuthon bahasa Heber lapatanna dos dohot, ”PasautonKu do sude lomo ni rohangKu”.

Molo taparrohahon, ndang dipangido si Musa asa dipaboa Jahowa goarNa. Alana nunga diboto si Musa dohot bangso Israel goar ni Debata, i ma Jahowa. Alai, lomo roha ni si Musa asa dipaboa Jahowa taringot tu diriNa na boi mambahen togu haporseaon ni si Musa. Alani i, lomo roha ni si Musa mangantusi lapatan ni goar i. Tingki dialusi Jahowa, ”PasautonKu do sude lomo ni rohangKu,” dipapatar Jahowa do tu si Musa sada sian pangalahoNa, i ma: Ndang adong na boi mangambati Ibana jala bahenonNa do manang aha pe laho pasauthon lomo ni rohaNa. Umpamana, tu si Musa dohot bangso Israel, Jahowa mambahen diriNa Sipalua, Silehon Patik, Pangalinggomi dohot na asing. Alani i, bahenon ni Jahowa do diriNa hombar tu na dihaporluhon asa boi saut lomo ni rohaNa tu naposoNa. Alai, adong dope na asing lapatan ni goar ni Debata, i ma Jahowa. Goar ni Debata, boi do on lapatanna Ibana mambahen na tinompaNa hombar tu na dihaporluhon asa boi saut sangkapNa.b

b Ida ma buku Tudutudu Laho Mangantusi Hata ni Debata bagian 1.

SONGON DIA THE WATCHTOWER PATIMBULHON GOAR NI DEBATA

Lam leleng dung dipabinsar majalah Watchtower lam dipataridahon ma goar ni Debata, i ma Jahowa. Taida ma angka na muba di sampul ni majalah on.

Zion’s Watch Tower Juli 1879

Sian mulana, nunga disurat goar ni Debata di majalah on. Majalah na paduahon dipabinsar mandok, ”Pos do rohanta diurupi JAHOWA do ’Zion’s Watch Tower’.”
The Watchtower 15 Oktober 1931

Disurat do goar Jahowa dohot ayat di Jesaya 43:12 di sampul ni majalah on.
The Watchtower 1 Januari 1939

Disurat do goar Jahowa dua hali di sampul ni majalah on, ayat di Jesaya 43:12 dohot Hesekiel 35:15.
The Watchtower 1 Maret 1939

Disurat do goar Jahowa tolu hali di sampul ni majalah on; dung dipabinsar majalah i, muba ma goar ni majalah i gabe The Watchtower Announcing Jehovah’s Kingdom.

Asing ni i, saleleng 20 taon dungkon taon 1920-an, disurat do goar Jahowa di paragraf parjolo ganup dipabinsar The Watchtower. Tangkas ma, sipaingot na denggan ma on tu naposo ni Debata asa patimbulhon goar ni Debata!

13. Aha do parsoalan na ingkon dipatigor, jala songon dia do Bibel patorangkon taringot i?

¹³ Patoluhon, diboto naposo ni Debata ma na ringkot pabadiahon goar ni Debata. Taon 1920-an diboto nasida ma ringkot do pabadiahon goar ni Debata, jala i do parsoalan na ingkon dipatigor. Songon dia do Bibel patorangkon on? Pingkirhon ma. Aha do na mambahen Debata paluahon halak Israel sian Mesir? Didok Jahowa, ”Asa tung tarbarita Goarhu di liat portibi on.” (2 Mus. 9:16) Jala boasa dipatuduhon Jahowa asi ni rohaNa tu halak Israel nang pe dialo nasida Ibana? Didok Jahowa muse, ”Alai tahe hombar tu goarhu do hupasaut, asa unang marlea goarhu di adopan ni bangso parbegu.” (Hes. 20:8-10) Aha do na diparsiajari Parsiajar Bibel sian ayat on dohot sian ayat na asing?

14. (a) Di ujung ni taon 1920-an aha do na niantusan ni naposo ni Debata? (b) Aha do pangkorhon ni on tu ulaon marbarita? (Ida kotak ”Na Mangonjar Roha Ingkon Marbarita”.)

¹⁴ Di ujung ni taon 1920-an, nunga diantusi naposo ni Debata na ringkot ayat na disurat si Jesaya hirahira 2.700 taon andorang so i. Si Jesaya mandok, ”Ditogutogu do bangsoNa na mambahen tarbarita goarNa.” (Jes. 63:14, Bibel siganup ari) Diboto Parsiajar Bibel do na rumingkot, i ma pabadiahon goar ni Debata, ndang haluaon ni jolma. (Jes. 37:20; Hes. 38:23) Taon 1929, buku Prophecy paboahon, ”Na rumingkot di sude na tinompaNa, i ma pabadiahon goar ni Debata.” Pangantusion on, mangonjar roha ni naposo ni Debata mamaritahon barita taringot tu Jahowa jala pabadiahon goarNa.

15. (a) Aha do na diantusi angka donganta taon 1930-an? (b) Aha do na masa dungkon i?

¹⁵ Di mula ni taon 1930-an, tangkas ma diantusi angka donganta na ringkot do goar ni Debata, mangulahon ulaon na dilehonNa, jala pabadiahon goarNa. Ujungna, dilehon Debata ma hak na sumurung tu naposoNa laho mamangke goarNa di tongatonga ni portibi on. Songon dia do Debata mangulahon on? Taparrohahon ma angka na masa di tingki i.

NA MANGONJAR ROHA INGKON MARBARITA

Si Helen Borchert

SONGON dia do pangantusion na lam tangkas taringot tu pabadiahon goar Jahowa mangonjar roha ni Parsiajar Bibel laho marbarita? Taon 1930, The Watch Tower mandok, ”Molo marurat do hasintongan [taringot tu pabadiahon goar ni Debata] di roha ni sahalak Kristen, antusanna ma sada hak na sumurung do gabe panindangi tu hata dohot tu goar ni Debata, i ma Jahowa.” Tutu, dung diantusi angka donganta taringot tu pabadiahon goar ni Debata do na rumingkot, taronjar ma roha nasida ingkon marbarita. (Ps. 8:2) Umpamana, si Helen Borchert. Ibana merintis sian 1 April 1930 jala tongtong do ibana marsihohot sahat tu na marujung ngolu bulan Juli 2003 tingki marumur 96 taon. Aha do na mangonjar rohana laho marbarita saleleng marpulu taon? Didok ibana ma, ”Na ringkot di ahu sian mulai merintis sahat tu saonari, i ma pabadiahon goar Jahowa sian gabus jala paboahon hasintongan ni Bibel.” Saonari, na mangonjar rohanta ingkon marbarita, i ma pabadiahon goar ni Debata.

Dipillit Jahowa Sada Bangso na Manjangkon GoarNa

16. (a) Aha do na diulahon Debata laho patimbulhon goarNa? (b) Ise do bangso ni Debata najolo?

¹⁶ Laho patimbulhon goarNa, dipillit Jahowa ma bangso na mamangke goarNa. Sian taon 1513 SM, bangso Israel do na mamangke goar ni Debata. (Jes. 43:12) Alai, jotjot do diose bangso Israel janjina tu Jahowa, ujungna taon 33 M ndang dijangkon Jahowa be nasida gabe bangsoNa. Alani i, sian angka bangso na asing, dipillit Jahowa ma sada bangso na manjangkon goarNa. (Ul. 15:14) Bangso na baru dipillit i, digoari ma ”Israel ni Debata”. Nasida ma siihuthon Jesus na miniahan na ro sian marragam bangso.—Gal. 6:16.

17. Dia do sangkap ni Sibolis na saut?

¹⁷ Hirahira taon 44 M, siihuthon Jesus on digoari ma ”halak Kristen”. (Ul. 11:26) Mulana, holan sada do na nidokna Kristen. (1 Ptr. 4:16) Alai, songon tudosan taringot tu eme dohot simaremeeme, saut do sangkap ni Sibolis asa torop halak na so mangihuthon Jesus, digoari Kristen. Saleleng maratus taon, maol do paimbarhon Kristen palsu dohot Kristen na sintong. Alai, muba ma na masa tingki ”gotilon” taon 1914, di tingki i, disirang surusuruan ma halak Kristen na palsu sian na sintong.—Mat. 13:30, 39-41.

18. Songon dia do angka donganta mangantusi na dihaporluhon goar na baru?

¹⁸ Dung dipillit naposo haposan taon 1919, diurupi Jahowa ma naposoNa laho mangantusi aha siulahononna. Diboto ma ulaon marbarita sian jabu tu jabu paimbarhon nasida sian Kristen palsu. Alani i, porlu ma diganti goar ”Parsiajar Bibel”. Ndang holan marsiajar Bibel sambing na tinuju ni nasida, alai dohot do mamaritahon taringot tu Debata, patimbulhon jala pabadiahon goarNa. Antong, goar aha do na hombar tu ulaon i? Dialusi ma sungkunsungkun on taon 1931.

Daftar acara kebaktian ni Parsiajar Bibel di Columbus, Ohio, AS taon 1931 — Daftar acara Kebaktian, 1931

19, 20. (a) Aha do na dipaboa taon 1931? (b) Songon dia do pangkilalaan ni angka donganta tu goar na baru i?

¹⁹ Bulan Juli taon 1931, hirahira 15.000 Parsiajar Bibel ro mangihuthon kebaktian di Columbus, Ohio, AS. Sungkunsungkun do roha ni nasida tingki diida huruf J dohot W di daftar acara. Adong na mandok, lapatan ni i ’Just Watch’ (Parrohahon ma); na asing, ’Just Wait’ (Paima ma). Alai, di ari Minggu tanggal 26 Juli didok si Joseph Rutherford ma, ”Balga do rohanami ditanda jala dijou sitindangi ni Jahowa.” Dung i, diboto angka na ro tu kebaktian i ma lapatan ni huruf J dohot W, i ma Jehovah’s Witnesses (Sitindangi Ni Jahowa), goar i dibuat sian Jesaya 43:10.

²⁰ Marhite martopap tangan, dijangkon sude na ro tu kebaktian i ma goar i. Sian radio, boi do dibege angka dongan di luat na dao las ni roha ni sude na ro tu Colombus! Si Ernest dohot si Naomi Barber na tading di Australia mandok, ”Tingki martopap tangan angka dongan na di Amerika, dohot ma angka donganta di Melbourne jongjong jala martopap tangan. Ndang tarlupahon i!”a

Goar ni Debata Dipatimbul di Liat Portibi On

21. Aha do pangkorhon ni goar na baru on tu ulaon marbarita?

²¹ Dung mamangke goar Sitindangi Ni Jahowa na dibuat sian Bibel, tamba ma hiras ni roha ni naposo ni Debata marbarita. Si Edward dohot si Jessie Grimes, i ma perintis di Amerika Serikat na ro tu kebaktian i mandok, ”Parsiajar Bibel do goarnami tingki borhat sian jabu. Alai dung mulak, goarnami gabe Sitindangi Ni Jahowa. Las do rohanami dijou mamangke goar na pasangaphon Debata.” Laho patandahon diri nasida tu parjabu, dipangke nasida do kartu nama, isina, ”Sahalak sian sitindangi ni JAHOWA na mamaritahon barita taringot tu Harajaon ni JAHOWA, Debatanami.” Tangkas ma, las do roha ni naposo ni Debata mamangke goar Jahowa, jala rade do nasida paboahon lapatan ni goar i tu sude inganan.—Jes. 12:4.

”Parsiajar Bibel do goarnami tingki borhat sian jabu. Alai, dung mulak goarnami gabe Sitindangi Ni Jahowa”

22. Aha do na mambahen naposo ni Debata imbar sian agama na asing?

²² Nunga martaontaon dung diurupi Jahowa angka donganta na miniahan mamangke goar na sumurung. Mulai sian i, boi do Sibolis manabunihon tanda ni naposo ni Debata? Boi do ibana mambahen hita dos tu angka agama palsu? Ndang boi! Gariada, lam tarida do hita marimbar sian na asing ala mamangke goar ni Debata. (Jaha Mika 4:5; Maleaki 3:18.) Goar i, ndang boi disirang sian hita, alani i molo adong na mamaritahon goar i pintor didok do nasida Sitindangi Ni Jahowa. Nang pe agama palsu songon dolok na marbarisbaris, alai naposo ni Jahowa dos ma songon dolok na tumimbo sian angka dolok. (Jes. 2:2) Sasintongna, saonari nunga dipatimbul panombaon dohot goar ni Jahowa.

23. Songon dia do Psalmen 121:5 patoguhon rohanta?

²³ Dipatogu do rohanta mamboto na tongtong urupan ni Jahowa hita mangalo Sibolis! (Ps. 121:5) Alani i, boi ma pos rohanta songon panurat Psalmen, na mandok, ”Martua ma bangso na mardebatahon Jahowa, bangso na pinillitna laho ainonna [ampunaNa].”—Ps. 33:12.

a Ida ma Pasal 7, halaman 72-74, laho mamboto gumodang hatorangan taringot tu mamangke radio.