Marsiajar sian Jesus Tingki Diela-ela

Dung tardidi, ditogu-togu tondi parbadia ma Jesus tu padang pasir Judea. Jala tingki tardidi ibana, ‘bungka do langit’. (Mateus 3:16) Gabe diingot ibana do sude na pinarsiajaran dohot na niulahonna tingki di surgo. Tontu, godang do sirimanganna!

Saleleng 40 ari 40 borngin ma Jesus di padang pasir jala ndang mangan ibana. Tingki male Jesus, ro ma Sibolis mangela-ela ibana. Ninna ma, “Molo tutu ho anak ni Debata, dok ma batu on asa gabe roti.” (Mateus 4:3) Diboto Jesus do na sala mamangke huasona mambahen tanda halongangan manang mukjizat, holan laho pasonangkon dirina sandiri. Alani i, ndang dioloi Jesus ela-ela ni Sibolis i.

Ndang sae holan i. Diela-ela Sibolis ma muse Jesus asa didabuhon dirina sian ginjang ni tembok ni bagas joro. Alai, ndang olo Jesus diela-ela laho patudu-tuduhon huasona. Dialusi Jesus do Sibolis mamangke hata ni Debata. Didok Jesus, ndang boi tauji Debata.

Diela-ela Sibolis ma muse Jesus patoluhalihon. Dipatudu do tu Jesus “sude harajaon ni portibi on dohot hasangaponna”. Jala ninna ma, “Molo olo ho marsinggang jala marsomba tu ahu holan sahali pe, lehononku ma sudena on tu ho.” Alai, ndang dioloi Jesus ela-elana i. Didok Jesus ma, “Laho ma ho Bolis!” (Mateus 4:8-10) Alani i, ndang talu Jesus tu ela-ela i. Diboto ibana do, holan tu Jahowa do hita tama marhobas. Taboto ma, tongtong do diulahon Jesus lomo ni roha ni Debata.

Tadapot ma parsiajaran sian ela-ela na masa tu Jesus dohot sian cara ni ibana mangadopi ela-ela i. Marhite ela-ela i taboto ma, tutu do adong Sibolis. Ndang holan pangalaho na jahat Sibolis i songon na nidok ni godang halak. Tutu do ibana adong, alai ndang boi taida. Taboto ma muse, Sibolis do nampuna sude pamarentaon ni portibi on jala dirajai ibana do nasida sude. Alani i do umbahen na dilehon ibana i tu Jesus.

Didok Sibolis do muse, lehononna do sude harajaon ni portibi on molo olo Jesus manomba ibana holan sahali pe. Ra, cara sisongon i do dipangke Sibolis mangela-ela hita. Umpamana, diela-ela do hita asa mangalului hasangapon, hamoraon, huaso, manang jabatan. Denggan ma molo tatiru Jesus na sai mangulahon lomo ni roha ni Debata nang pe diela-ela! Taingot ma, laho do Sibolis manadingkon Jesus, “paima dapot tingki na pas di ibana”. (Lukas 4:13) Alani i, ingkon tongtong do hita manat, ala ndang marnaloja Sibolis mangela-ela hita.