Poda ni Jesus Taringot Hamoraon

Tingki na mangan i Jesus di jabu ni halak Parise, marribu halak marpungu di luar paimahon ibana. Songon i do na masa tingki Jesus di Galilea. (Markus 1:33; 2:2; 3:9) Di Judea pe, godang do na naeng mangida jala manangihon ibana. Ndang songon halak Parise nasida.

Dung i didok Jesus ma hata na mansai ringkot tu angka siseanna, “Manat ma hamu tu ragi ni halak Parise, i ma pangalaho ni nasida na munafik i.” Hea do didok Jesus poda sisongon on. Alai dung na mangan i ibana rap dohot halak Parise, dipatangkas Jesus ma muse podana i. (Lukas 12:1; Markus 8:15) Marsitutu do halak Parise manabunihon hajahaton ni nasida marhite patuduhon asi ni roha. Alai porlu do dipapatar hajahaton ni nasida. Didok Jesus ma, “Ndang adong na hungkup na so dibungka. Jala ndang adong na buni na so dipapatar.”​—Lukas 12:2.

Ra ndang hea dope halak na di Judea mambege na niajarhon ni Jesus di Galilea. Alani i, dipaboa Jesus ma muse i. Didok ibana ma tu nasida, “Unang ma habiari hamu halak na boi mambunu daging, alai dungkon i ndang tarbahensa be mambahen manang aha.” (Lukas 12:4) Dung i, dipapos Jesus ma roha ni nasida na sarihonon ni Debata do nasida. Jala porlu do muse tandaon ni nasida Anak ni jolma i.​—Mateus 10:19, 20, 26-33; 12:31, 32.

Dung i adong ma sahalak baoa na mandok tu Jesus, “Guru, dokkon jolo tu hahangku asa marbagi arta ahu dohot ibana.” (Lukas 12:13) Nunga tangkas dipaboa di Patik, na ingkon dua bagian do parbagianan ni anak siangkangan. (5 Musa 21:17) Alai, sai dipangido baoa on do lobi sian parbagianan naung ditontuhon tu ibana. Didok Jesus ma tu ibana, “Ise na mamillit ahu gabe panguhum manang sibagi arta di hamu na dua?”​—Lukas 12:14.

Didok Jesus ma muse tu angka halak i, “Manat ma hamu jala pasiding ma ganup ragam ni hahisapon, ai nang pe godang arta ni sasahalak alai ndang sian artana i ngoluna.” (Lukas 12:15) Nang pe godang arta ni sasahalak, tadingkononna do i molo dung mate. Dung i dipaboa Jesus ma sada tudosan na patuduhon rumingkot do mangulahon lomo ni roha ni Debata:

“Adong sahalak na mora na godang panen ni ladangna. Didok ibana ma di bagas rohana, ‘Aha ma na ingkon bahenonku? Ai so adong be saonari inganan panimpanan ni na hupanen i.’ Didok ibana ma, ‘On ma na laho ulahononku: Hurumpakkon ma angka gudangku jala hupajongjong ma na umbalga. Papunguonku ma disi sude hasil ni ladangku dohot sude artangku. Dohononku ma tu diringku: “Nunga godang arta na pinapungum jala sae do i manang na piga taon on. Marsonang-sonang ma ho, mangan, minum, jala marlas ni roha.”’ Alai didok Debata ma tu ibana, ‘E halak na so marroha, buaton ni nasida ma hosam borngin on. Ise ma nampuna angka na pinapungumi?’ Songon i ma halak na papunguhon arta tu dirina sandiri alai ndang mamora di adopan ni Debata.”​—Lukas 12:16-21.

Boi do sisean ni Jesus dohot angka na manangihon i gabe holan na mangalului hepeng. Jala molo paholsohu tu hangoluan, gabe ndang marsitutu be nasida manomba Debata. Alani i, didok Jesus ma muse poda naung didok ibana sada satonga taon na salpu tingki marjamita di dolok:

“Unang be holsohon hamu taringot tu parngoluonmuna songon sipanganonmu, manang taringot tu pamatangmuna songon sipangkeonmu. . . . Parrohahon hamu ma pidong sigak. Ndang hea manabur boni, manggotil manang papunguhon, alai dilehon Debata do mangan angka pidong i. Nda ummarga hamu sian angka pidong i? . . . Parrohahon hamu ma songon dia partubu ni angka bunga-bunga di ladang: Ndang mangula jala ndang manonun nasida. Alai hudok ma tu hamu, gari pangkean ni si Salomo uju di hasangaponna ndang songon uli ni bunga-bunga i. . . . Alani i, unang be holsohon hamu taringot tu sipanganonmu dohot siinumonmu, jala unang be maholsohu rohamuna . . . Alai, diboto Amamuna na di banua ginjang i do na ringkot angka i di hamu. . . . Sai lului ma Harajaonna, dung i tambahononna do sude angka i di hamu.”​—Lukas 12:22-31; Mateus 6:25-33.

Ise do na laho mangalului Harajaon ni Debata? Didok Jesus, na laho adong ma “punguan na metmet” na mangulahon i. Di pudian ni ari dipaboa ma godang ni nasida, i ma 144.000. Aha ma upa jaloon ni nasida? Jesus mandok, “Lomo do roha ni Amamuna mangalehon Harajaon i tu hamu.” Ndang dipapungu nasida arta di tano on na boi tangkoon ni panangko. Alai dipapungu nasida do “arta di surgo na so ra suda”, na laho jaloon ni nasida tingki mamarenta rap dohot Kristus.​—Lukas 12:32-34.