Poda Taringot tu na Tartuktuk dohot na Mardosa

Baru dope diajari Jesus angka siseanna asa martoruk ni roha songon dakdanak. Molo ndang dilului nasida hasangapon tu diri ni nasida sandiri songon dakdanak i, na maniru Jesus ma nasida disi.​—Mateus 18:5.

Dipasingot Jesus do nasida, ala marsoal taringot tu ise na umbalga sian nasida. Alai saonari, dipaboa Apostel Johannes ma muse tu Jesus parsoalan na asing. Ninna ma, “Guru, huida hami do sasahalak palaohon suru-suruan na jahat mamangke goarmu, alai huorai hami do ibana ala ndang diihuthon ibana hita.”​—Lukas 9:49.

Ndang dohot baoa halak Jahudi i mangihuthon Jesus. Hape boi dipalao ibana suru-suruan na jahat. Ra didok roha ni si Johannes, holan angka apostel dohot angka siihuthon Jesus do na boi pamalumhon na marsahit, manang mangusir suru-suruan na jahat. Antong, boasa boi dipalao halak Jahudi i suru-suruan na jahat?

Ra, songgot do roha ni si Johannes mambege hata ni Jesus na mandok, “Unang orai hamu ibana, ai ndang tagamon na mambahen tanda halongangan marhite goarhu laos paroa-roahon ahu. Ai manang ise na so mangalo hita, donganta do i. Tutu do na hudok on tu hamu, manang ise na mangalehon sasangkir aek inumonmuna ala siihuthon Kristus hamu, ndang mago upana i.”​—Markus 9:39-41.

Tingki i, ndang dipajongjong dope huria Kristen. Alani i, molo so dohot sasahalak mangihuthon Kristus, ndang na gabe alo ni Jesus ibana manang mangajarhon na sala. Ai tangkas do dipatuduhon baoa i na porsea ibana tu goar ni Jesus. Jala songon na nidok ni Jesus, ndang na laho mago upana i.

Asing ni i, dosa na balga do molo tartuktuk manang gabe ndang porsea baoa i dibahen angka apostelna. Alani i, dipasingot Jesus ma nasida asa manat tu hata dohot parniulaon ni nasida. Ninna Jesus ma, “Manang ise na mambahen sahalak sian na metmet on gabe ndang porsea be tu ahu, tumagon ma digantungkon tu rungkungna batu gilingan na balga jala dilonongkon tu laut.” (Markus 9:42) Dipaboa Jesus do muse asa dibolongkon nasida angka na boi mambahen nasida tartuktuk, nang pe i mansai arga. Umpamana songon tangan, pat, manang mata ni nasida. Ai tumagon do mago i alai hita masuk tu Harajaon ni Debata, sian apala di hita i alai masuk tu Gehena (Rura Hinom). Diantusi nasida do molo Gehena i manggombarhon hamatean saleleng ni lelengna. Ai inganan panutungan ni sampa do i na jonok tu Jerusalem. Jala hea do diida angka apostel inganan i.

Didok Jesus ma muse, “Manat ma, so tung lea rohamuna tu sahalak sian na metmet on. Hudok ma tu hamu, adong do angka suru-suruan ni nasida na sai rap dohot Damang na di banua ginjang i.” Sadia arga do “na metmet” i di Jahowa? Dipaboa Jesus ma tudosan taringot tu sahalak baoa. Biru-biruna adong 100 ekor. Tingki mago sada, ditinggalhon do na 99 nai laho mangalului na sada i. Dung dapot na sada i, mansai las ma rohana. Alani i didok Jesus ma, “Ndang lomo roha ni Damang na di banua ginjang i mago agia sada pe sian na metmet on.”​—Mateus 18:10, 14.

Ra ala diingot Jesus na marsoal i angka apostelna taringot tu ise na umbalga, didok Jesus ma muse, “Songon na siniraan ma hamu jala tongtong mardame na sada tu na asing.” (Markus 9:50) Molo lambok hatanta, dos ma i songon sipanganon na siniraan. Mura ma i jaloon ni angka jolma jala parohon hadameon.​—Kolosse 4:6.

Sipata, olo do masa parsoalan na balga. Alani i, dipaboa Jesus ma cara mangadopi i. Ninna ma, “Molo mardosa donganmu, dapothon ma ibana jala paboa salana, holan hamu padua. Molo ditangihon ibana do ho, dapotmu ma muse donganmi.” Alai songon dia do molo ndang ditangihon ibana hita? Jesus mandok, “Togihon ma sahalak manang dua halak donganmu, ala patar do ganup parsoalan marhite hatorangan ni dua manang tolu saksi.” Jala molo so ditangihon, “paboa ma tu huria,” i ma angka sintua. Nasida do na dipillit laho mambahen haputusan. Alai songon dia do molo ndang ditangihon? Jesus mandok, “Etong ma ibana songon sahalak sian bangso na asing manang songon sijalo pajak.” Lapatanna, unang be mardongan dohot nasida.​—Mateus 18:15-17.

Ingkon ihuthonon ni sintua do tudu-tudu na sian Bibel. Ai molo didok nasida do sasahalak marsala jala dipinsang, haputusan na binahen ni nasida “dirahut do i di banua ginjang”. Alai molo didok nasida, ndang marsahala sasahalak, “dipalua do i di banua ginjang”. On ma tudu-tudu na dipangke di huria. Molo marpungu angka sintua laho mambahen haputusan sisongon i, Jesus mandok, “Molo adong dua manang tolu halak marpungu di bagasan goarhu, di tonga-tonga ni nasida do ahu.”​—Mateus 18:18-20.