Ikkon Dibayar Hamu do Pajak?

GODANGAN halak dang olo membayar pajak. Alana menurut nasida, gabe tu na so denggan annon dipakke hepeng ni nasida manang dikorupsi. Alai adong do halak na so olo membayar pajak alani hati nurani ni nasida. Piga-piga halak di Timur Tengah dang olo membayar pajak. Didok nasida, “Dang olo hami dohot manuhor peluru na lao mambunu gellengnami.”

Sian najolo nungnga godang halak na makkilala songon i. Misalna sahalak pamimpin agama Hindu naung mate, i ma si Mohandas K. Gandhi. Didok ibana, “Molo tadukung sada negara secara langsung manang na dang, hape diurupi kekuatan militer do negara i, sarupa ma i songon na rap mangulahon dosa hita dohot negara i. Jadi mardosa do manang ise pe na membayar pajak, na poso manang na matua. Alana songon na mangurupi negara i do nasida.”

Songon i ma na dihilala sahalak pakar di abad ke-19, i ma si Henry David Thoreau. Menurut ibana gabe terganggu hati nuranina molo dibayar ibana pajak na dipakke lao membiayai porang. Didok ibana, “Pantas do diatur pamaretta hati nurani ni rakyatna nang pe holan satokkin? Molo songon i do, tu aha ma pola adong hati nurani ni jolma i?”

Ikkon dipikkirhon halak Kristen do taringot on. Alana didok do di Bibel, ikkon dijaga nasida do asa tetap ias hati nurani ni nasida di saluhutna. (2 Timoteus 1:3) Asing ni i, marhak do pamaretta manjalo pajak sian rakyatna. Didok di Bibel, “Ikkon unduk do sude halak tu pamaretta, ai dang adong huaso na so ro sian Debata. Jala Debata do na mambahen pamaretta adong di ingananna be. Akka i ma alasanna umbahen na dioloi hamu pamaretta. Dang holan alani na mabiar hamu dihukum, alai dohot do alani panggora ni rohamuna. Alani i do umbahen na ikkon digarar hamu pajak. Ai parhobas ni Debata do nasida na torus mangurupi godang jolma. Lehon hamu ma tu pamaretta aha na gabe hak ni nasida. Garar ma pajak tu na manjalo pajak. Molo adong dipangido sigararonmuna, garar hamu ma i. Habiari ma halak na patut dihabiari. Pasangap ma halak na patut dipasangap.”—Rom 13:1, 5-7.

Ditanda do halak Kristen di abad na parjolo rakyat na olo membayar pajak, nang pe godangan sian hepeng ni pajak i dipakke tu militer. Songon i ma tong Saksi Jahowa saonari.a Attong boasa ma maralo pandangan ni halak Kristen tu pandangan ni godangan jolma saonari? Jala molo dibayar halak Kristen pajak, na melanggar hati nuranina do ibana disi?

Pajak dohot Hati Nurani

Di abad na parjolo, gabe tu militer do sebagian pajak na dibayar halak Kristen. Alani i do makana dang olo si Gandhi dohot si Thoreau membayar pajak. Gabe terganggu ninna hati nurani ni nasida alani i.

Porlu do taingot, dioloi halak Kristen pe paretta di Rom pasal 13 dang ala na mabiar nasida dihukum, alai ‘alani panggora ni roha ni nasida’ do. (Rom 13:5) Molo diihutton halak Kristen panggora ni rohana manang hati nuranina, pasti gararonna do pajak, nang pe dipakke hepeng i tu akka ulaon na so dihalomohon rohana. Boasa boi songon i? Asa boi taattusi i, adong do na porlu taboto taringot hati nurani, na mangurupi hita mamboto dia na sittong dohot na sala.

Songon na didok si Thoreau, sude halak adong do hati nuranina. Alai dang otomatis i boi diihutton. Asa boi tabahen las roha ni Debata, ikkon sadalan do hati nuranitta tu standarna na adong di Bibel. Jala ikkon torus do tapadenggan cara berpikkirta asa sadalan tu cara berpikkir ni Debata. Alana untimbo do pikkiran ni Debata sian pikkiranta. (Psalmen 19:7) Alani i ikkon taboto do boha pandangan ni Debata taringot pamarettaon ni jolma. Boha haroa pandanganna?

Didok si Paulus, pamarettaon ni jolma i dos songon ‘parhobas ni Debata na torus mangurupi godang jolma’. (Rom 13:6) Lapatanna, nasida do na bertanggung jawab asa tertib masyarakat jala nasida do na mangulahon akka ulaon na bermanfaat tu rakyatna. Memang olo do ra korupsi nasida. Alai nang pe songon i, diparade nasida do akka na marguna tu rakyatna. Contohna jasa pos, pendidikan, pemadam kebakaran, dohot penegakan hukum. Nang pe diboto Debata dang denggan pamarettaon ni nasida, alai diloas Ibana dope nasida mamaretta. Jala disuru Debata do hita asa membayar pajak. Jadi molo tabayar pajak, on patuduhon na taargai do pengaturan na dibahen Debata.

Alai holan satokkin do diloas Debata pamarettaon ni jolma mamaretta. Lao digatti Debata do sude pamarettaon ni jolma tu Harajaonna. Jala lao pasaeonna do sude masalah na dihilala godang jolma saleleng marratus taon. (Daniel 2:44; Mateus 6:10) Alai saleleng so mamaretta dope Harajaon ni Debata i, dang diloas Debata halak Kristen mangalo pamaretta. Misalna, dang olo membayar pajak manang mangulahon na asing.

Boha molo songon si Gandhi perasaanmuna? Boha molo dihilala hamu, gabe mardosa hamu molo dibayar hamu pajak na dipakke lao membiayai porang? Molo mangihutton pikkiran ni jolma, denggan do perasaanmuna i. Alai ingot ma, untimbo do cara berpikkir ni Debata sian cara berpikkir ni jolma. Sarupa ma i songon halak na jongjong di ginjang ni dolok. Unggodang do na boi diida ibana sian na boi diida halak na di rura. Jadi ikkon tatiru do cara berpikkir ni Debata. Didok Debata do, “Songon langit na dao untimbo sian tano on, songon i ma dalanku dao untimbo sian dalanmuna Jala pikkiranku dao untimbo sian pikkiranmuna.”—Jesaya 55:8, 9.

Marhak do di Saluhutna?

Nang pe didok di Bibel ikkon tabayar pajak, dang berarti marhak do pamarettaon ni jolma mangulahon manang aha pe tu rakyatna. Didok Jesus, terbatas do hak na dilehon Debata tu pamarettaon ni jolma. Tikki disukkun akka halak tu Jesus ikkon dibayar nasida do pajak tu pamarettaon ni Rom manang na dang, songon on ma alus ni Jesus, “Lehon ma tu Kesar appuna ni Kesar, jala tu Debata appuna ni Debata.”—Markus 12:13-17.

Pamaretta manang “Kesar” do na mencetak hepeng jala na manottuhon nilaina. Jadi menurut Debata marhak do nasida mangido asa tagarar i. Carana membayar pajak. Alai didok Jesus dang marhak nasida mangido “appuna ni Debata”, i ma hangoluatta dohot sude na tabahen lao manomba Debata. Molo maralo paretta ni jolma tu paretta ni Debata, urrikkot do di halak Kristen mangoloi Debata sian jolma.—Ulaon ni Apostel 5:29.

Dang setuju sebenarna halak Kristen hepeng pajak na dibayar nasida i dipakke tu na so denggan. Alai dang olo nasida ikut campur tu urusan ni pamaretta, mangalo pamaretta, manang dang olo membayar pajak. Alana molo diulahon nasida i, on patuduhon na so porsea do nasida boi Debata pasaehon sude hasusaan ni jolma. Jadi sabar do nasida paimahon Harajaon ni Debata na dipimpin Jesus Anakna. Didok Jesus do, “Dang sian portibi on Harajaokku.”—Johannes 18:36.

Manfaatna Mangihutton Hata ni Debata

Godang do manfaatna molo taihutton Hata ni Debata na mandok asa tabayar pajak. Gabe dang dihukum hita ala melanggar hukum jala dang mabiar hita ala tarboto pangalahotta. (Rom 13:3-5) Na lebih penting, gabe ias ma hati nuranitta di jolo ni Debata jala on patuduhon na tapasangap do Ibana. Memang gabe unggodang do hepeng na tapakaluar martimbakkon akka halak na so olo membayar pajak manang na margabus. Alai nang pe songon i, pos ma rohatta marjanji do Debata lao mangalehon akka na porlu tu naposona na setia. Songon on ma na didok si Daud, “Hea do au poso jala nungnga matua au saonari, alai dang hea dope huida halak na tigor marroha ditinggalhon, jala dang hea gellengna mangido-ido sipanganon.”—Psalmen 37:25.

Jala gabe tenang ma pikkiranta molo taihutton paretta ni Debata asa membayar pajak. Dang disuru Debata hita asa martanggung jawab lao mamboto tudia dipakke pamaretta hepeng pajakta i. Sarupa ma i songon sewa ni jabu na tabayar tu nappunasa jabu i. Dang martanggung jawab hita lao mamboto tudia dipakke ibana hepeng i. Adong pengalaman ni sahalak bawa na margoar si Stelvio. Sebelum marsiajar Bibel ibana, berjuang do ibana saleleng martaon-taon lao mambahen perubahan politik di Eropa selatan. Alai dukkon i, dang diulahon ibana be i. Didok ibana, “Huakkui do dang boi jolma mambahen keadilan dohot hadameon di tano on. Jala dang boi jolma mambahen marsada sude jolma di tano on. Holan Harajaon ni Debata do na boi mangulahon i.”

Molo setia hamu ‘mangalehon tu Debata appuna ni Debata’, boi ma dihilala hamu pos ni roha songon na dihilala si Stelvio. Boi ma diida hamu tikki mamaretta Harajaon ni Debata tu tano on, dang adong be masalah dohot ketidakadilan na dibahen pamarettaon ni jolma disi.

[Surat na di Toru]

[Kutipan]

Ikkon torus do tapadenggan cara berpikkirta asa sadalan tu cara berpikkir ni Debata. Alana untimbo do pikkiran ni Debata sian pikkiranta

[Kutipan]

Molo dibayar halak Kristen pajak, gabe ias ma hati nurani ni nasida di jolo ni Debata. Jala on patuduhon na pos do roha ni nasida tu janji ni Debata lao mangalehon sude na dihaporluhon nasida

[Gambar]

“Lehon ma tu Kesar appuna ni Kesar, jala tu Debata appuna ni Debata”

[Credit Line]

Copyright British Museum