Jesus Mangalehon Mangan Marribu Halak

Las do roha ni 12 apostel ni Jesus i marbarita di Galilea. Dipaboa nasida do tu Jesus “sude naung diulahon dohot na niajarhon ni nasida”. Sasintongna loja do nasida. Alai, ndang adong tingki ni nasida laho mangan alani godang ni jolma na sai marroan. Alani i, didok Jesus ma, “Laho ma hita tu inganan na lungun asa boi hita maradi satongkin.”​—Markus 6:30, 31.

Nangkok ma Jesus dohot angka siseanna tu parau jala laho ma nasida tu inganan na lungun, di sabola timur ni Sunge Jordan, dao sian Betsaida. Alai tarboto ma i tu angka jolma. Gabe marlojongi ma nasida jala parjolo do nasida sahat sian Jesus tu inganan i.

Dung kaluar Jesus sian parau, diida ibana ma naung godang halak marpungu disi. Asi ma rohana mangida nasida, ai songon biru-biru na so adong parmahanna do nasida. Dung i “godang ma diajarhon” Jesus tu nasida taringot tu Harajaon i. (Markus 6:34) Dipamalum Jesus do “angka halak na marsahit”. (Lukas 9:11) Alai dung botari, didok angka siseanna i ma tu Jesus, “Mansai lungun do inganan on jala nunga botari. Suru ma mulak natorop i, asa laho tu angka huta manuhor sipanganon di nasida.”​—Mateus 14:15.

Didok Jesus ma tu nasida, “Ndang pola laho nasida, lehon hamu ma nasida mangan.” (Mateus 14:16) Sasintongna, diboto Jesus do na laho sibahenonna. Alai didok Jesus pe songon i, na naeng manguji si Pilippus do. Ai halak Betsaida do ibana, kota na jonok tu inganan i. Alani i, didok Jesus ma, “Didia do tuhoronta roti laho allangon ni natorop on?” Adong do hira-hira 5.000 baoa na ro tusi. Ra, 10.000 halak ma sude molo dietong angka borua dohot dakdanak. Gabe didok si Pilippus ma, “Tatuhor pe roti saarga 200 dinar [sadinar dos tu upa ni sadari parkarejo], ndang sae i nang pe sasaotik be nasida.”​—Johannes 6:5-7.

Dos do pangkilalaan ni si Andreas dohot si Pilippus. Didok ibana ma, “Adong do sahalak dakdanak baoa dison, na mamboan lima roti barli dohot dua dengke na gelleng. Alai dia ma sae i tu jolma natorop on?”​—Johannes 6:9.

Hira-hira bulan Maret manang April do tingki i, i ma andorang so Paska taon 32 M. Martubuan do godang duhut-duhut disi. Dung i didok Jesus ma tu angka siseanna asa disuru hundul angka jolma i. Adong na 50 jala adong na 100 sasapunguan. Dibuat Jesus ma lima roti dohot dua dengke i, ditangiangkon, jala diponggoli Jesus ma i. Dung i disuru ma angka sisean i mambagi-bagihon tu angka halak. Mangan ma nasida sahat tu na butong. Longang situtu ma nasida!

Dung i, didok Jesus ma tu angka siseanna, “Papungu hamu ma angka na lobi i asa unang adong na bolong.” (Johannes 6:12) Jala 12 karanjang godang ni sipanganon na lobi i!