Ringkot ni Tangiang dohot Toruk ni Roha

Nunga hea dipaboa Jesus tu angka siseanna ringkot ni sai martangiang. (Lukas 11:5-13) Dung i, tingki di Samaria manang di Galilea Jesus, dipaboa ibana ma muse asa unang marnaloja martangiang. Dipaboa ibana ma sada tudosan:

“Di sada kota adong ma sahalak hakim na so mangkabiari Debata jala ndang parduli tu jolma. Di kota i, adong ma muse sahalak ina na mabalu na sai ro mandapothon hakim i jala mandok, ‘Tigor ma bahen tu parkarongku.’ Alai leleng do ndang olo hakim i. Dungkon i didok ibana ma di bagasan rohana, ‘Nang pe ndang huhabiari Debata manang ndang parduli ahu tu jolma, alai bahenonku ma na tigor tu ibana asa unang sai ro be ibana jala dilojai ahu. Ai sai disusai ina na ma mabalu on do ahu.’”​—Lukas 18:2-5.

Dung i didok Jesus ma muse, “Dibege hamu do na nidok ni hakim na so tigor i? Alani i, nda bahenon ni Debata do na tigor tu halak na pinillitna na jou-jou tu Ibana arian dohot borngin? Jala sabar do Ibana maradophon nasida.” (Lukas 18:6, 7) Aha do na diajarhon Jesus taringot tu Amana sian tudosan on?

Ndang didok Jesus na sarupa Debata songon hakim na so tigor i. Alai na nidokna: Haru hakim na so tigor pe, dioloi do pangidoan ni ina na mabalu i ala sai dijugulhon mangido, tarlumobi ma Debata Jahowa. Tigor do Debata jala burju, alani i lehononna do pangidoan ni naposona na so marnaloja martangiang. Didok Jesus do muse, “Hudok ma tu hamu, hatop do bahenonna hatigoran tu nasida.”​—Lukas 18:8.

Jotjot do lea roha ni angka halak mangida na pogos. Alai sangap do nasida tu angka parhuaso dohot tu na mora. Molo Debata ndang songon i. Molo dung dapot tingkina, uhumon ni Debata ma angka parjahat alai lehononna ma hangoluan na saleleng ni lelengna tu angka naposona.

Nunga dipaboa Jesus tudosan taringot tu ringkot ni sai martangiang. Dung i dipaboa ibana ma porlu do marpos ni roha tingki martangiang. Alai songon ina na mabalu i, pos dope roha ni halak saonari na ‘hatop bahenon ni Debata hatigoran tu nasida’? Disungkun Jesus ma, “Tingki ro Anak ni jolma i, jumpangna dope haporseaon na songon on di tano on?” (Lukas 18:8) Tangkas ma, ndang godang be halak na marhaporseaon di tingki haroro ni Kristus songon ina na mabalu i.

Dirimpu na manangihon i, nunga marhaporseaon nasida. Jala didok roha ni nasida nunga mangulahon na sintong nasida. Hape leas do nasida tu na pogos. Alani i, dipaboa Jesus ma tudosan na asing:

“Adong ma dua halak baoa na laho tu bagas joro martangiang, na sada halak Parise jala na sada nai sijalo pajak. Jongjong ma halak Parise i jala martangiang ma ibana di bagasan rohana mandok, ‘Mauliate do hudok tu ho ale Debata, ala ndang dos ahu songon angka na so mangulahon na sintong, pangarampok, pangalangkup, manang songon sijalo pajak on. Marpuasa do ahu dua hali saminggu. Hulehon do saparsampulu sian sude pansarianku.’”​—Lukas 18:10-12.

Songon na burju do halak Parise idaon di jolo ni jolma. Alai ndang sian rohana i, holan asa dipuji halak do nasida. Somalna marpuasa do nasida di ari Senin dohot di ari Kamis. Boasa? Ala ari onan do tingki i, jala godang na mangida. Diulahon nasida do parenta na so apala ringkot, songon manggarar saparsampulu sian suan-suanan. (Lukas 11:42) Hape piga-piga bulan naung salpu, dileai halak Parise do angka na pogos jala didok, “Alai natorop on, na so mananda Patik i, diburai Debata do nasida.”​—Johannes 7:49.

Didok Jesus ma muse, “Alai dao do jongjong sijalo pajak i, haru manatap tu langit pe ndang barani ibana. Sai dipungkuli do andorana mandok, ‘Ale Debata, asi ma roham tu ahu pardosa on.’” Toruk do roha ni sijalo pajak on ala olo mangangkui dosana. Dung i didok Jesus ma, “Hudok ma tu hamu, dung mulak baoa on tu jabuna, dumenggan do ibana di adopan ni Debata sian halak Parise i. Ai dipatutoru do manang ise na patimbo dirina, jala dipatimbo do manang ise na patutoru dirina.”​—Lukas 18:13, 14.

Tangkas ma, dipatuduhon Jesus do na ringkot martoruk ni roha. Ringkot do poda on tu angka siseanna. Ai godang do di humaliang ni nasida halak Parise na mangkaringkothon hasangapon. Alai ringkot do poda on tu sude na mangihuthon Jesus.