Ari Paska na Parpudi

Di Dolok Jetun, diajari Jesus do opat apostelna taringot harorona di ari na naeng ro dohot taringot panutup ni jaman on.

Godang situtu do na diulahon Jesus tanggal 11 Nisan i! Tingki mulak tu Betania laho marborngin disi, didok Jesus ma tu angka apostelna, “Nunga diboto hamu, dua ari nai nama Paska jala pasahatonna ma Anak ni jolma i asa diuhum mate di hau.”—Mateus 26:2.

Naeng dipamate angka pamimpin agama do Jesus tingki i, ala dipaboa ibana hajahaton ni nasida di jolo ni godang halak. Marsogotna i, ndang laho Jesus dohot angka apostelna manang na tudia pe, asa unang pajumpang dohot angka halak. Ai naeng mangarayahon Paska do Jesus dohot angka apostelna di ari Kamis tanggal 14 Nisan dung bonom mata ni ari.

Alai laho ma angka malim kepala dohot pangituai ni bangso i tu jabu ni sintua ni malim Kayapas. Laho marhua nasida tusi? Ala nunga dipaila Jesus nasida di jolo ni godang halak, dihatai nasida ma songon dia “laho manangkup dohot mambunu Jesus”. Andigan diulahon nasida rencana i? Didok nasida ma, “Unang ma tingki perayaan i, asa unang gaor natorop i.” (Mateus 26:4, 5) Ai lomo do roha ni godang halak tu Jesus.

Tompu ma adong na ro mandapothon nasida. Tarsonggot ma nasida mangida sahalak apostel ni Jesus ro, i ma si Judas Iskariot. Ai gabe dipangke Sibolis do roha ni si Judas na holongan di hepeng i laho manghianati Jesus. Didok ibana ma tu nasida, “Aha ma lehononmuna tu ahu, molo hupasahat Jesus tu hamu?” (Mateus 26:15) Las ma roha ni nasida mangalehon “30 logam perak”. (Lukas 22:5) Dos do on tu arga ni sahalak hatoban. (2 Musa 21:32) On patuduhon na leas situtu do roha ni nasida tu Jesus. “Mulai sian i dilului [si Judas] ma tingki na denggan laho manjehehon Jesus tu nasida sian na so pamotoan ni natorop i.”—Lukas 22:6.

Ari Rabu tanggal 13 Nisan ma Jesus parpudi sahali di Betania. Marsogotna i ma diparade angka na porlu tu ulaon Paska. Ingkon adong do na mangalului anak ni biru-biru na laho diseat jala ditutung tanggal 14 Nisan. Ndang dipaboa Jesus dope didia nasida mangulahon Paska jala ise na paradehon i. Alani i, ndang boi dope dipaboa si Judas tu angka malim kepala taringot i.

Ra di ari Kamis arian do tingki i. Didok Jesus ma tu si Petrus dohot si Johannes, “Laho ma hamu jala parade hamu ma sipanganon Paska tu hita.” Disungkun nasida ma ibana, “Didia do dipangido roham i paradeonnami?” Didok Jesus ma tu nasida, “Tingki masuk hamu tu kota, jumpangmuna ma disi sahalak baoa na mamboan gunsi inganan ni aek. Ihuthon ma ibana tu jabu na dia pe ibana masuk. Dung i dok ma tu nampuna jabu i, ‘Didok Guru i, “Dia do kamar inganan di ahu asa mangan Paska ahu rap dohot siseanku?”’ Patuduhononna ma tu hamu kamar parginjang na bidang naung diatur laho pangkeonta. Disi ma parade hamu.”—Lukas 22:8-12.

Siihuthon Jesus do parjabu i. Olo do ra nunga diboto ibana na naeng di jabuna Jesus mangarayahon Paska. Dung sahat apostel na dua i di Jerusalem, toho do sude na nidok ni Jesus. Dung i diparade nasida ma anak ni biru-biru dohot angka na porlu, asa boi Jesus dohot 12 apostelna mangarayahon Paska.