Holong ni Jesus tu Bagas Joro ni Debata

Sian Kana, laho ma Jesus tu Kapernaum. Rap borhat do ibana dohot inana, angka anggina, i ma si Jakobus, si Josep, si Simon dohot si Judas.

Boasa laho Jesus tu Kapernaum? Kota na ribur do Kapernaum jala godang do halak na ro tusi. Umbalga do Kapernaum sian Nasaret manang Kana. Asing ni i, godang do sisean ni Jesus na maringanan jonok tusi. Alani i, boi ma urupan ni Jesus nasida marbarita di huta ni nasida.

Dibahen Jesus do angka tanda halongangan manang mukjizat saleleng di Kapernaum. Godang ma halak na disi dohot na di humaliangna mamboto tanda halongangan na binahen ni Jesus. Alai, ala nunga jonok ari Paska taon 30 M, borhat ma Jesus dohot angka donganna tu Jerusalem. Ganup taon do Jesus laho tu Perayaan sisongon i.

Mangihuthon Patik ni Debata, ingkon lehonon ni halak Israel do pelean binatang di bagas joro. Adong do sian na dao na ro tu Jerusalem. Saleleng di Jerusalem, ingkon tuhoron ni nasida do sipanganon ni nasida. Jala diloas do di Patik i, boanon ni nasida hepeng laho manuhor “lombu, biru-biru”, dohot angka na porlu di nasida saleleng di Jerusalem. (5 Musa 14:24-26) Alai godang do partiga-tiga di Jerusalem mamangke Patik i sidalian laho manggadis binatang di alaman ni bagas joro. Jala adong do deba sian nasida na manipu angka panuhor i marhite mambahen arga na mansai timbo.

Dung diida Jesus dibahen angka partiga-tiga i songon i di bagas joro, muruk situtu ma ibana. Jala diida angka siseanna do i.

Aha do dibahen Jesus dung diida songon i? Dipanserakkon Jesus ma hepeng ni angka situngkar hepeng, dibalikkon ma meja ni nasida, jala dipalao ma partiga-tiga i. Didok Jesus ma, “Boan hamu ma i sude sian on! Unang bahen hamu jabu ni Damang gabe inganan partiga-tigaan!”​—Johannes 2:16.

Longang ma angka sisean mangida na masa i. Diingot angka sisean i ma surirang taringot tu Anak ni Debata na mandok, “Holong ni rohangku tu bagasmi dos songon api na marsigorgor.” Alai disungkun halak Jahudi ma, “Aha ma tanda halongangan bahenonmu patuduhon tu hami na marhak ho mambahen songon i?” Dialusi Jesus ma, “Rumpakkon hamu ma bagas joro on, jala pajongjongonku ma i di bagasan tolu ari.”​—Johannes 2:17-19; Psalmen 69:10.

Dirimpu halak Jahudi do bagas joro na di Jerusalem i na nidok ni Jesus. Gabe didok nasida ma, “Boi ma pajongjongonmu i di bagasan tolu ari? Ai 46 taon lelengna dipajongjong bagas joro on.” (Johannes 2:20) Alai sasintongna, bagas joro na nidok ni Jesus, i ma pamatangna sandiri. Tolu taon dung na masa i, tingki dipahehe Jesus sian na mate, diingot angka siseanna ma muse hatana i.