Jesus do “Roti Hangoluan”

Dung dilean Jesus marribu halak mangan marhite tanda halongangan manang mukjizat, naeng dibahen nasida ma Jesus gabe raja. Alani i laho ma Jesus sian inganan i. Borngin i, mardalan ma Jesus di ginjang ni aek, jala ditogu ibana do si Petrus ala naeng lonong. Dipaso ibana do haba-haba manang badai. Jala dipalua ibana do angka sisean i asa unang lonong kapal ni nasida.

Dung i, mulak ma Jesus tu Kapernaum. Ro ma godang halak mandapothon ibana. Nasida, i ma halak na nilehonna i mangan. Disungkun nasida ma Jesus, “Guru, sadihari do ho tuson?” Dilului nasida pe Jesus ala naeng mangan do nasida muse. Alani i, dipasingot Jesus ma nasida. Ninna ma, “Unang ma karejo hamu tu sipanganon na olo busuk. Alai karejo ma hamu tu sipanganon na so olo busuk na parohon hangoluan saleleng ni lelengna.” Disungkun nasida ma Jesus, “Aha do sibahenonnami laho mangulahon ulaon na sian Debata?”​—Johannes 6:25-28.

Dirimpu nasida do ulaon na di Patik ni si Musa na nidok ni Jesus. Alai, ndang i na nidokna. Jesus mandok, “Laho mangulahon ulaon na sian Debata, patudu hamu ma haporseaonmuna tu halak na sinuruna i.” Alai ndang olo nasida porsea tu Jesus. Nang pe naung godang dipatudu Jesus tanda halongangan tu nasida, alai sai dipangido nasida dope i bahenonna asa porsea nasida. Didok nasida do, “Aha do na laho ulahononmu?Mangallang manna do angka ompunami tingki di padang pasir, songon na tarsurat i, ‘Dilehon Ibana do roti sian banua ginjang laho allangon ni nasida.’”​—Johannes 6:29-31; Psalmen 78:24.

Didok Jesus ma tu nasida, “Ndang si Musa na mangalehon roti sian banua ginjang tu hamu, alai Damang i do na mangalehon tu hamu roti na tutu sian banua ginjang. Ai roti na sian Debata, i ma ibana na turun sian banua ginjang jala na mangalehon hangoluan tu portibi on.” Ala ndang diantusi lapatan ni hata ni Jesus i, didok nasida ma, “Tuan, sai lehon ma tu hami roti sisongon i.” (Johannes 6:32-34) Roti na dia do na nidok ni Jesus?

Didok Jesus ma, “Ahu do roti hangoluan i. Manang ise na ro tu ahu ndang na laho male be, jala manang ise na patuduhon haporseaon tu ahu ndang na laho mauas be. Songon naung hea hudok tu hamu, nang pe diida hamu ahu alai ndang porsea hamu tu ahu. . . . Ai turun pe ahu sian banua ginjang ndang na laho mangulahon lomo ni rohangku, alai laho mangulahon lomo ni roha ni na marsuru ahu i do. Lomo ni roha ni na marsuru ahu, i ma asa unang mago nanggo sahalak pe sian sude na nilehonna tu ahu, alai asa paheheonku do nasida di ari parpudi. Ai on do lomo ni roha ni Damang, asa manang ise na manjalo Anak i jala na patuduhon haporseaon tu ibana dapotna ma hangoluan saleleng ni lelengna.”​—Johannes 6:35-40.

Tarsonggot ma angka jolma i mambege alus ni Jesus jala marungut-ungut. Didok nasida ma, “Boasa didok ibana dirina ‘roti na turun sian banua ginjang’”? (Johannes 6:41) Ai didok roha ni nasida, tukang hau na sian Nasaret do Jesus i. Didok nasida do, “Nda Jesus anak ni si Josep i ibana? Nda tatanda do amana dohot inana?”​—Johannes 6:42.

Dialusi Jesus ma, “Paso hamu ma ungut-ungutmuna i. Ndang adong manang ise na boi ro tu ahu, anggo so Ama na marsuru ahu i na manogu ibana, jala paheheonku ma ibana di ari parpudi. Songon na Sinurat ni Angka Panurirang, ‘Ajaran ni Jahowa ma nasida sude.’ Ro do tu ahu manang ise naung manangihon jala naung marsiajar sian Ama i. Alai ndang adong jolma naung hea mangida Ama i. Holan na ro sian Debata do naung hea mangida Ama i. Tutu do na hudok on tu hamu, manang ise na porsea dapotna ma hangoluan saleleng ni lelengna.”​—Johannes 6:43-47; Jesaya 54:13.

Hea do didok Jesus tu si Nikodemus, “Ganup halak na porsea tu ibana [Anak ni Debata na sasada i] mandapot hangoluan na saleleng ni lelengna.” (Johannes 3:15, 16) Alai saonari, dipaboa Jesus do muse tu godang halak, ndang marhite manna manang roti na adong di Galilea na mambahen nasida boi mandapot hangoluan na saleleng ni lelengna. Antong songon dia do asa dapot ni nasida hangoluan i? Diulangi Jesus ma hatana i. Ninna ma, “Ahu do roti hangoluan i.”​—Johannes 6:48.

Torus do dipaboa Jesus hatorangan taringot tu roti na sian surgo i, sahat tu na mangajari Jesus di sinagoga na di Kapernaum.