Songon dia do Halak na Togu Haporseaonna? Pasti Togu do Haporseaon ni Halak na Rajin Beribadah?
Na didok Bibel
Songon na didok Bibel halak na togu haporseaonna, i ma halak na lomo rohana mambahen las roha ni Debata jala berusaha mangihutton cara marpikkir ni Debata. Asing ni i, sai berusaha do ibana mangihutton aturan ni Debata jala mangihutton petunjuk na sian tondi parbadia di ngoluna.a—Rom 8:5; Epesus 5:1.
Di Bibel dipaboa do perbedaan ni halak na togu haporseaonna tu halak na mangihutton portibi on. Misalna didok di Bibel, “Dang tarjalo ni na mangihutton lomo ni roha ni portibi on akka na dipaboa marhite tondi parbadia,” manang ajaran ni Debata. (1 Korint 2:14-16) Asing ni i halak na mangihutton portibi on, sering do ‘cemburu jala marsalisi’. Dang murah hati nasida jala dang marroha na dame. (1 Korint 3:1-3) Halak na lomo rohana marbada jala mamola-mola, digoari do tong nasida halak na “mangihutton hisap-hisap ni daging ala dang adong tondi parbadia di nasida.”—Judas 19; Poda 16:28.b
Lao tabahas ma
Boasa lomo roha ni jolma naeng jonok tu Debata?
Tudos songon Debata do jolma ditoppa. (1 Musa 1:27) Alani i ma lomo roha ni jolma naeng mamboto akka na so boi diida.
Asing ni i, mulai sian na tubu jolma boi do nasida patuduhon akka sifat ni Debata Jahowac. Misalna, marroha na dame, marasi ni roha, jala adil. (Jakobus 3:17) Jadi molo berusaha sasahalak mangoloi paretta ni Debata jala patoguhon haporseaonna, pasti diurupi Debata do ibana marhite tondi parbadiana.—Ulaon ni Apostel 5:32.
Boasa ikkon togu haporseaonta?
Molo togu haporseaon ni sasahalak, boi ma dapotna ‘hangoluan dohot hadameon’. (Rom 8:6) Hadiah na berharga do i sian Debata.
Hangoluan: Marjanji do Debata mangalehon hangoluan na saleleng ni lelengna tu halak na togu haporseonna.—Johannes 17:3; Galatia 6:8.
Hadameon: Maksudna dison mardame dohot Debata. Gabe musu ni Debata do halak na sai mamikkiri lomo ni roha ni daging. (Rom 8:7) Alai molo berusaha sasahalak patoguhon haporseaonna, ‘lehonon ni Debata ma tu ibana hadameon na so boi diattusi jolma’. (Pilippi 4:6, 7) Jadi molo boi dihilala sasahalak songon i, pasti bahagia ma ngoluna.—Mateus 5:3.
Boha do carana asa gabe halak na togu haporseaonna?
Parsiajari jala oloi ma paretta ni Debata. Molo dijaha hamu Bibel, boi ma diboto hamu akka paretta ni Debata. Alana pikkiran ni Debata do na disuratton akka bawa na manurat Bibel jala ‘ditogu-togu tondi parbadia’ do nasida. (2 Petrus 1:21) Jala molo diparsiajari hamu Bibel, boi do i mangurupi hamu manomba Debata “mangihutton panogu-noguon ni tondi parbadia dohot hasittongan”.—Johannes 4:24.
Martangiang asa diurupi Debata. (Lukas 11:13) Boi do diurupi Debata hamu asa gabe halak na togu haporseaonna jala tarida ma i sian sifatmuna. (Galatia 5:22, 23) Jala molo martangiang hamu tu Debata, boi do dilehon Ibana bisuk tu hamu lao menghadapi tantangan.—Jakobus 1:5.
Mardongan dohot halak na togu haporseaonna. Boi do nasida manjujui hamu lao patoguhon haporseaonmuna. (Rom 1:11, 12) Alai molo mardongan hamu tu halak na maralo cara marpikkirna tu Debata, boi do gabe dang togu be haporseaonmuna.—Jakobus 4:4.
Pasti togu do haporseaon ni halak na rajin beribadah?
Belum tentu togu haporseaon ni halak na rajin beribadah. Alana Bibel mandok, “Molo adong na mandok di bagasan rohana sisomba Debata ibana, alai dang dirajai dilana, na paoto-otohon dirina do ibana disi jala dang adong lapatanna ibana manomba Debata.”—Jakobus 1:26.
Didok di Bibel molo togu haporseaon ni sasahalak, pasti sesuai do carana manomba Debata tu lomo ni roha ni Debata. Jala diboto nasida do holan sada “tondi parbadia”, i ma tondi parbadia na sian Debata. Tondi parbadia i ma na mangurupi nasida manomba Debata di bagasan sada organisasi na “marsada jala mardame ala ditogu-togu tondi parbadia.”—Epesus 4:1-4.
Pandapot na sala taringot halak na togu haporseaonna
Pandapot na sala: Boi do cara na dia pe mambahen togu haporseaon ni sasahalak, asal ma sonang rohana.
Na sasittongna: Didok Bibel, ikkon diurupi Debata do sasahalak asa boi togu haporseaonna. Jadi ikkon diakkui ibana do, Jahowa do Debata na manoppa sudena. Jala ikkon diihutton ibana do lomo ni roha ni Debata di ngoluna.—Psalmen 100:3.
Pandapot na sala: Dang olo halak na togu haporseaonna mangulahon manang aha pe na mambahen las roha jala olo do nasida menyiksa dirina sandiri.
Na sasittongna: Molo disiksa sasahalak dirina, on patuduhon na “lomo-lomona do manomba Debata” jala dang togu sebenarna haporseaon ni halak na songon i. (Kolosse 2:18, 23) Bibel pe mandok, pasti marlas ni roha do halak na togu haporseaonna, dang gabe menyiksa dirina sandiri.—Poda 10:22.
Pandapot na sala: Pasti togu do haporseaon ni halak na boi makkatai tu tondi ni na mate.
Na sasittongna: Halak na mangulahon spiritisme biasana porsea, boi do halak na mate makkatai tu halak na mangolu. Hape didok Bibel, dang diboto na mate be agia aha. (Parjamita 9:5) Jadi halak na makkatai tu halak na mate sebenarna makkatai tu suru-suruan na jahat do. Dang lomo roha ni Debata tu halak na mangulahon spiritisme jala dang boi togu haporseaon ni halak sisongon i.—3 Musa 20:6; 5 Musa 18:11, 12.
Pandapot na sala: Sude do toppaan ni Debata lomo rohana naeng jonok tu Ibana.
Na sasittongna: Luar biasa do sude toppaan ni Debata. (Psalmen 145:10; Rom 1:20) Alai holan jolma do na boi pajonokkon dirina tu Debata. Molo binatang holan mangihutton nalurina do jala dang boi pajonokkon diri tu Debata. Jala holan mangihutton kebutuhan ni dagingna do sude tindakan ni binatang. (2 Petrus 2:12) Alani i ma didok Bibel maralo do halak na togu haporseaonna tu halak na marpikkiran songon binatang.—Jakobus 3:15; Judas 19.
a Di Bibel sering do diterjemahon hata tondi gabe “hosa”. Boi do tong i lapatanna sada gogo na so boi tarida. Bibel pe mandok, Debata do na umgogo sian sude pribadi na so tarida. Molo togu haporseaon ni sasahalak jala jonok ibana tu Debata, pasti olo do ibana mangulahon lomo ni roha ni Debata jala olo ditogu-togu tondi parbadia.
b Di Bibel, istilah “mangihutton hisap-hisap ni daging” dohot istilah “na mangihutton lomo ni roha ni portibi on” dipakke lao patuduhon halak na pikkiran dohot tindakanna holan mangihutton hisap-hisap ni daging, jala dang parduli tu aturan ni Debata.
c Jahowa i ma goar ni Debata songon na disurat di Bibel.—Psalmen 83:18.