Sai ”Manongtong ma Holong ni Roha di Dongan!”

1, 2. Boasa ditongos si Paulus surat tu halak Kristen di Jerusalem?

DI TAON 61 DM, dihilala angka huria na di Israel do hadameon rap dohot dongan sahaporseaonnasida. Alai, apostel Paulus dipenjarahon do di tingki i di Rom. Si Timoteus dongan sapardalananna, baru malua dope sian penjara jala dihirim rohanasida boi rap laho manjumpangi angka dongan na adong di Judea. (Heb. 13:23) Holan di bagasan lima taon do halak Kristen di Judea, tarlumobi na tading di Jerusalem mangarade. Boasa? Nunga didok Jesus hian tu angka siseanna, molo diida nasida Jerusalem dihaliangi angka tentara, ingkon hatop ma nasida maporus sian Jerusalem.​—Luk. 21:20-24.

² Nunga salpu 28 taon dung dipaboa Jesus tu siseanna aha na laho masa tu Jerusalem. Saleleng i, marsihohot do halak Kristen di Israel tu Debata nang pe manaon godang hasusaan alani haporseaon. (Heb. 10:32-34) Alai, lomo roha ni si Paulus asa mangarade nasida laho mangadopi na masa di ari na naeng ro. Na laho masa ma pangunjunan bolon tu nasida. (Mat. 24:20,21; Heb. 12:4) Ingkon porsea do nasida tu parenta ni Jesus, ingkon maporus sian Jerusalem asa boi malua. (Jaha Heber 10:36-39.) Diurupi Jahowa do si Paulus tingki manurat surat na laho ditongos tu angka dongan sahaporseaonna. Surat on, digoari ma buku Heber na dibahen laho patoguhon nasida manaon na laho masa di ari na naeng ro.

3. Boasa buku Heber ringkot di hita saonari on?

³ Ringkot do buku Heber parohahonon ni naposo ni Debata saonari on. Boasa? Alana, sarupa do na masa saonari on dohot na masa tu halak Kristen di Judea. Saonari, hita mangolu di ”ari hasusaan, di angka tingki parpudi”, alai, godang do na martahan tingki manaon hasusaan alani haporseaon dohot pangunjunan. (2 Tim. 3:1, 12) Deba sian hita mangolu di masa na dame, na so pola manaon godang hasusaan alani haporseaon. Songon halak Kristen di tingki ni si Paulus, hita pe porlu mangarade. Boasa? Ndang sadia leleng nai, idaonta ma masa haporsuhon na bolon!​—Jaha Lukas 21:34-36.

4. Aha do ayat na dipangke di taon 2016, jala boasa denggan on dipangke di taon on?

⁴ Aha do na boi mangurupi hita asa mangarade mangadopi na masa tu ari na naeng ro? Di buku Heber, godang do dipaboa si Paulus na boi patoguhon partondionta. Sada sipaingot na ringkot tadapot ma di buku Heber 13:1, na mandok, ”Manongtong ma holong ni roha di dongan!” Ayat on ma dipillit gabe ayat na dipangke di taon 2016.

AHA DO HOLONG NI ROHA DI DONGAN?

5. Aha do holong ni roha di dongan?

⁵ Aha do holong ni roha di dongan? Hata Junani asli na dipangke si Paulus lapatanna ”holong ni roha tu dongan”. Holong ni roha di dongan, i ma holong na togu songon holong tu keluarga. (Joh. 11:36) Alani i, unang ma hita gabe dongan na holan burju idaon, alai burju ma tu sude songon na marhahamaranggi. (Mat. 23:8) Didok si Paulus, ”Ingot hamu ma holong ni roha sama dongan Kristen! Masijolojoloan ma hamu masipasangapan!” (Rom 12:10) Hata on patuduhon holong na togu tu sude dongan sahaporseaon. Holong ni roha di dongan, i ma holong na marojahan tu prinsip ni Kristen, na boi mangurupi naposo ni Debata asa tongtong togu paralealeonna tu dongan na asing.

6. Songon dia do halak Kristen na sintong mangantusi lapatan ni holong ni roha di dongan?

⁶ Hata ”holong ni roha di dongan” godang do tarida di buku Kristen. Di halak Jahudi najolo, hata ”dongan” somalna dipangke tu keluarga manang tu na so keluarga. Alai, ndang hea dipangke hata ”dongan” tu halak na so Jahudi. Di halak Kristen na sintong hata ”donganta” patuduhon tu sude halak Kristen na sintong nang pe nasida sian bangso na asing. (Rom 10:12) Nunga diajar Jahowa hita asa mangkaholongi sude dongan. (1 Tes. 4:9) Alai, boasa ringkot tongtong patuduhon holong ni roha di dongan?

BOASA RINGKOT TONGTONG PATUDUHON HOLONG NI ROHA DI DONGAN?

7. (a) Boasa ringkot patuduhon holong ni roha di dongan? (b) Aha do muse na mambahen ingkon tapatogu holongta tu angka dongan na asing?

⁷ Ringkot ingkon tapatuduhon holong ni roha di dongan ala dipangido Jahowa hita mangulahon i. Ndang na tutu tahaholongi Jahowa molo ndang tahaholongi angka donganta. (1 Joh. 4:7, 20, 21) Asing ni i muse, ringkot tapatuduhon holong ni roha di dongan ala hita mangolu di ari parpudi. Tingki disurat si Paulus suratna tu halak Kristen Jahudi, diboto ibana ndang sadia leleng nai ingkon tadingkonon ni nasida ma jabu dohot angka artana. Nunga didok Jesus hian na laho masa ma ari hasusaan. (Mrk. 13:14-18; Luk. 21:21-23) Alani i, andorang so ro dope ari i, halak Kristen porlu tongtong patoguhon holong tu angka dongan na asing.​—Rom 12:9.

8. Aha do na porlu taulahon saonari andorang so ro dope haporsuhon bolon?

⁸ Ndang sadia leleng nai, masa ma haporsuhon bolon tu sude jolma. (Mrk. 13:19; Pgk. 7:1-3) Porlu hita mangoloi poda na mandok, ”Laho ma ho ale bangsongku, bongot i ma angka bilutmu [kamar] jala hinsu ma pintumi di pudim. Martamonding ma ho satongkin paima salpu rimas i.” (Jes. 26:20) Hata ”bilut [kamar]” lapatanna, i ma huria Kristen. Di huria Kristen do hita manomba Jahowa rap dohot angka donganta. Alai, ndang sae holan ro tu parpunguan sambing. Dipaingot si Paulus do halak Kristen Jahudi asa masipajujuan nasida jala patuduhon holong tu dongan na asing. (Heb. 10:24, 25) Saonari on, porlu hita patoguhon holongta tu dongan, asa boi martahan tingki manaon hasusaan di ari na naeng ro.

9. (a) Andigan do tingkina hita patuduhon holong tu dongan? (b) Bahen ma tudosan songon dia naposo ni Debata patuduhon holong tu dongan?

⁹ Saonari ma tingkina tapatuduhon holong tu dongan andorang so masa dope hasusaan bolon i. Godang do donganta na mangkilala hasusaan alani gempa, banjir, halisungsung, tsunami dohot angka na asing. Jala adong do na ingkon martahan manaon hasusaan alani haporseaon. (Mat. 24:6-9) Ganup ari do hita manaon hasusaan di parhepengon. (Pgk. 6:5, 6) Tingki masa hasusaan tu angka donganta, on ma dalanta asa lam patuduhon sadia balga holongta tu nasida. Nang pe ndang adong be holong di portibi on, ingkon tapatuduhon holong tu donganta. (Mat. 24:12)^[1]

SONGON DIA DO HITA TONGTONG PATUDUHON HOLONG NI ROHA DI DONGAN?

10. Aha do na ringkot laho tatangkasi saonari?

¹⁰ Nang pe godang hasusaanta, songon dia do hita boi tongtong patuduhon holong ni roha di dongan? Jala songon dia hita patuduhon na tahaholongi do angka dongan sahaporseaonta? Dung didok apostel Paulus ”Manongtong ma holong ni roha di dongan”, dipaboa ibana adong pigapiga cara na laho siulahonon ni halak Kristen. Taida ma onom sian cara on.

11, 12. Songon dia do patuduhon partamueon tu halak na asing? (Ida gombar di mula ni parsiajaran.)

¹¹ ”Unang halanggushon [lupa] hamu partamueon.” (Jaha Heber 13:2.) Aha do lapatan ni hata ”partamueon”? Lapatan ni hata on didok si Paulus, ”Burju ma tu halak na asing.” Hata on paingothon hita tu si Abraham dohot si Lot. Nasida na dua patuduhon burju ni roha tu halak na so ditanda nasida. Ujungna, diboto si Abraham dohot si Lot ma halak na asing i, surusuruan do. (1 Mus. 18:2-5; 19:1-3) Haburjuon ni si Abraham dohot si Lot mangonjar roha ni halak Kristen Jahudi patuduhon holong ni roha tu dongan marhite partamueon.

¹² Songon dia do patuduhon partamueon tu halak na asing? Tatogihon ma donganta tu jabunta laho mangan manang laho patoguhon rohanasida. Tatamue ma sintua kaliling dohot tunggani boruna tingki ro tu hurianta. (3 Joh. 5-8) Ndang pola ingkon sipanganon na godang manang na arga. Molo tatamue angka donganta laho patoguhon nasida do, ndang na laho patuduhon hasangapon. Unang ma mardingkan manamue angka donganta, alai sude ma tatamue. (Luk. 10:42; 14:12-14) Parsiajaranna, unang ma lupa hita mangulahon partamueon tu sude donganta!

13, 14. Songon dia do hita mangingot angka dongan na tarhurung?

¹³ ”Ingot hamu ma angka na tarhurung.” (Jaha Heber 13:3.) Tingki disurat si Paulus surat on, diingot ibana do angka dongan na di penjara alani haporseaonnasida. Dipuji si Paulus do angka dongan na di huria, didok ibana, ”Rap manaon do hamu dohot angka na tarhurung.” (Heb. 10:34) Saleleng opat taon dipenjarahon, diurupi angka dongan sahaporseaonna do si Paulus. Alai, songon dia do angka dongan na tading di inganan na dao mangurupi si Paulus? Diurupi nasida do si Paulus marhite tangiang.​—Plp. 1:12-14; Heb. 13:18, 19.

¹⁴ Saonari pe, godang do Sitindangi Ni Jahowa na dipenjara alani haporseaonnasida. Adong do angka dongan na boi mangurupi nasida. Alai, songon dia do hita boi mangurupi nasida nang pe dao ingananta? Holong ni roha di dongan mangonjar rohanta asa tongtong manangiangkon nasida. Umpamana, boi do tatangiangkon angka donganta baoa, borua dohot angka dakdanak na dipenjarahon di Eritrea songon donganta si Paulos Eyassu, si Isaac Mogos, dohot si Negede Teklemariam, naung dipenjara saleleng dua pulu taon.

15. Songon dia do hita pasangaphon pardongansaripeonta?

¹⁵ ”Sangap ma pardongansaripeon di na saluhut.” (Jaha Heber 13:4.) Ingkon tapatuduhon do holong ni roha di dongan marhite parange na ias. (1 Tim. 5:1, 2) Umpamana, molo taulahon parmainanon dohot donganta di huria, on boi mambahen ibana dohot keluargana susa. (1 Tes. 4:3-8) Mago ma pos ni roha ni dongan tu hita molo taulahon ulaon na roa. Pingkirhon ma on, songon dia do pangkilalaan ni tunggani boru molo mangida tunggani dolina manonton pornografi? Hilalaon ni tunggani boru dope na dihaholongi ibana jala na dipasangap dope aturan di parsaripeon?​—Mat. 5:28.

16. Songon dia mangkasabamhon na adong mangurupi hita patuduhon holong ni roha di dongan?

¹⁶ ”Hasabamhon hamu ma na adong.” (Jaha Heber 13:5.) Marhaporseaon tu Jahowa, boi mangurupi hita marpos ni roha asa mangkasabamhon na adong di hita. Songon dia do on boi mangurupi hita patuduhon holong ni roha di dongan? Molo tahasabamhon aha na adong di hita, ingotonta ma dongan sahaporseaon do na rumingkot di hita sian hepeng manang arta. (1 Tim. 6:6-8) Ndang marungutungut hita tu donganta manang holsoan taringot parngoluonta. Jala ndang mangahut manang mangiburu tu dongan. Boi ma hita basa mangalehon tu na asing molo tahasabamhon na adong di hita.​—1 Tim. 6:17-19.

17. Songon dia do pos ni roha boi mangurupi hita patuduhon holong ni roha di dongan?

¹⁷ ”Asa tung pos rohanta.” (Jaha Heber 13:6.) Marhaporseaon tu Jahowa mambahen hita marpos ni roha tingki manaon hasusaan. Pos ni roha mangurupi hita asa marroha na torang. Molo marroha na torang hita, boi ma tapatuduhon holong ni roha di dongan, marhite patoguhon jala paposhon roha ni angka dongan. (1 Tes. 5:14, 15) Nang pe masa haporsuhon bolon, boi do hita togu ala taboto nunga jonok ari haluaonta.​—Luk. 21:25-28.

18. Songon dia do hita patoguhon holong ni rohanta tu angka sintua?

¹⁸ ”Ingot hamu ma na manguluhon hamu.” (Jaha Heber 13:7, 17.) Angka sintua di huria mamangke tingki dohot gogona laho mangurupi hita. Molo tarimangi do sude na binahen ni nasida, tamba ma holong dohot pangargaionta tu nasida. Ndang lomo rohanta mago las ni roha ni nasida manang gabe marsak alani parniulaonta. Alani i, rade ma hita mangoloi nasida. Molo taulahon songon on, hita pasangaphon nasida ”mardongan holong ni roha ala ni ulaonnasida!”​—1 Tes. 5:13.

SAI MARSITUTU MA MANGULAHON I

19, 20. Songon dia do hita asa tongtong patuduhon holong ni roha di dongan?

¹⁹ Naposo ni Jahowa ditanda ala nasida patuduhon holong ni roha di dongan. Songon i do tongtong na masa di tingki ni si Paulus. Alai, dijujui si Paulus dope angka dongan sahaporseaonna asa patuduhon holong ni roha na togu. Didok ibana, ”Naeng ma lam sumurung hamu!” (1 Tes. 4:9, 10) Tangkas ma dison, adong do tingki di hita mambahen hamubaon tu na denggan!

²⁰ Molo taida ayat na dipangke di taon on di Bale Harajaon, tarimangi ma sungkunsungkun on: Rade do ahu laho manamue? Songon dia do ahu boi mangurupi angka dongan na di penjara? Huargai do aturan ni Debata taringot pardongansaripeon? Aha do na boi mangurupi ahu mangkasabamhon na adong? Songon dia do ahu boi marhaporseaon tu Jahowa? Songon dia do ahu asa boi unduk tu angka sintua? Molo taulahon cara na onom on, ndang marisuang be ayat na dipangke di taon on. Alai, boi ma paingothon hita tu hata ni si Paulus na mandok, ”Manongtong ma holong ni roha di dongan.”​—Heb. 13:1.