Andigan do Tikki na Pas lao Makkatai?

1. Aha do na diajarhon di Parjamita 3:1, 7?

ADONG do halak na godang makkatai. Alai adong do halak na parsip. Sipata lomo do rohatta, asa hohom donganta na godang makkatai i. Jala donganta na parsip, asa godang makkatai. Alai songon na dipaboa di ayat tema ni parsiajaran on, adong do tikkina makkatai jala adong do tikkina hohom. (Jaha Parjamita 3:1, 7.)

2. Ise do na mamboto andigan jala songon dia hita ikkon makkatai?

² Ditoppa Jahowa do hita asa boi makkatai. Sada silehon-lehon do i. (2Mus. 4:10, 11; Pgk. 4:11) Marhite Bibel, diurupi do hita asa mangattusi songon dia mamakke silehon-lehon i. Jadi di parsiajaran on, taulas ma akka contoh na adong di Bibel, asa taboto andigan do tikkina hita makkatai jala andigan do tikkina hita hohom. Taida ma boha do pakkilalaan ni Jahowa taringot aha na tadok tu akka dongan. Parjolo, taparrohahon ma andigan do tikki na pas lao makkatai.

ANDIGAN DO HITA IKKON MAKKATAI?

3. Hombar tu Rom 10:14, andigan do hita ikkon makkatai?

³ Manang sadihari pe, ikkon rade do hita makkatai taringot Jahowa dohot Harajaonna tu akka halak. (Mat. 24:14; jaha Rom 10:14.) Molo taulahon i, na maniru Jesus do hita. Sada tujuan ni Jesus ro tu tano on, i ma lao paboahon hasittongan taringot Amana. (Joh. 18:37) Alai taingot ma, rikkot do tong mamboto boha carana makkatai. Jadi tikki paboahon taringot Jahowa tu akka halak, ikkon ‘lambok ma hita jala sangap’ ma nasida. Jala ikkon taargai do pakkilalaan dohot haporseaon ni nasida. (1 Ptr. 3:15) Jadi tujuanta dang holan lao makkatai, alai lao mangajarhon hasittongan asa hona i tu roha ni nasida.

4. Songon na dipaboa di Poda 9:9, boha carana asa boi pakkataionta mangurupi na asing?

⁴ Akka sintua pe, unang pola ganggu rohana lao makkatai tu sahalak dongan na porlu dipasingot. Tontu ikkon dipillit nasida do tikki na pas lao makkatai asa unang gabe maila dongan na dipasingot i. Dilului do muse tikki na cocok, asa unang adong halak na asing mambege nasida makkatai. Jala marsitutu do akka sintua asa boi mangalehon poda, alai toktong mambahen sangap halak na dipodai i. Ikkon dipasahat nasida do prinsip ni Bibel lao mangurupi donganta i asa lam marbisuk. (Jaha Poda 9:9.) Boasa ikkon barani hita makkatai tikki dihaporluhon? Taparrohahon ma dua contoh. Na parjolo, taringot sahalak baoa na ikkon pasingotton anakna, jala na sada na i, taringot sahalak borua na makkatai tu sahalak baoa na lao gabe raja.

5. Aha do na patuduhon molo si Eli dang denggan pasingotton anakna?

⁵ Adong sahalak Sintua ni Malim na margoar si Eli. Jala adong dua anakna. Holong hian do rohana tu anakna i. Alai dang dipasangap nasida Jahowa. Dilehon do tu nasida tanggung jawab na balga, i ma gabe malim na marhobas di tabernakel. Alai gabe lomo-lomo ni nasida do. Dang diargai nasida pelean na dilehon tu Jahowa. Jala barani do nasida mangulahon seks na so patut. (1 Sam. 2:12-17, 22) Menurut Patik ni si Musa, ikkon dipamate do anak ni si Eli i. Alai palambokhu do si Eli pasingotton nasida. Jala tong do diloas nasida marhobas di tabernakel. (5Mus. 21:18-21) Boha do pakkilalaan ni Jahowa tu cara ni si Eli pasingotton anakna i? Didok Jahowa ma tu si Eli, ‘Boasa ungsangap akka anakmu sian au dibahen ho?’ Ujungna, dipamate Jahowa ma dua anakna i.​—1 Sam. 2:29, 34.

6. Aha do na boi taparsiajari sian carita taringot si Eli?

⁶ Adong parsiajaran na rikkot na boi tabuat sian carita ni si Eli on. Molo adong dongan manang keluarga na mangalanggar patik ni Debata, ikkon makkatai do hita tu ibana. Tapasingot ma ibana taringot prinsip ni Jahowa. Tapastihon ma asa didapot ibana pangurupion sian akka sintua. (Jak. 5:14) Unang gabe songon si Eli hita, gabe umholong rohatta tu keluarga manang tu dongan, sian tu Jahowa. Memang, porlu do barani hita lao makkatai tu sasahalak na porlu tapasingot. Alai pasti denggan do hasil ni i. Saonari bandingkon ma pengalaman ni si Eli on, tu sahalak borua Israel na margoar si Abigail.

7. Boasa lao si Abigail makkatai tu si Daud?

⁷ Si Abigail, i ma istri ni sahalak na mora na margoar si Nabal. Tikki lari si Daud dohot akka tentarana sian Raja Saul, rap do nasida dohot akka parmahan ni si Nabal. Dijaga nasida do biru-biru ni si Nabal asa unang dibuat akka pangarampok. Alai dang diargai si Nabal i. Tikki dipangido si Daud saotik sipanganon dohot siinumon lao allangon ni akka tentarana, gabe muruk do si Nabal jala disonggaki do nasida. (1 Sam. 25:5-8, 10-12, 14) Alani i, gabe direncanahon si Daud ma lao mambunu sude baoa na adong di rumah tangga ni si Nabal. (1 Sam. 25:13, 22) Alai, boasa gabe dang saut sakkapna i? Ro ma si Abigail. Diboto ibana, on do tikkina ikkon makkatai ibana. Jadi barani do si Abigail makkatai tu si Daud na mamboan 400 halak na muruk, male, jala marsinjata.

8. Aha do na boi taparsiajari sian si Abigail?

⁸ Tikki pajuppang si Abigail dohot si Daud, barani do ibana makkatai. Toktong do sangap dibahen ibana si Daud, jala marsitutu do ibana lao paposhon roha ni si Daud. Nang pe dang terlibat si Abigail di parsoalan i, alai gabe ibana do na mangakku sala tu si Daud. Dipaboa ibana do akka na denggan sian si Daud, jala diasahon ibana do Jahowa. (1 Sam. 25:24, 26, 28, 33, 34) Songon si Abigail, porlu do hita barani makkatai tikki adong halak na mangulahon ulaon na sala manang na boi parohon jea. (Ps. 141:5) Toktong ma sangap tabahen ibana, alai ikkon barani do hita. Alana molo olo hita mangalehon sipasingot tu sasahalak, on patuduhon ale-ale na denggan do hita.​—Poda 27:17.

9-10. Aha do na porlu diingot akka sintua tikki mangalehon sipasingot?

⁹ Akka sintua do na tarlumobi ikkon barani makkatai tikki adong dongan di huria na mangulahon na sala. (Gal. 6:1) Memang, diingot nasida do jolma na so sempurna nasida. Jala sipata nasida pe porlu do tong dipodai. Alai unang ma gabe i na mambahen nasida gabe mabiar lao pasingotton halak na porlu dipasingot. (2 Tim. 4:2; Titus 1:9) Tikki mangalehon poda, marsitutu do nasida asa sabar jala denggan pasahatton i. Holong do roha ni sintua tu akka dongan. I do na mangonjar roha ni nasida lao mangalehon sipasingot. (Poda 13:24) Alai tujuan na urrikkot di nasida, i ma asa mangargai Jahowa dohot prinsipna. Jala manjaga huria asa toktong denggan.​—Ul. 20:28.

¹⁰ Saonari nga taboto be, di tikki na songon dia do hita porlu makkatai. Alai, adong do tikkina hita ikkon hohom. Boasa maol sipata hita mangulahon i?

ANDIGAN DO HITA IKKON HOHOM?

11. Tudosan aha do na dibahen si Jakkobus, jala boasa cocok i manggombarhon pakkataion?

¹¹ Sipata maol do hita manjaga pakkataionta. Sahalak panurat ni Bibel na margoar si Jakkobus mambahen tudosan taringot i. Didok ibana, “Molo adong halak na so hea sala di pangkataion, halak na so mardosa do i, na boi mangarajai saluhut dagingna. Molo tabahen kokang tu baba ni hoda asa dioloi hita, boi ma toguonta hoda i.” (Jak. 3:2, 3) Kokang, i ma alat na dibahen tu ulu dohot tu pamangan ni hoda. Molo tatarik tali ni kokang i, boi ma takendalihon hoda i asa so. Alai molo dang tatiop tali ni kokang i, gabe torus ma marlojong hoda i jala boi ma hita gabe kecelakaan. Suang songon i ma, molo dang takendalihon pakkataionta, gabe ro ma masalah. Taparrohahon ma di situasi songon dia hita porlu “manarik tali ni kokang” i, jala manjaga pakkataionta.

12. Andigan do tikkina hita ikkon “manarik tali ni kokang” jala hohom?

¹² Boha molo adong sahalak donganta na mamboto sada informasi na rahasia jala na so porlu botoon ni na asing? Misalna, pajuppang ma hita tu dongan na sian negara na mangorai ulaonta. Ra olo do naeng tasukkun, songon dia do nasida marpungu jala marbarita di negara i. Memang denggan do tujuanta manukkun. Ala holong do rohatta tu akka dongan, gabe naeng taboto ma aha na masa tu nasida. Jala asa boi tatangiakkon nasida. Alai dison do tikkina hita porlu “manarik tali ni kokang” jala toktong hohom. Molo tapaksa donganta i paboahon informasi rahasia, on patuduhon dang tahaholongi donganta i dohot akka dongan na tading di negara i. Tontu dang olo hita mambahen susa akka donganta na tading di negara na mangorai ulaonta. Akka dongan di negara i pe pasti dang olo paboahon songon dia Sitindangi boi marpungu jala marbarita di luat i.

13. Songon na dipaboa di Poda 11:13, aha do na ikkon diulahon akka sintua, jala boasa?

¹³ Akka sintua do na tarlumobi ikkon mangulahon prinsip na disurat di Poda 11:13 (Jaha.) Unang ma dipaboa nasida informasi tu akka halak na so porlu mamboto informasi i. Sipata dang mura on, apalagi molo nungnga marhasohotan sintua i. Memang suami istri ikkon jotjot do makkatai asa boi paboahon na di rohana, na di pikkiranna dohot holso ni rohana. Alai ikkon diboto sintua do, dang boi dipaboa ibana informasi rahasia taringot sahalak dongan di huria. Asa unang gabe roa goarna di huria jala unang gabe dang porsea be akka dongan tu ibana. Molo dipaboa ibana i, gabe dang porsea be akka dongan tu ibana jala gabe roa ma goarna di huria. Akka na mandapot tanggung jawab di huria, unang ma gabe “pargabus”. (1 Tim. 3:8) Lapatanna, dang boi nasida paboahon barita na so tutu, manang margosip. Molo holong do roha ni sahalak sintua tu istrina, dang olo ibana paboahon informasi na so porlu diboto istrina i.

14. Songon dia do sahalak istri boi mangurupi suamina mambahen goar na denggan?

¹⁴ Boi do sahalak istri mangurupi suamina asa mandapot reputasi na denggan, molo dang sai dijujui ibana suamina i paboahon akka informasi na so porlu botoonna. Molo diulahon ibana i, dang holan na mendukung suamina ibana disi, alai tong do dibahen ibana sangap akka halak na paboahon informasi i tu suamina. Jala na urrikkot, gabe las ma roha ni Jahowa ala dibahen ibana dame jala marsada huria i.​—Rom 14:19.

BOHA DO PAKKILALAAN NI JAHOWA TU AHA NA TAHATAHON?

15. Songon dia do pakkilalaan ni Jahowa tu tolu dongan ni si Job, jala boasa?

¹⁵ Godang do na boi taparsiajari sian bukku Job taringot andigan jala songon dia hita ikkon makkatai. Dung masa parukkilon na massai borat tu si Job, ro ma opat baoa lao mangapuli jala mangalehon poda tu ibana. Leleng do halak i hohom andorang so makkatai tu si Job. Tolu sian opat donganna i margoar si Elipas, si Bildad dohot si Sopar. Dang dipakke halak i tikki na hohom i lao mamikkirhon songon dia ma nasida boi mangurupi si Job. Gariada, gabe dipikkirhon nasida do cara lao patuduhon adong do na sala na diulahon si Job. Tarida do i sian akka hatana tu si Job. Memang tutu do deba na nidokna i, alai unggodang do na so tutu na didok nasida taringot Jahowa dohot taringot tu si Job. Gabe ditudu do si Job on jolma na so denggan. (Job 32:1-3) Songon dia do pakkilalaan ni Jahowa mangida on? Gabe muruk do Jahowa tu tolu baoa i. Didok Jahowa do halak i na oto. Jala gabe disuru Jahowa ma asa dipangido nasida si Job manangiakkon nasida.​—Job 42:7-9.

16. Aha do na boi taparsiajari sian contoh na so denggan na dibahen si Elipas, si Bildad dohot si Sopar?

¹⁶ Adong piga-piga parsiajaran na boi tadapot sian si Elipas, si Bildad dohot si Sopar. Na parjolo, unang ma hita manguhumi akka donganta. (Mat. 7:1-5) Alai, ikkon manat do tatangihon nasida andorang so makkatai hita. Molo denggan tatangihon nasida, boi ma taattusi songon dia do situasi ni nasida. (1 Ptr. 3:8) Na paduahon, ikkon lambok do hita, jala sittong ma nian hata na tapaboa. (Eps. 4:25) Jala na patoluhon, taingot ma sai diparrohahon Jahowa do aha na tadok tu akka dongan.

17. Aha do na boi taparsiajari sian si Elihu?

¹⁷ Baoa na paopatton na majuppangi si Job, i ma si Elihu, keluarga ni si Abraham. Ditangihon ibana do si Job dohot tolu baoa i makkatai. Ala manat do diparrohahon ibana hata ni nasida, gabe boi ma dilehon ibana poda na denggan, jala boi ma dipadenggan ibana cara marpikkir ni si Job. (Job 33:1, 6, 17) Rikkot do di si Elihu pasangappon Jahowa, dang dirina sandiri manang halak na asing. (Job 32:21, 22; 37:23, 24) Sian si Elihu hita marsiajar, adong do tikkina hita hohom jala manangihon. (Jak. 1:19) Jala tikki talehon poda i, tujuanta i ma lao pasangappon Jahowa, dang diritta sandiri.

18. Sian pakkataionta, songon dia ma hita patuduhon na taargai do silehon-lehon sian Jahowa?

¹⁸ Molo taihutton poda ni Bibel taringot andigan jala songon dia hita makkatai, on patuduhon na taargai do silehon-lehon sian Jahowa. Songon na didok Raja Salomo, “Hata na nidok na hona di tingkina, songon [apel na sian mas] do i na dilongkothon di perak.” (Poda 25:11, Bibel siganup ari.) Lapatanna, molo manat tatangihon aha na didok halak jala jolo tapikkirhon aha na naeng tahatahon, hatatta i boi do gabe songon apel na sian mas na massai uli jala mararga. Jadi, dang soal godang manang otik na tahatahon, boi do hatatta i patoguhon halak na asing jala mambahen las roha ni Jahowa. (Poda 23:15; Eps. 4:29) Jadi molo marbisuk hita makkatai, on patuduhon na taargai do silehon-lehon sian Jahowa.