Keluargamuna Boi do Martua

1, 2. Aha do na dihalomohon Jahowa tu sude keluarga?

DEBATA JAHOWA do na mamasumasu pardongansaripeon sian mulana. Bibel paboahon tu hita, ditompa ma borua na parjolo jala ”ditogu ibana tu si Adam”. Las roha ni si Adam jala didok ibana ma, ”On do sahali holiholi sian angka holiholingku, jala sibuk sian sibukku.” (1 Musa 2:22, 23) On patuduhon tu hita, lomo roha ni Jahowa asa martua sude keluarga.

² Alai, torop halak ndang mangkilala las ni roha di keluarga. Nang pe songon i, adong do prinsip ni Bibel tu sude halak na adong di keluarga asa boi denggan jala mandapot las ni roha.​—Lukas 11:28.

NA PINANGIDO NI DEBATA SIAN TUNGGANEDOLI

3, 4. (a) Songon dia do bahenon ni tungganedoli tu tungganeboruna? (b) Boasa ringkot na mardongan saripe marpamuati?

³ Dipaboa di Bibel, tungganedoli na burju mangkaholongi jala pasangaphon tungganeboruna. Jaha ma Epesus 5:25-29. Tungganedoli ingkon mangkaholongi tungganeboruna di saluhutna. Urupanna, sarihononna jala ndang bahenonna manang aha pe na mambahen marsak tungganeboruna.

⁴ Alai, songon dia do bahenon ni tungganedoli molo humurang ulaon ni tungganeboruna? Didok tu tungganedoli, ”Haholongi hamu ma niolimuna be, jala unang kasar pambahenanmuna tu nasida.” (Kolosse 3:19, Bibel siganup ari) Tungganedoli, ingot ma hamu pe jotjot do sala. Asa marpamuati (mengampuni) roha ni Debata, ingkon marpamuati do hamu tu tungganeborumuna. (Mateus 6:12, 14, 15) Molo rap marpamuati na mardongan saripe, boi do martua keluarga ni nasida.

5. Boasa tungganedoli ingkon pasangaphon tungganeboruna?

⁵ Dipangido Jahowa asa pasangapon ni tungganedoli tungganeboruna. Ringkot do on ingoton ni tungganedoli. Molo ndang burju ibana tu tungganeboruna, ndang tangihonon ni Jahowa tangiangna. (1 Petrus 3:7) Ndang marimbar baoa dohot borua di Jahowa. Arga do di Jahowa sude na mangkaholongi Ibana.

6. Aha do lapatan ni ”sada daging” tu na mardongan saripe?

⁶ Jesus mandok tu tungganedoli dohot tu tungganeboru, ”Ndada dua be nasida, tung sada daging do.” (Mateus 19:6) Alani i, ingkon hot do tu dongan saripena be ndang boi manimbil sian nasida. (Poda 5:15-21; Heber 13:4) Na mardongan saripe, unang ma holan mamingkiri dirina sandiri taringot hubungan suami istri. (1 Korint 7:3-5) Ingkon ingoton ni tungganedoli do, ”ndang dung dihosomi jolma dagingna, diparmudumu do jala dipainuinu”. Ingkon haholongan jala sarihonon ni tungganedoli do tungganeboruna. Tarlumobi, las do roha ni tungganeboru molo dihaholongi jala burju tungganedolina tu ibana.​—Epesus 5:29.

NA PINANGIDO NI DEBATA SIAN TUNGGANEBORU

7. Boasa ingkon adong na manguluhon di rumatangga?

⁷ Ingkon adong do na manguluhon keluarga asa denggan. Bibel mandok di 1 Korint 11:3, ”Kristus i do ulu ni ganup baoa, baoa i do ulu ni boruboru; alai Debata do ulu ni Kristus i.”

8. Songon dia do tungganeboru patuduhon na diparsangapi tungganedolina?

⁸ Tungganedoli pe boi do sala. Alai, molo rade tungganeboru mangulahon naung ditontuhon tungganedolina, parohon laba do on tu keluargana. (1 Petrus 3:1-6) Bibel mandok, ”Alai dihabiari parompuan i ma baoana!” (Epesus 5:33) Songon dia do molo ndang sahaporseaon ibana dohot tungganedolina? Tongtong do ingkon pasangaponna tungganedolina. Bibel mandok, ”Songon i ma angka parompuan: Unduk ma nasida maradophon angka harajaanna be; asa molo so porsea deba di Hata i, gabe meol rohanasida, binahen ni parange ni parompuan i, so pola mardongan hata, molo dibereng nasida parangemuna na bontor na marhatahuton.” (1 Petrus 3:1, 2) Molo denggan parange ni tungganeboru, boi do gabe diargai tungganedolina haporseaonna.

9. (a) Aha do bahenon ni tungganeboru molo ndang sapandapot dohot tungganedolina? (b) Aha do poda na didok tu tungganeboru di Titus 2:4, 5?

⁹ Aha do bahenon ni tungganeboru molo ndang sapandapot dohot tungganedolina? Ingkon marhite halambohon do paboaonna pandapotna. Umpamana, didok si Sarah hatana na mambahen sogo roha ni si Abraham. Alai, didok Jahowa tu si Abraham, ”Tangihon ma sude na nidok ni soara ni si Sarah tu ho.” (1 Musa 21:9-12) Ndang adong tungganedoli na olo mamillit na so denggan tu keluargana. Alani i, denggan ma molo tungganeboru mangulahon naung ditontuhon tungganedolina. (Ulaon ni Apostel 5:29; Epesus 5:24) Jala, tungganeboru na marbisuk, ingkon disarihon do keluargana. (Jaha Titus 2:4, 5.) Molo ringgas tungganeboru manarihon keluargana, lam holong ma roha ni tungganedolina dohot ianakhonna tu ibana.​—Poda 31:10, 28.

10. Aha do didok Bibel taringot na marsirang dohot na padaodao?

¹⁰ Molo adong hasusaan di keluarga, olo do na mardongan saripe gabe padaodao manang marsirang. Alai, Bibel mandok, ”Na so tupa sirang boruboru i sian hamulianna. Songon i baoa i, unang ma dipaulak dongan saripena.” (1 Korint 7:10, 11) Nang pe adong situasi na boi mambahen padaodao na mardongan saripe, ingkon manat do on dipingkiri. Alai, songon dia do taringot parsirangan? Bibel paboahon, holan parmainanon do na boi mambahen marsirang na mardongan saripe.​—Mateus 19:9.

NA PINANGIDO NI DEBATA SIAN NATUATUA

11. Aha do na tarlumobi dihaporluhon ianakhon?

¹¹ Natuatua, lehon hamu ma godang tingkimu asa boi rap dohot ianakhonmuna. Tarlumobi, pangurupion dohot pangajarionmuna taringot tu Jahowa na ringkot di nasida.​—5 Musa 6:4-9.

12. Songon dia do bahenon ni natuatua manjaga ianakhonna?

¹² Lam tu jahatna do portibi na nirajaan ni Sibolis on. Adong do halak na lomo rohana mangulahon pelecehan seksual tu dakdanak. Adong do natuatua na maila manaringoti seks tu ianakhonna. Alai, ingkon paboaon ni natuatua do i tu ianakhonna asa boi nasida pasidingkon dirina sian halak na mangulahon sisongon i. Ingkon jagaon ni natuatua do ianakhonna.a—1 Petrus 5:8.

13. Songon dia do bahenon ni natuatua mangajari ianakhonna?

¹³ Tanggung jawab ni natuatua do mangajari ianakhonna asa denggan marparange. Songon dia do bahenonmu mangajari ianakhonmu? Ringkot do pangajarajarion di ianakhon. Alai, unang maposihu hamu maminsang nasida. (Jeremia 30:11) Unang ma tingki muruk hamu maminsang ianakhonmu. Tontu, ndang olo hamu molo hatamu maniham songon podang jala mambahen hansit roha ni nasida. (Poda 12:18) Ajari ma ianakhonmu mangantusi boasa ingkon tangihonon nasida hata ni natuatuana.​—Epesus 6:4; Heber 12:9-11; ida Lampiran 30.

NA PINANGIDO NI DEBATA SIAN IANAKHON

14, 15. Boasa ingkon oloan ni dakdanak natuatuana?

¹⁴ Dipangido Jahowa do asa dioloi angka dakdanak natuatuana, nang pe sipata maol. (Lukas 22:42; Johannes 8:28, 29) Jahowa pe mangido angka dakdanak asa mangoloi tu natuatuana.​—Epesus 6:1-3.

¹⁵ Hamu dakdanak, nang pe maol dihilala hamu mangoloi sude hata ni natuatuamuna, alai ingot ma, molo sai mangoloi do hamu, las do roha ni Jahowa dohot roha ni natuatuamuna.b—Poda 1:8; 6:20; 23:22-25.

16. (a) Songon dia do Sibolis mangelaela angka na poso mangulahon na sala? (b) Boasa ringkot mamillit aleale na mangkaholongi Jahowa?

¹⁶ Olo do Sibolis mamangke dongan satorbangmu mangelaela hamu mangulahon na sala. Alana diboto Sibolis do ndang mura angka na poso pasidingkon elaela sian donganna. Umpamana, si Dina boru ni si Jakob maraleale tu halak na so manomba Jahowa. Gabe parohon godang hasusaan do on tu ibana dohot tu keluargana. (1 Musa 34:1, 2) Molo maraleale hamu tu na so mangkaholongi Jahowa, boi do hamu dielaela nasida asa mangulahon na so dihalomohon ni Jahowa. Boi do on mambahen hamu dohot keluargamu susa jala mambahen hansit roha ni Jahowa. (Poda 17:21, 25) I do alana, ringkot hamu mamillit aleale na mangkaholongi Jahowa.​—1 Korint 15:33.

KELUARGAMUNA BOI DO MARTUA

17. Aha do tanggung jawab ni sude anggota keluarga?

¹⁷ Molo sude anggota keluarga mangihuthon hata ni Debata, boi do nasida malua sian hasusaan na jotjot masa di keluarga. Alani i, hamu angka tungganedoli, haholongi ma tungganeborumu. Hamu angka tungganeboru, unduk jala pasangap hamu ma tungganedolimu. Ihuthon hamu ma sitiruon sian tungganeboru na dipaboa di Poda 31:10-31. Hamu angka natuatua, ajari hamu ma ianakhonmuna mangkaholongi Debata. (Poda 22:6) Hamu angka ama, malo ma hamu manguluhon keluargamu. (1 Timoteus 3:4, 5; 5:8) Hamu angka dakdanak, oloi ma natuatuamuna. (Kolosse 3:20) Taingot ma, sude anggota keluarga olo do sipata sala, alani i masianjuan jala marpamuati ma. Tutu ma, ditogutogu Jahowa do sude anggota keluarga marhitehite Bibel.