Aha do Lapatan ni “Alpa dohot Omega” jala Ise do i?

Na didok Bibel

Debata Jahowa do na didok “Alpa dohot Omega”. Jala tolu hali ma on dipaboa di Bibel.​—Pangungkapon 1:8; 21:6; 22:13.a

Boasa didok Debata “Alpa dohot Omega” Ibana?

Alpa dohot omega do huruf na parjolo dohot na parpudi di bahasa Junani. Jala bahasa Junani do na dipakke tikki manuratton Padan na Imbaru, termasuk ma disi bukku Pangungkapon. Jadi cocok do “alpa dohot omega” manggombarhon holan Jahowa do na didok mulana dohot ujungna. (Pangungkapon 21:6) Ibana do Debata Pargogo na so hatudosan, jala toktong do Ibana songon i. Nungnga adong Ibana “sian salelenglelengna ro di salelenglelengna”.​—Psalmen 90:2.

Ise do na “parjolo” jala na “parpudi”?

Di Bibel, hata on manggombarhon Debata Jahowa dohot Jesus Kristus, Anakna. Alai dang na gabe sarupa Jahowa dohot Jesus. Parrohahon ma contoh na dua on.

• Di Jesaya 44:6, Jahowa mandok, “Ahu do parjolo jala ahu do parpudi, jala dang adong Debata dukkon ni ahu.” Di ayat on, Jahowa naeng paboahon holan Ibana do Debata na sittong jala na toktong mangolu. (5 Musa 4:​35, 39) Jadi hata na “parjolo” dohot na “parpudi” di ayat i, sarupa do lapatanna tu hata “Alpa dohot Omega”.

• Adong hata “na Parjolo [protos, dang alpa] dohot na Parpudi [eskhatos, dang omega]” na disurat di Pangungkapon 1:​17, 18 dohot 2:8. Alai ayat on patuduhon taringot sasahalak na hea mate jala mulak mangolu. Jadi, ayat i dang manggombarhon taringot Debata. Alana dang hea mate Debata. (Habakuk 1:​12) Alai molo Jesus, hea do ibana mate jala mulak mangolu. (Ulaon ni Apostel 3:​13-​15) Ibana ma na parjolo na dipahehe tu surgo. Jala disi ma ibana “nuaeng sahat tu saleleng ni lelengna”. (Pangungkapon 1:​18; Kolosse 1:​18) Di ari na naeng ro, dipahehe Jesus ma akka naung mate. (Johannes 6:​40, 44) Jesus do na parpudi na langsung dipahehe Jahowa. (Ulaon ni Apostel 10:40) Jadi hata “na Parjolo dohot na Parpudi” di ayat i patuduhon taringot Jesus.

Jesus do “Alpa dohot Omega” na didok di Pangungkapon 22:13?

Dang. Dang taboto ise na makkatai di Pangungkapon 22:13. Jala dang holan sahalak na makkatai di bindu 22 on. Taringot bukku Pangungkapon on, Professor William Barclay mandok, “Dang taboto songon dia urutan ni bukku on; . . . jala maol do mamboto ise do sasittongna na makkatai.” (The Revelation of John, Volume 2, Edisi Revisi, halaman 223) Jadi boi ma tadok, Debata Jahowa do “Alpa dohot Omega” na didok di Pangungkapon 22:13.