Boasa ma Mate Jolma?

Na didok Bibel

Dang sala molo sukkun-sukkun rohatta boasa mate jolma. Tarlumobi molo mate keluargatta manang donganta. Didok di Bibel, “Dosa i do huaso na parohon hamatean i.”​—1 Korint 15:56.

Boasa gabe mardosa sude jolma jala mate?

Dung dialo si Adam dohot si Hawa Debata, gabe mardosa ma nasida jala dang boi be mangolu saleleng ni lelengna. (1 Musa 3:17-19) Dung dialo nasida Debata, dang tama be nasida mandapot hangoluan. Alana “sian Debata do ro hangoluan”.​—Psalmen 36:9; 1 Musa 2:17.

Ala nungnga mardosa si Adam, gabe dohot ma mardosa sude pinopparna. Bibel mandok, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.” (Rom 5:12) Ala nungnga mardosa sude jolma, gabe mate nasida.​—Rom 3:23.

Boi do haduan dang adong be jolma na mate?

Marjanji do Debata adong do annon tikkina “boddutonna ma hamatean saleleng ni lelengna”. (Jesaya 25:8) Asa unang adong be hamatean ikkon dipamago Debata do na mambahen adong hamatean i, i ma dosa. Alani i, dilehon Jahowa ma Jesus Kristus “na manesa dosa ni portibi on”.​—Johannes 1:29; 1 Johannes 1:7.