KISAH HIDUP
Dapotnami “Mutiara na Arga”
SI WINSTON dohot si Pamela (Pam) Payne karejo di kantor cabang Australasia. Sonang do ngolu ni nasida, alai adong do hasusaan na ingkon diadopi nasida. Umpamana, mangihuthon marragam budaya dohot tingki mate poso-poso ni nasida. Alai nang pe songon i, tongtong do togu holong ni nasida tu Jahowa dohot tu angka dongan. Jala las do roha ni nasida tu ulaon marbarita. Di wawancara on, tapangido ma asa diceritahon nasida pengalamanna.
Winston, paboa ma jolo tu hami songon dia hamu mangalului Debata.
Hami tading di peternakan Queensland, Australia. Ahu magodang di keluarga na so pola lomo rohana tu agama. Ala tading di inganan na pinjil, ndang pola godang halak na ditanda hami. Tingki marumur 12 taon, nunga hulului Debata. Martangiang do ahu asa huboto hasintongan taringot Debata. Dung magodang, hutadingkon ma peternakan i jala dapothu ma karejo di Adelaide, Australia Selatan. Dung marumur 21 taon, pajumpang ma ahu dohot si Pam tingki liburan di Sydney. Dipaboa ibana ma taringot kelompok Anglo-Israel, i ma angka halak Inggris na mangangku pinompar ni halak Israel sisampulu marga na laho tu pembuangan tingki abad ualu SM. Dung mulak ahu muse tu Adelaide, hupaboa ma taringot i tu dongan sakarejongku. Hape nunga marsiajar Bibel ibana dohot Sitindangi ni Jahowa. Dung mangkatai hami piga-piga jom taringot na dihaporseai Sitindangi, didok rohangku ma on do alus ni tangiangku tingki dakdanak. Marsiajar ma ahu taringot Debata dohot Harajaonna! Dapothu ma “mutiara na arga”.—Mat. 13:45, 46.
Pam, ho pe nunga mangalului mutiara na arga tingki poso dope. Songon dia ceritana?
Ahu magodang di kota Coffs Harbour, di New South Wales. Paragama do keluargangku. Ompung dohot natua-tuangku dohot tu kelompok Anglo-Israel. Sian na gelleng diajarhon do tu itongku, tu kakakku, dohot tu sepupuku, molo Debata las do rohana tu ompu ni halak Inggris. Alai, ndang porsea ahu tu ajaran i jala huhilala ndang boi ahu jonok tu Debata. Tingki marumur 14 taon, laho do ahu tu piga-piga gareja songon Anglikan, Baptis, dohot Adven Hari-Ketujuh. Alai ndang boi diurupi nasida ahu mananda Debata.
Pinda ma keluargangku tu Sydney, i ma inganan tingki parjolo ahu pajumpang dohot si Winston. Songon naung dipaboa ibana, pangkataionnami tingki i mambahen ibana marsiajar dohot Sitindangi. Dungkon i, dikirim ibana ma surat tu ahu na marisi godang ayat ni Bibel! Parjolo sahali, ndang lomo rohangku jala muruk do ahu. Alai gabe huboto ma, hasintongan do na dipaboa di surat i.
Di taon 1962, pinda ma ahu tu Adelaide asa boi jonok tu si Winston. Diatur ibana ma asa boi ahu tading dohot Sitindangi naung marsaripe, i ma si Thomas dohot si Janice Sloman na hea gabe misionaris di Papua Nugini. Mansai burju do nasida tu ahu. Tingki i, marumur 18 taon dope ahu, alai diurupi nasida do ahu asa lam mananda Jahowa. Lam leleng, gabe pos ma rohangku naung dapothu do hasintongan. Dung marhasohotan ahu dohot si Winston, mulai ma hami merintis. Nang pe godang ambat-ambat na diadopi hami, alai godang do pasu-pasu na didapot hami ala merintis. Alani i, gabe lam arga ma hasintongan i di hami.
Winston, paboa ma jolo tu hami taringot penugasanmu na parjolo.
A. Peta pardalanannami tingki gabe pengawas wilayah
B. Perangko sian piga-piga pulo. Kiribati dohot Tuvalu didok do i najolo pulo Gilbert dohot Ellice
C. Pulo koral na mansai bagak di Funafuti di negara Tuvalu. Sada sian godang pulo na hea dikunjungi hami andorang so ditugashon dope angka misionaris tusi
Ndang leleng dung marhasohotan ahu dohot si Pam, godang ma tugas na sian Jahowa dilehon tu hami. (1 Kor. 16:9) Tugas na parjolo, i ma tingki ro donganta si Jack Porter gabe pengawas wilayah tu hurianami. (Saonari ibana anggota Panitia Cabang Australasia.) Si Jack dohot istrina si Roslyn manjujui hami asa merintis biasa, jala las do rohanami merintis biasa saleleng lima taon. Dung marumur 29 taon ahu, ditugashon ma hami gabe pengawas wilayah tu Kepulauan Pasifik Selatan, na diawasi Kantor Cabang Fiji. Angka pulau i, i ma Samoa Amerika, Samoa, Kiribati, Nauru, Niue, Tokelau, Tonga, Tuvalu, dohot Vanuatu.
Tingki i, angka halak di inganan na pinjil curiga do tu Sitindangi ni Jahowa. Alani i, ingkon marbisuk do hami jala manat. (Mat. 10:16) Saotik do hami di huria, jala adong do piga-piga na so boi paradehon penginapan tu hami. Alani i, disungkun hami ma halak di luat i atik boha boi hami menginap di jabu ni nasida. Burju do nasida tu hami.
Winston, taringotna lomo do roham ate tu ulaon penerjemahan. Boasa gabe lomo roham?
Di Samoa, gabe instruktur di singkola tu angka sintua
Tingki di kepulauan Tonga, holan otik do risalah dohot buku kecil di bahasa Tonga. Alani i, tingki marbarita angka donganta, buku Kebenaran yang Membimbing kepada Kehidupan Kekal di bahasa Inggris do na dipangke laho mangurupi halak marsiajar Bibel. Tingki adong singkola tu angka sintua saleleng opat minggu, adong tolu sintua na mamboto saotik bahasa Inggris. Rade do nasida laho menerjemahon buku Kebenaran tu bahasa Tonga. Si Pam ma na mengetik, jala dikirim hami ma i tu kantor cabang Amerika Serikat laho dicetak. Saleleng ualu minggu ma i diulahon. Memang ndang pola denggan hasil ni terjemahannami i. Alai, boi do i mangurupi halak na marbahasa Tonga marsiajar hasintongan. Nang pe ndang penerjemah hami, alai mansai las do rohanami mangulahon i.
Pam, hira-hira, imbar do tinggal di pulo di penugasanmuna i sian di Australia?
Sada sian inganannami marborngin tingki gabe pengawas wilayah
Mansai imbar do! Dipiga-piga inganan, godang rongit, mohop jala lembap, godang bagudung, godang sahit, jala sipata otik do sipanganonnami. Alai ganup botari, gabe las do rohanami tingki mangida laut sian fale, i ma na didok halak Samoa jabu na maratap durame jala ndang mardingding na adong di kepulauan Polinesia. Tingki marsinondang bulan, boi ma diida hami bayangan ni hau ni kalapa dohot bayangan ni bulan di atas ni laut i. On mangonjar rohanami laho martangiang jala mangarimangi angka na denggan.
Holong do rohanami tu angka dakdanak. Longang hian do roha ni angka dakdanak tingki mangida halak na bontar na ro sian luat na asing. Tingki ro hami tu Niue, adong ma sahalak dakdanak baoa na manjama tangan ni si Winston ala marimbulu. Jala didok ma, “Marimbulu tanganmon, lomo rohangku mangida.” Ndang hea diida ibana sisongon i jala ndang diboto aha sidohononna!
Asi do rohanami mangida angka halak disi ala godang na pogos. Hurang diantusi nasida do manjaga kesehatan jala susa do mangalului aek siinumon, hape bagak hian do pemandangan disi. Alai ndang pola marsak angka donganta alani i. Alana, nunga somal dihilala nasida songon i. Alai las do roha ni nasida ala boi rap dohot keluarga, boi mamuji Jahowa jala adong inganan marpungu. Gabe sitiruon do nasida di hami asa tongtong manjumolohon na rumingkot jala hidup sederhana.
Pam, songon dia do carana asa boi dapotmu aek dohot paradehon sipanganon di inganan na baru?
Di Tonga, si Pam manunsi baju
Mandok mauliate do ahu tu bapakku, ala godang do na diajarhon tu ahu. Umpamana, songon dia mambahen api jala mangalompa mamangke api i. Diajari do muse ahu songon dia boi martahan nang pe holan otik sipanganon. Tingki ro hami tu Kiribati, tading ma hami di jabu na gelleng na maratap durame, na marlantai koral, jala mardingding bulu. Asa boi mangalompa, hubahen ma sada lubang di lantai laho mambahen api jala hubahen ma tempurung ni kalapa gabe sobanna. Laho mambuat aek, ingkon laho do ahu tu sumur jala marbaris dohot angka borua di huta i. Laho mambuat aek sian sumur i, dipangke nasida ma sada hau na ganjangna hira-hira 2 meter jala dibahen ma tali diujung ni hau i. Mirip do i songon pancing, alai ndang adong matana. Kaleng do na dibahen jala diikat dohot tali diujung ni hau i. Marganti do nasida mamangke i jala malo do nasida mamangke i. Mura do dapot ni nasida aek i. Hurimpu do mura mamangke i. Hape tingki hubaen songon i, ndang boi dapothu aek i, mumbang do kalengna i! Gabe mekkel-ekel ma nasida. Alai dung i, adong ma sahalak borua na olo mangurupi ahu. Burju-burju do angka halak disi.
Tontu, las do rohamuna saleleng penugasan di angka pulo i. Boi do paboaonmu pengalamanmuna tu hami?
Si Winston: Porlu do tingki di hami mamparsiajari hasomalan di luat i. Umpamana, tingki diparade angka dongan sipanganon, somalna dilehon nasida do sude sipanganon na adong di nasida. Mulana, ndang diboto hami na ingkon ditinggalhon deba di nasida. Alani i, diallang hami ma sude! Alai dung diboto hami taringot hasomalan on, gabe ditinggalhon hami ma deba sipanganon i di nasida. Nang pe dibahen hami na sala, alai sabar do angka dongan tu hami. Jala las do roha ni nasida pajumpang dohot hami ganup onom bulan, i ma tingki kunjungan pengawas wilayah. Ndang adong Sitindangi na asing na ditanda nasida, holan hami na dua do.
Di pulo Niue, manguluhon kelompok dinas
Gabe sada kesaksian na denggan do haroronami tusi. Godang halak di luat i ndang porsea tingki didok angka Sitindangi, molo nasida bagian sian sada organisasi na adong di liat portibi on. Dirimpu halak disi, holan di pulo i do na adong Sitindangi. Alani i, tingki ro angka Sitindangi sian luat na asing, gabe porsea ma nasida na tutu do na didok donganta i.
Si Pam: Sada pengalaman na so tarhalupahon hami, i ma tingki di Kiribati. Otik do angka donganta di huria i. Holan si Itinikai Matera do sintua disi. Alai, marsitutu do ibana paradehon angka na porlu di hami. Sada tingki, diboan ibana ma sada karanjang na marisi tolor ni manuk. Didok ibana ma, “Nion laho di ho.” Maol do dapotnami tolor ni manuk tingki i. Burju ni roha na dipatudu donganta on, mambahen las rohanami.
Pam, tingki keguguran ho, aha do na mangurupi ho asa martahan?
Taon 1973 tingki di Pasifik Selatan hami, hamil ma ahu. Alani i, mulak ma hami tu Australia. Alai opat bulan dungkon i, keguguran ma ahu. Lungun hian do roha ni si Winston alani i. Ahu pe, mansai lungun do rohangku jala maol do i huhalupahon. Alai gabe tarapul do rohanami tingki dijaha hami Menara Pengawal 15 April 2009, di “Pertanyaan Pembaca” na marjudul “Apakah ada harapan kebangkitan bagi bayi yang meninggal dalam kandungan ibunya?” Artikel on paposhon rohanami, Jahowa do na manontuhon aha na ingkon diulahon Ibana jala sai na denggan na diulahon Ibana. Ndang sadia leleng nai salpuhonon ni Jahowa ma sude angka na mambahen lungun rohanta, jala marhite Anakna ripashononna ma angka ulaon ni Sibolis. (1 Joh. 3:8) Artikel on mangurupi hami muse asa lam mangargai “mutiara” na didapot hami ala gabe naposona! Ala diboto hami hasintongan taringot pangkirimon di ari na naeng ro, gabe tarapul ma rohanami nang pe mangadopi hasusaan di portibi on.
Dung na keguguran i ahu, merintis ma hami muse. Melayani ma hami saleleng piga-piga bulan di Betel Australia jala gabe pengawas wilayah muse. Dung melayani saleleng opat taon di New South Wales dohot di Sydney, taon 1981 digokkon ma hami melayani di Betel Australia. Disi ma hami sahat tu saonari.
Winston, boi do pengalamanmu tingki di Kepulauan Pasifik Selatan mangurupi ho dung gabe anggota Panitia Cabang di Australasia?
Boi. Na parjolo, dipillit do cabang Australia laho mangawasi Samoa Amerika dohot Samoa. Jala dipasada do cabang di Selandia Baru dohot Australia. Saonari, cabang Australasia mengawasi piga-piga inganan dohot ma i Australia, Samoa Amerika dohot Samoa, Kepulauan Cook, Selandia Baru, Niue, Timor-Leste, Tokelau dohot Tonga. Las do rohangku ala boi gabe wakil ni kantor cabang tu angka inganan i. Pengalamanku tingki rap saulaon dohot angka dongan na setia di inganan i, mangurupi ahu saonari melayani nasida sian kantor cabang.
Si Winston dohot si Pam di kantor cabang Australasia
Kesimpulanna, marsiajar ma hami sian angka pengalamannami, ndang holan na magodang na boi mangalului Debata. Angka na poso pe, boi do mandapot “mutiara na arga” nang pe ndang lomo roha ni keluarga. (2 Raj. 5:2, 3; 2 Kron. 34:1-3) Tutu ma, Debata parholong do Jahowa jala lomo rohana asa sude halak mandapot hangoluan salelengna!
Nunga lobi sian 50 taon tingki dilului hami Debata. Tingki i, ndang diboto hami songon dia mangalului Debata. Tutu ma, hasintongan taringot Harajaon i ma sada mutiara na mansai arga! Sian nasa gogonami, marsitutu do hami asa tongtong mampartahanhon mutiara na mansai arga on!