Lam tu Dengganna Marbarita—Mangadopi Parjabu na Muruk

Boasa Ringkot: Burju manang pantun do somalna halak na tajumpangi tingki marbarita. Alai, disuriranghon Jesus do laho adong na manghosomi hita. (Joh. 17:14) Alani i, ndang pola songgot rohanta molo pajumpang dohot parjabu na muruk. Tingki masa sisongon i, denggan ma nian alusta asa pasonanghon roha ni Jahowa, Debata na tahatindanghon. (Rom. 12:17-21; 1 Ptr. 3:15) Molo songon i tabahen, olo do ra ndang parohon parbadaan. Asing ni i, parjabu dohot angka halak na mangida gabe olo manangihon molo ro muse Sitindangi Ni Jahowa.—2 Kor. 6:3.

Songon dia mangulahon:

Lambok jala burju ma mangantoi. On boi pamalumhon roha. Unang ma mura hansit rohanta tu na didok ni parjabu. (Pjm. 7:9) Na adong do ra sipingkironna manang ndang pas tingki haroronta mambahen gabe jut rohana. Molo sogo pe rohana tu barita na taboan jotjotan ala naung diparoaroa halak.—2 Kor. 4:4.
Lambok jala denggan ma manghatai. (Poda. 15:1) Ai na tardungo manang gabe guga do ibana tabahen? Nang pe hita mangangku sala ndang alani parbaritaonta, boi do hita mangangku sala ala ro di tingki na so pas. Na hea do dibege ibana hata na so sintong taringot hita umbahen na muruk ibana? Molo songon i, boi do dohonta, ”Mangantusi do hami molo i mambahen jut roha muna. Alai, ndang sintong na binege muna i taringot hami. Boi do patorangon nami?” Na so satolop do ibana tu sada sian parsiajaranta, ra taringot na dipabali manang taringot mudar? Boi do dohonta, ”Diantusi hami do i. Godang do halak na songon i panghilalaanna. Alai, boi do dipatuduhon hami hatoranganna sian Bibel?”
Molo muruk situtu do ibana, dumenggan ma lao hita sian i ndang pola taalusi. Molo didok ibana ndang olo be ibana dijumpangi Sitindangi Ni Jahowa, paboa ma tu ibana ndang na laho ro be hita.

Ulahon Ma On Saleleng Sabulan:

Latik hamu ma on di borngin panombaon na sasaripe.
Dung manadinghon parjabu na muruk, ulas ma i rap donganta marbarita songon dia asa denggan tabahen laho mangadopi sisongon i.