Hiras ma Manjujui Angka Dongan tu Ulaon na Denggan

Heber 10:24 manogihon hita asa ”masipajujuan tu haholongan dohot tu angka ulaon na denggan.” Hita boi patoguhon haporseaon ni angka donganta, marhite pangalaho na patut sitiruon dohot haporseaonta na togu. Paboa ma pangalaman muna na denggan tu angka dongan di huria. Asa boi diida nasida na marlas ni roha situtu do hamu mangulahon lomo ni roha ni Jahowa. Alai, unang ma bandinghon nasida tu dirimu manang tu na asing. (Gal. 6:4) Alani i pangke ma haporseaon muna na togu i laho manjujui angka dongan tu “haholongan dohot tu angka ulaon na denggan,” ndang na laho mangalului hahurangan ni nasida. Molo holong do tapangke laho manjujui, hiras ma roha nasida mangulahon angka ulaon na denggan dohot ma i marbarita na uli.