DUNG lam tamba jolma i, rarat ma nang dosa dohot hajahaton di tano on. Holan sada do panurirang di tingki i goarna si Henok. Ibana paingothon jolma na laho ripashonon ni Debata angka parjahat. Alai, lam gok ma hajahaton jala lam jorbut. Adong surusuruan mangalo tu Debata jala manadingkon inganan nasida di surgo, manuman dirina gabe jolma, jala dibuat ma angka borua ise lomo ni rohana. Parsaripeon na so patut on, manubuhon angka baoa na garang jala gogo—pandobo na digoari Nepilim na mambahen gok hajahaton dohot pambunuon di tano on. Hansit roha ni Debata ala naung sega angka tompaanNa di tano on.

Dung mate si Henok, adong ma sada baoa na tigor, goarna si Noak. Ibana dohot keluargana mangulahon na sintong di adopan ni Debata. Tingki ditontuhon Debata laho mangaripashon parjahat sian tano on, marsangkap do Ibana paluahon si Noak dohot sude ragam ni binatang. Didok Debata ma tu si Noak asa dipauli sada parau—na balga maropat suhi. Di bagasan parau i si Noak dohot keluargana boi tongtong mangolu, rap dohot angka ragam ni binatang, sahat tu na salpu aek na sumar na laho ro i. Dioloi si Noak do Debata. Saleleng 40 manang 50 taon dipauli si Noak parau i, ibana pe parbarita hatigoran (2 Petrus 2:5) Dipaboa ibana na laho ro aek na sumar, alai ndang adong na manangihon. Bongot ma si Noak dohot keluargana nang angka binatang. Dung i ditutup Debata ma pintu ni parau i. 

Dobar ma udan saleleng 40 ari 40 borngin mangalungkupi tano on. Ripas ma nasa parjahat. Dung pigapiga bulan, sumurut ma aek, sangkot ma parau i di punsu ni dolok. Ruar ma si Noak dohot keluargana songon i angka binatang, sataon ma nasida di parau i. Dipelehon si Noak pelean tu Jahowa laho mandok mauliate. Dijalo Debata pelean i jala dipapos roha ni nasida na so ulahanNa be paro aek na sumar. Dibahen Jahowa ma halibutongan gabe partinandaan na tarida.

Dung salpu aek na sumar i, dilehon Debata parenta na baru tu jolma. Boi ma nasida mangallang jagal. Alai, ndang boi panganonna mudarna. Diparentahon do muse asa marpinompari jala digohi tano on. Alai, pungu do angka jolma dirajai sada ulubalang na margoar si Nimrod jala dipungka ma pajongjongkon sada manara na timbo digoari ma i Babel. Nasida marsangkap laho mangalo parenta ni Debata asa sopar jala manggohi liat portibi on. Ujungna, disundati Debata ma sangkap nasida, digaori ma hatana jala marragam ma hata nasida. Ala so marsiantusan be nasida, ditadinghon ma ulaon i jala marserak ma nasida.

—Dibuat sian 1 Musa bindu 6 sahat tu 11; Judas 14, 15.

HIRAHIRA 350 taon dung salpu Aek na Sumar. Maringanan ma si Abraham di huta Ur na digoari Irak saonari. Sada baoa na marhaporseaon do si Abraham. Alai, saonari diuji ma haporseaonna.

Didok Jahowa ma tu si Abraham asa ditadingkon huta hatubuanna jala borhat tu luat na asing, i ma tano Kanaan. Pos do roha ni si Abraham mangoloi Jahowa. Diboan ma sude keluargana, si Lot anak ni hahana, dohot angka hatobanna. Dung leleng di pardalanan, sahat ma nasida tu tano Kanaan jala maringanan di tenda do nasida. Dijanjihon Jahowa tu si Abraham bahenonNa ibana gabe sada bangso na balga, jala sude jolma di tano on boi dapotan pasupasu marhite ibana, jala pinomparna mangingani tano Kanaan.

Di tano Kanaan mamora do si Abraham dohot si Lot, godang birubiru dohot angka pinahan ni nasida. Ala ndang siat be inganan parmahanan di nasida, disuru si Abraham ma si Lot mamillit parjolo tu dia ibana maringanan. Dipillit si Lot do tano na napu di humaliang aek Jordan jala maringanan do ibana di huta Sodom. Alai, pangisi ni huta Sodom na jahat do—jala mardosa situtu nasida maradophon Jahowa.

Di pudian ni ari, dipapos Debata Jahowa muse roha ni si Abraham ingkon songon torop ni bintang na di langit do angka pinomparna. Pos do roha ni si Abraham tu janji i. Alai, si Sarah tunggani boru ni si Abraham, ndang ra adong anakna. Dung marumur si Abraham 99 taon jala si Sarah 90 taon, didok Debata ma tu si Abraham na laho adong anak nasida. Tutu do hata ni Debata i, ditubuhon si Sarah ma si Isak. Adong do anak ni si Abraham na asing, alai marhite si Isak do ro Sipalua naung dijanjihon di porlak Eden.

Tingki i, maringanan ma si Lot dohot keluargana di Sodom. Halak partigor do ibana, ndang songon halak na di huta i. Andorang so diuhum huta Sodom, ro ma surusuruan ni Jahowa paboahon si Lot dohot keluargana asa hatop lao sian huta i, jala ndang boi nasida mangida tu pudi. Dibahen Debata ma udan barerang dohot api tu huta Sodom dohot huta Gomorra, mangaripashon sude pangisi ni huta i. Malua do si Lot dohot dua boruna. Alai, tunggani boru ni si Lot mangida tu pudi, ala holong rohana tu artana. Ala ndang dioloi hata ni surusuruan i, gabe mate ma ibana.

—Dibuat sian 1 Musa 11:10–19:38.